អភិបាលរាជធានីភ្នំពេញ ព្រមានបិទទីតាំងកម្សាន្តទាំងឡាយណា ដែលបង្កភាពរញ៉េរញ៉ៃ នាំឲ្យបាត់បង់សណ្ដាប់ធ្នាប់សាធារណៈ។ អ្នកឃ្លាំមើលការគោរពសិទ្ធិមនុស្ស គាំទ្រសារព្រមាននេះ ប៉ុន្តែស្នើឲ្យការអនុវត្តមានប្រសិទ្ធភាព និងស្មើភាពគ្នាទៅលើគ្រប់ភាគីបង្កបទល្មើស។
អភិបាលរាជធានីភ្នំពេញ លោក ឃួង ស្រេង បានព្រមានចាត់វិធានការក្ដៅទៅលើម្ចាស់បើកធ្វើអាជីវកម្មរួមមាន៖ ហាងផឹកស៊ី បៀរហ្គាដិន ហាងម៉ាស្សា ខារ៉ាអូខេ និងក្លឹបកម្សាន្តផ្សេងៗ នៅក្នុងក្រុងទាំងអស់ ដែលប៉ះពាល់ដល់សណ្ដាប់ធ្នាប់សាធារណៈ ជាពិសេសមានសំឡេងរំខានដល់ការរស់នៅ របស់ប្រជាពលរដ្ឋ ស្នើឲ្យអាជ្ញាធរខណ្ឌ និងសមត្ថកិច្ចពាក់ព័ន្ធតាមមូលដ្ឋាននីមួយៗ ត្រូវចុះពិនិត្យបិទភ្លាមៗ។
លោកបន្តថា នៅពេលទទួលបណ្ដឹងពីប្រជាពលរដ្ឋ សមត្ថកិច្ចពាក់ព័ន្ធ ត្រូវចុះពិនិត្យជាក់ស្ដែង ហើយបើរកឃើញកំហុសកើតចេញពីការធ្វើអាជីវកម្ម ដូចពលរដ្ឋប្ដឹងចោទពិតមែន ត្រូវធ្វើបែបបទបិទទីតាំងទាំងនោះភ្លាមៗ ដោយមិនចាំបាច់សុំយោបល់ ឬសុំការអនុញ្ញាតពីរដ្ឋបាលរាជធានីនោះទេ។
មន្ត្រីផ្នែកអង្កេតជាន់ខ្ពស់សមាគមអាដហុក (Adhoc) លោក ស៊ឹង សែនករុណា ស្ថិតក្នុងចំណោមសង្គមស៊ីវិលក្រៅរដ្ឋាភិបាលមួយចំនួនទៀត បានស្វាគមន៍ចំណាត់ការរបស់អាជ្ញាធររាជធានីភ្នំពេញ ទៅលើម្ចាស់ទីតាំងកម្សាន្ត ដែលបង្កផលប៉ះពាល់ដល់ប្រជាពលរដ្ឋ មានលំនៅឋានជិតទីតាំងបើកធ្វើអាជីវកម្មនីមួយៗ។
ទន្ទឹមគ្នានេះ លោកក៏ស្នើដល់កម្លាំងសមត្ថកិច្ច ត្រូវចុះអនុវត្តការងារនេះ ឲ្យមានប្រសិទ្ធភាព និងយុត្តិធម៌ និងស្មើភាពគ្នា រវាងប្រជាពលរដ្ឋ ជាមួយម្ចាស់អាជីវកម្ម។
បញ្ហានេះដែរ ប្រជាពលរដ្ឋមានលំនៅឋាន នៅជិតទីតាំងកម្សាន្ត ឬហាងផឹកស៊ីមួយចំនួន បានឲ្យ អាស៊ីសេរីដឹង នៅថ្ងៃទី២៤ ខែតុលា ថា កន្លងមក ពាក្យបណ្ដឹងរបស់ពួកគាត់ ដែលបានប្ដឹងទៅកាន់អាជ្ញាធរមូលដ្ឋាន ឲ្យជួយអន្តរាគមន៍លើករណីមានសំឡេងរំខាន ពីការបើកធ្វើអាជីវកម្មបៀរហ្គាដិនជាដើម គឺភាគច្រើន អាជ្ញាធរនៅតាមមូលដ្ឋាននីមួយៗ មិនបានជួយរកដំណោះស្រាយជូនទេ ហើយម្ចាស់បើកធ្វើអាជីវកម្មទាំងនោះ ក៏មិនខ្វល់នឹងសំឡេងនាំប៉ះពាល់ដល់ការរស់នៅរបស់ពួកគាត់ដែរ ព្រោះបានត្រូវដងត្រូវផ្លែជាមួយសមត្ថកិច្ច ស្ថាប័នជំនាញនៅតាមមូលដ្ឋានទាំងនោះ។
ប៉ុន្មានឆ្នាំកន្លងទៅនេះ រដ្ឋបាលរាជធានីភ្នំពេញ ធ្លាប់ដាក់វិធានការក្ដៅ ទៅម្ចាស់បើកធ្វើអាជីវកម្ម ឬហាងផឹកស៊ី និងក្លឹបកម្សាន្តទាំងអស់ ក្នុងទីក្រុងភ្នំពេញ ដោយព្រមានថា បើមានករណីបាញ់បោះសេរី ទាំងក្នុង ឬមុខទីតាំងហាងនីមួយៗ អាជ្ញាធរត្រូវចុះបិទទីតាំងទាំងនោះ បញ្ឈប់មិនឲ្យបន្តបើកធ្វើអាជីវកម្ម ប៉ុន្តែវិធានការនេះ មានម្ចាស់ហាងខ្លះត្រូវរងនូវភាពអយុត្តិធម៌ ដោយសារមានភ្ញៀវបង្កបទល្មើសបាញ់បោះសេរី ប៉ុន្តែបែរជាទៅរងគ្រោះម្ចាស់ហាងទៅវិញ។
បញ្ហានេះ រដ្ឋបាលរាជធានីភ្នំពេញ បានរៀបចំជាបណ្ដាញទំនាក់ទំនងតាមអនឡាញ ឬបណ្ដាញទូរស័ព្ទទាន់ហេតុការណ៍ចំនួន ១០ខ្សែ ដើម្បីឲ្យប្រជាពលរដ្ឋផ្ដល់ព័ត៌មានមកអាជ្ញាធរមានដូចជា៖ ចោរកម្ម ឆក់ ប្លន់ បញ្ហាកកស្ទះ គ្រោះថ្នាក់ចរាចរណ៍ ដាច់ចរន្តអគ្គិសនី និងបញ្ហាអសន្តិសុខផ្សេងៗទៀត ដើម្បីអាជ្ញាធរ ចេញជួយអន្តរាគមន៍ និងមានដំណោះស្រាយជូនឲ្យបានទាន់ពេល។
លោក ឃួង ស្រេង ស្នើឲ្យប្រជាពលរដ្ឋរស់នៅក្នុងរាជធានីភ្នំពេញទាំងអស់ ចូលរួមសហការជាមួយអាជ្ញាធរឲ្យបានគ្រប់គ្នា៕