លោកនាយករដ្ឋមន្ត្រី ហ៊ុន សែន ប្រតិកម្មចំពោះការរិះគន់ដោយមិនសំដៅចំឈ្មោះដែលចោទថា រដ្ឋាភិបាលរបស់លោកមានគម្រោងរំលាយបក្សប្រឆាំង គឺជាការក្បត់ឆន្ទៈប្រជាពលរដ្ឋជាងពាក់កណ្ដាលប្រទេស។ ការលើកឡើងរបស់លោក ហ៊ុន សែន នេះ ក្នុងពេលស្ថានភាពគណបក្សសង្គ្រោះជាតិ កំពុងត្រូវបានរដ្ឋាភិបាលរុញឲ្យដើរដល់ផ្លូវទាល់ច្រក។
លោក ហ៊ុន សែន នៅថ្ងៃទី១៨ តុលា នៅចំពោះមុខកម្មកររោងចក្រជាងមួយម៉ឺននាក់ នៅជាយក្រុងភ្នំពេញ ដោយបដិសេធចំពោះការចោទប្រកាន់ថា រដ្ឋាភិបាលមានគម្រោងរំលាយបក្សប្រឆាំង ជាការក្បត់ឆន្ទៈពលរដ្ឋ។ លោកបន្តថា អ្នករិះគន់ទាំងនោះ ជាអ្នកដែលមិនយល់ពីសភាពការណ៍នយោបាយ។ ជាងនេះទៀត លោកនាយករដ្ឋមន្ត្រីដាក់សំណួរទៅអ្នករិះគន់ថា សភាពការណ៍ក្រោយការបោះឆ្នោតកាលពីឆ្នាំ២០១៣ និងសភាពការណ៍នយោបាយក្នុងតំបន់ ព្រមទាំងពិភពលោកដទៃទៀត ស្រដៀងនិងកម្ពុជាដែរ ហេតុដូចម្ដេចបានជាមិនថ្កោលទោសថា ជារឿងខុសឆ្គងដែរ? លោកនាយករដ្ឋមន្ត្រី យល់ឃើញថា ការសម្រេចចិត្តរបស់រដ្ឋាភិបាល គឺមានហេតុផលសមរម្យ ចំពោះភាពឆ្គាំឆ្គងរបស់បក្សប្រឆាំងនៅពេលនេះ។ មិនត្រឹមតែប៉ុណ្ណោះ លោក ហ៊ុន សែន អះអាងថា ការចោទប្រកាន់ដែលថា បើរំលាយបក្សប្រឆាំងគឺមានន័យថា ក្បត់ឆន្ទៈពលរដ្ឋនោះ គឺជាហេតុផលដែលពិបាកទទួលយកបំផុត ព្រោះបក្សនេះក៏ធ្លាប់ទាមទារឲ្យរូបលោក ចុះចេញពីរដ្ឋាភិបាលដែរ។
បើទោះជាបែបណា អ្នកជំនាញផ្នែកវិទ្យាសាស្ត្រនយោបាយ មើលឃើញថា កម្ពុជាបានឆ្លងកាត់ឧបសគ្គជាច្រើនលើកច្រើនសាណាស់មកហើយ នៅតែមិនទាន់មានភាពចាស់ទុំផ្នែកនយោបាយដដែល។
សាស្ត្រាចារ្យផ្នែកវិទ្យាសាស្ត្រនយោបាយ លោក សូ ចន្ថា មានប្រសាសន៍ថា ប្រតិកម្មរបស់លោក ហ៊ុន សែន នេះមានន័យថា អ្នកនយោបាយនៅមិនទាន់ស្គាល់ពីតម្លៃពិត នៃការប្រកួតប្រជែងតាមបែបប្រជាធិបតេយ្យនៅឡើយទេ។ អ្នកវិភាគរូបនេះ បន្តថា ជាអ្នកនយោបាយ ត្រូវហ៊ានប្រឈមមុខគ្រប់សភាពការណ៍ ទាំងការរិះគន់ដោយចំហ និងលាក់មុខ។ លើសពីនេះទៅទៀត លោកមើលឃើញថា ការប្រកួតប្រជែងក្នុងសង្គមប្រជាធិបតេយ្យ គឺតែងប្រើប្រាស់កម្មវិធីនយោបាយ ដាក់លើតុ ហើយដាក់បង្ហាញជាសាធារណៈ ផ្ទុយទៅវិញនៅកម្ពុជា បញ្ហានេះនៅមិនទាន់ត្រូវបានបើកទូលាយនៅឡើយទេ ជាពិសេសបក្សកាន់អំណាច នៅមានចរិតត្បិតត្បៀត និងរឹតបន្តឹង។
បើទោះជាបែបណា លោក ហ៊ុន សែន បានទាមទារឲ្យអ្នកដែលរិះគន់ថា រដ្ឋាភិបាល និងរូបលោកផ្ទាល់ មានគម្រោងរំលាយបក្សប្រឆាំងនេះ ត្រូវក្រឡេកមើលពីព្រឹត្តិការណ៍ ក្រោយការបោះឆ្នោត កាលពីឆ្នាំ២០១៣ ឡើងវិញ ដោយលោកចាត់ទុកថា គឺមានគោលបំណងផ្ដួលរំលំរដ្ឋាភិបាល តាមរយៈបដិវត្តន៍ដ៏ពិតប្រាកដ។
បើទោះជាបែបណា គណបក្សប្រឆាំង តែងបដិសេធការចោទប្រកាន់នេះ ជាញឹកញាប់ ហើយអះអាងថា អ្វីដែលបក្សប្រឆាំងចង់បាននោះគឺតាមរយៈការបោះឆ្នោតមួយ ដែលមានភាពសេរី ត្រឹមត្រូវ និងយុត្តិធម៌៕