Clik here to view.
ស្ថានទូតសហរដ្ឋអាមេរិកប្រចាំក្រុងភ្នំពេញ បញ្ជាក់ឲ្យអាស៊ីសេរីដឹងនៅថ្ងៃទី១៧ តុលា ថា ការចរចាអំពីការទទួលយកពលរដ្ឋខ្មែរធ្លាប់ជាប់ពិរុទ្ធ ដែលសហរដ្ឋអាមេរិកបណ្ដេញចេញមកកម្ពុជាវិញ បានបន្តធ្វើឡើងវិញហើយ ក្រោយពីបានផ្អាកមួយរយៈ។
មន្ត្រីនាំពាក្យស្ថានទូតសហរដ្ឋអាមេរិកប្រចាំក្រុងភ្នំពេញ លោក អារ៉ែន ស្វាចេស្ត (Arend Zwartjes) បញ្ជាក់ប្រាប់អាស៊ីសេរី តាមសារអេឡិចត្រូនិកថា តំណាងមកពីសហរដ្ឋអាមេរិក និងកម្ពុជា បានជួបប្រជុំគ្នាកាលពីពេលថ្មីៗនេះ ដើម្បីបន្តការចរចាឡើងវិញ លើកិច្ចព្រមព្រៀងធ្វើមាតុភូមិនិវត្តឆ្នាំ២០០២នេះ។ យ៉ាងណាក៏ដោយ ស្ថានទូតបដិសេធ មិនផ្ដល់ព័ត៌មានលម្អិតពាក់ព័ន្ធនឹងករណីនេះ ថាតើសហរដ្ឋអាមេរិកនឹងយល់ព្រមដកចោលវិញនូវការដាក់ទណ្ឌកម្មមិនផ្ដល់ទិដ្ឋាការធ្វើដំណើរប្រភេទ B1/B2 ដល់មន្ត្រីការទូតកម្ពុជា ឬយ៉ាងណានោះទេ។
ស្ថានទូតក៏បដិសេធមិនអត្ថាធិប្បាយលើករណីដែលរដ្ឋាភិបាលកម្ពុជា សម្រេចផ្អាកការស្វែងរកអដ្ឋិធាតុអតីតទាហានអាមេរិក ដែលបានបាត់ខ្លួនកាលពីសម័យសង្គ្រាម។
ទីភ្នាក់ងារសារព័ត៌មានកម្ពុជា (AKP) រាយការណ៍ឲ្យដឹងនៅថ្ងៃទី១៧ ខែតុលា នេះថា ការបន្តការចរចាឡើងវិញអំពីការទទួលយកពលរដ្ឋខ្មែរដែលសហរដ្ឋអាមេរិក បានសម្រេចបណ្ដេញចេញនេះ ត្រូវបានមន្ត្រីនាំពាក្យក្រសួងការបរទេសកម្ពុជាលោក ជុំ សុន្ទរី បញ្ជាក់ថា ការចរចានេះ ពិនិត្យមើលលើលក្ខខណ្ឌមួយចំនួន ដែលភាគីកម្ពុជាអាចទទួលយកបាន ក្នុងនោះលក្ខខណ្ឌជាមូលដ្ឋានមួយដែលកម្ពុជាទាមទារនោះ គឺគុណភាពនៃការធ្វើសមាហរណកម្មប្រកបដោយលក្ខណៈវិជ្ជមាន របស់ពលរដ្ឋទាំងនេះទៅក្នុងសង្គមកម្ពុជាឡើងវិញ ដោយផ្អែកលើគោលការណ៍មនុស្សធម៌ និងសិទ្ធិមនុស្ស។
បច្ចុប្បន្ន សហរដ្ឋអាមេរិកកំពុងត្រៀមបណ្ដេញចេញពលរដ្ឋកម្ពុជាធ្លាប់ជាប់ពិរុទ្ធចំនួន ២១នាក់ មកកាន់កម្ពុជាវិញ។ ក្រោមកិច្ចព្រមព្រៀងរវាងរដ្ឋាភិបាលកម្ពុជា និងសហរដ្ឋអាមេរិក ស្ដីពីការធ្វើមាតុភូមិនិវត្តន៍ពលរដ្ឋខ្មែរពីសហរដ្ឋអាមេរិកមកកម្ពុជាវិញ ដែលបានអនុវត្តអស់រយៈពេលជិត ១៥ឆ្នាំមកនេះ មានពលរដ្ឋដើមកំណើតខ្មែរមិនតិចជាង ៥៦០នាក់ឡើយ ដែលជាប់ពិរុទ្ធនៅសហរដ្ឋអាមេរិក ត្រូវរដ្ឋាភិបាលសហរដ្ឋអាមេរិកចាប់បញ្ជូនមកកម្ពុជាវិញ៕
