មេឃុំជើងព្រៃ គណបក្សសង្គ្រោះជាតិ នៅស្រុកបាធាយ ខេត្តកំពង់ចាម អះអាងថា លោកបានត្រៀមខ្លួនរួចជាស្រេចហើយ ថានឹងចូលទៅបំភ្លឺតំណាងអយ្យការអមសាលាដំបូងខេត្តនេះ តាមដីកាកោះហៅរូបលោក ដើម្បីសាកសួរករណីទំនាស់រឿងការធ្វើផ្លូវសាធារណៈ ដែលសកម្មជនគណបក្សប្រជាជនកម្ពុជាឃុំបានប្ដឹងនោះ។
មេឃុំជើងព្រៃគណបក្សសង្គ្រោះជាតិ ហៅដីកាកោះដោយតំណាងអយ្យការអមសាលាដំបូងខេត្តកំពង់ចាម ថា ជារឿងអយុត្តិធម៌មកលើមេឃុំគណបក្សប្រឆាំង ក្នុងចេតនានយោបាយ។
លោក វ៉ែន សំអុល ឲ្យដឹងនៅថ្ងៃទី២០ តុលា ថា ករណីទំនាស់រឿងធ្វើផ្លូវប៉ះពាល់ដីរបស់សកម្មជនគណបក្សប្រជាជនកម្ពុជា នៅភូមិត្រយ៉ងពង ក្នុងឃុំជើងព្រៃនោះ គឺពុំមែនជាកំហុសរបស់លោកនោះទេ។ មេឃុំគណបក្សប្រឆាំងរូបនេះ អះអាងទៀតថា រឿងនេះគឺលោកធ្វើតាមសំណូមពររបស់ប្រជាពលរដ្ឋ ដោយមានស្នាមមេដៃចំនួនជាង៦០នាក់ ដែលបានស្នើឲ្យលោកជួយជីកប្រឡាយ បង្ហូរទឹក និងធ្វើផ្លូវសាធារណៈមួយខ្សែ ដែលមានទទឹងជាង៣ម៉ែត្រ និងប្រវែងប្រហែល ៥០ម៉ែត្រ ដើម្បីប្រើប្រាស់ជាប្រយោជន៍រួមនៅក្នុងមូលដ្ឋាន។ លោកបន្ថែមថា ក្រោយពីទទួលបានសំណូមពរ រូបលោកនិងក្រុមប្រឹក្សាឃុំជើងព្រៃចំនួន៧រូប ក្នុងនោះគណបក្សសង្គ្រោះជាតិ ៤រូប និងគណបក្សប្រជាជនកម្ពុជា ៣រូប ក៏បានចុះទៅពិនិត្យមើលដល់ទីកន្លែងដីទំនាស់នោះតែម្ដង៖«ខ្ញុំនឹងចូលទៅបំភ្លឺ។ កុំឆ្ងល់ហេតុអ្វីក្រុមប្រឹក្សាឃុំទាំង ៧ នាក់ គេមិនព្រមកោះហៅឲ្យចូទៅបំភ្លឺដែរ?»។
ដីកាកោះដែលចុះហត្ថលេខាដោយតំណាងអមសាលាដំបូងខេត្តកំពង់ចាម លោក ប្លង់ សុផល ចុះថ្ងៃទី៦ តុលា កោះហៅ លោក វ៉ែន សំអុល រស់នៅភូមិជើងព្រៃ ឃុំជើងព្រៃ ស្រុកបាធាយ ឲ្យចូលទៅកាន់សាលាដំបូងខេត្តនៅរសៀលថ្ងៃទី២៣ វិច្ឆិកា ខាងមុខ ដើម្បីសាកសួរពីដំណើររឿងហិង្សាទៅលើអ្នកកាន់កាប់អចលនវត្ថុ និងធ្វើឲ្យខូចខាតទ្រព្យសម្បត្តិអ្នកដទៃ។
មន្ត្រីស៊ើបអង្កេតសមាគមការពារសិទ្ធិមនុស្សអាដហុក (Adhoc) ខេត្តកំពង់ចាម លោក មាន ព្រហ្មមុនី ដែលបានចុះទៅស្រាវជ្រាវដល់ទីកន្លែងមានទំនាស់នោះ លើកឡើងថា រឿងនេះពុំមែនជាកំហុសរបស់មេឃុំជើងព្រៃនោះទេ ព្រោះមេឃុំរូបនេះធ្វើទៅតាមសំណូមរបស់ប្រជាពលរដ្ឋ។ លោកហៅករណីនេះថា ជាចេតនានយោបាយ ច្រើនជាងការហៅមេឃុំ ដើម្បីដោះស្រាយផ្លូវច្បាប់ ព្រោះកន្លងមកមេឃុំរូបនេះមានប្រជាប្រិយ និងមានពលរដ្ឋគាំទ្រច្រើន៖ «ការកាយហ្នឹង ប្រជាពលរដ្ឋជាអ្នកកាយ។ ពួកគាត់អ្នកចង់រំដោះទឹក។ ដូច្នេះគួរតែកោះហៅប្រជាពលរដ្ឋ»។
មេឃុំជើងព្រៃ លោក វ៉ែន សំអុល មានប្រសាសន៍ថា ម្ចាស់ដីទំនាស់ដែលប្ដឹងលោកទៅតុលាការនោះឈ្មោះ ខន ប៊ុន ជាសកម្មជនគណបក្សប្រជាជនកម្ពុជា ឃុំជើងព្រៃដ៏មានឥទ្ធិពល។ លោកបន្ថែមថា ការប្ដឹងនេះដោយសារ លោក ខន ប៊ុន មិនសប្បាយចិត្តដែលលោកមិនជាប់ធ្វើជាមេឃុំមួយនេះ។
អាស៊ីសេរីពុំអាចរកប្រភពទាក់ទង លោក ខន ប៊ុន ដើម្បីឆ្លើយតបជុំវិញបញ្ហានេះបានទេនៅថ្ងៃទី២០ តុលា។ រឿងទំនាស់នេះកន្លងមកអភិបាលខេត្តកំពង់ចាម បានបញ្ជាឲ្យមេឃុំគណបក្សប្រឆាំងរូបនេះលុបប្រឡាយចេញ ដោយកំណត់រយៈពេល ៧ថ្ងៃ ក្រោយចេញបទបញ្ជា ហើយប្រមាណ៣ថ្ងៃក្រោយមក មេឃុំក៏បាននាំគ្នាទៅកាយដីលុបប្រឡាយនោះភ្លាមៗ។ សព្វថ្ងៃចិញ្ចើមផ្លូវដីទំនាស់ ត្រូវបានម្ចាស់ដី យកមេឃឈើទៅធ្វើរបងមិនឲ្យប្រជាពលរដ្ឋឆ្លងកាត់នោះទេ៕