ការបោះឆ្នោតជ្រើសរើសសមាជិកព្រឹទ្ធសភា នៅក្នុងអាណត្តិទី៤ ឆ្នាំ២០១៨ ខាងមុខនេះ កាន់តែខិតជិតមកដល់ គឺនៅសល់ប្រមាណ ជាង ២ខែទៀតប៉ុណ្ណោះ។ មកដល់ពេលនេះ គណៈកម្មាធិការជាតិរៀបចំការបោះឆ្នោត (គ.ជ.ប) ទើបប្រកាសទទួលស្គាល់សុពលភាព ជាផ្លូវការបានតែមួយគណបក្សប៉ុណ្ណោះ គឺពីខាងបក្សកាន់អំណាច។
គ.ជ.បបានទទួលស្គាល់រួចហើយនូវបញ្ជីឈ្មោះចូលរួមបោះឆ្នោត និងបញ្ជីបេក្ខជនឈរឈ្មោះឲ្យគេបោះឆ្នោត នៅព្រឹទ្ធសភា របស់គណបក្សប្រជាជនកម្ពុជា។
ចំណែកគណបក្សប្រឆាំងវិញ ក៏ប្រកាសដែរថា ខ្លួននឹងដាក់បញ្ជីឈ្មោះបេក្ខជនទៅស្ថាប័នជាតិរៀបចំការបោះឆ្នោត សម្រាប់ការចូលរួមប្រកួតប្រជែង ក្នុងរយៈពេលយ៉ាងយូរបីថ្ងៃខាងមុខទៀតនេះ។
លោក សុន ឆ័យ មន្ត្រីជាន់ខ្ពស់គណបក្សសង្គ្រោះជាតិ ឲ្យដឹងនៅថ្ងៃទី២៤ ខែតុលា ថា នៅពេលនេះ ខាងគណបក្សបានរៀបចំបញ្ជីឈ្មោះ និងឈ្មោះបេក្ខជនរួចហើយ ដែលនឹងត្រូវឡើងសង្វៀននយោបាយ សម្រាប់តំណែងព្រឹទ្ធសភា ក្នុងពេលខាងមុខនេះ។
លោកបន្តថា គណបក្សនឹងការបញ្ជូនឈ្មោះបេក្ខជនទៅស្ថាប័នជាតិរៀបចំការបោះឆ្នោត ក្នុងពេលឆាប់ៗនេះ។
លោក សុន ឆ័យ ដែលជាប្រធានក្រុមតំណាងរាស្ត្រ ពីខាងបក្សប្រឆាំង យល់ឃើញថា វិបត្តិនយោបាយបច្ចុប្បន្ននេះ នឹងមិនធ្វើឲ្យរាំងស្ទះដល់ដំណើរចុះឈ្មោះបោះឆ្នោត នៅក្នុងស្ថាប័នព្រឹទ្ធសភានេះឡើយ។ ជាងនេះទៀត ខាងគណបក្ស នៅតែមានសកម្មភាពនយោបាយ ប្រចាំថ្ងៃជាធម្មតា។
គណៈកម្មាធិការជាតិរៀបចំការបោះឆ្នោត បានចេញសេចក្ដីសម្រេចជាផ្លូវការ នៅថ្ងៃទី២៤ តុលា ដោយទទួលស្គាល់ពាក្យស្នើសុំចុះបញ្ជី និងបញ្ជីបេក្ខជនឈរឈ្មោះបោះឆ្នោត របស់គណបក្សប្រជាជនកម្ពុជា ថាជាបញ្ជីដែលត្រឹមត្រូវ និងបានការ។
អង្គបោះឆ្នោត សម្រាប់ការចូលរួមបោះឆ្នោត តាមបែបអសកលនេះ គឺជាសមាជិកក្រុមប្រឹក្សាឃុំសង្កាត់នៅទូទាំងប្រទេស និងសមាជិករដ្ឋសភាទាំង ១២៣រូប។ អ្នកជំនាញកិច្ចការបោះឆ្នោត យល់ឃើញថា គេអាចទស្សន៍ទាយទុកមុនបានថា គណបក្សប្រជាជនកម្ពុជា អាចជាបក្សដែលទទួលបានការផ្ដល់សេចក្ដីទុកចិត្តច្រើនជាងគេ ព្រោះការបោះឆ្នោតនេះ ផ្អែកទៅលើសមាជិកសភា និងក្រុមប្រឹក្សាឃុំសង្កាត់ណាដែលច្រើនជាង។ ប៉ុន្តែលទ្ធផលនេះ គេនៅមិនទាន់អាចស្មានទុកមុនបានថា សំឡេងពិតជានៅស្ថិតស្ថេរ ឬក៏យ៉ាងណានោះទេ។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិច (NICFEC) មានប្រសាសន៍ថា ការបោះឆ្នោតជ្រើសរើសសមាជិកព្រឹទ្ធសភានេះ វាពុំមានអ្វីជាបញ្ហាត្រូវចោទឡើយ។ លោកបន្តថា ព្រោះការបោះឆ្នោត តាមបែបអសកលនេះ គឺវាហាក់មិនមានអ្វីដែលសម្ងាត់ បើប្រៀបធៀបទៅនឹងការបោះឆ្នោតជ្រើសតាំងតំណាងរាស្ត្រ។
នៅថ្ងៃទី១៥ ខែ មករា ឆ្នាំ២០១៨ គឺការបោះឆ្នោតជ្រើសរើសសមាជិកព្រឹទ្ធសភា សម្រាប់នីតិកាលទី ៤។ ការបោះឆ្នោតនេះ ត្រូវបានអ្នកជំនាញកិច្ចការបោះឆ្នោត យល់ឃើញថា បានប្រព្រឹត្តទៅស្របពេលកម្ពុជា កំពុងជួបវិបត្តិនយោបាយ ជាពិសេសសំឡេងគណបក្សប្រឆាំង ត្រូវរងការគំរាមកំហែង និងបំភិតបំភ័យ៕