Clik here to view.
សង្គមស៊ីវិលមើលឃើញថា វិបត្តិនយោបាយ និងបញ្ហាស្មុគស្មាញនានា នឹងបណ្ដាលឲ្យប្រជាពលរដ្ឋមិនអាចទៅចុះឈ្មោះបោះឆ្នោតបានគ្រប់ចំនួននោះទេ។ ការលើកឡើងនេះ ខណៈដែល ការចុះឈ្មោះឆ្នោតជិតបញ្ចប់ រីឯអ្នកដែលបានចុះឈ្មោះបោះឆ្នោតទើបតែបានជាង៣៩ម៉ឺននាក់។
បញ្ហានយោបាយច្របូកច្របល់ជាច្រើនជំពូក បានកើតឡើងជាបន្តបន្ទាប់ ស្របពេលដែលប្រទេស កម្ពុជា កំពុងរៀបចំការចុះឈ្មោះបោះឆ្នោត ដើម្បីត្រៀមរៀបចំការបោះឆ្នោតជ្រើសតាំងតំណាង រាស្ត្រអាណត្តិទី៦ នៅខែកក្កដា ឆ្នាំ២០១៨ខាងមុខ។
មន្ត្រីផ្នែកអង្កេតនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) លោក កន សាវាង្ស លើកឡើងថា វិបត្តិនយោបាយ និងការមិនសម្រួលឲ្យពលករ នៅក្រៅប្រទេសបានចុះឈ្មោះបោះឆ្នោត ព្រមទាំងបញ្ហាស្មុគស្មាញក្នុងការចេញលិខិតស្នាមជូនពលរដ្ឋ សម្រាប់ការចុះឈ្មោះបោះឆ្នោត បូករួមនឹងស្ថានភាពមិនអំណោយផលជាច្រើនទៀត អាចព្យាករណ៍បានថា ពលរដ្ឋខ្មែរនឹងមិនទៅចូលរួមចុះឈ្មោះបោះឆ្នោតបានគ្រប់ចំនួនឡើយ។ បើដូច្នេះមានន័យថា ការបោះឆ្នោតឆ្នាំ២០១៨ នឹងមិនមានសេរីត្រឹមត្រូវនិងយុត្តិធម៌ឡើយ។
គិតត្រឹមថ្ងៃទី១៧ ខែតុលា គឺនៅសល់តែ២៣ថ្ងៃទៀតប៉ុណ្ណោះ ការចុះឈ្មោះបោះឆ្នោតក្នុងបញ្ជីបោះ ឆ្នោតថ្មីឆ្នាំ២០១៧ និងការធ្វើបច្ចុប្បន្នភាពបញ្ជីបោះឆ្នោតឆ្នាំ២០១៦ នឹងត្រូវបញ្ចប់ ក៏ប៉ុន្តែគេមើល ឃើញថា ពលរដ្ឋដែលគ្រប់អាយុបោះឆ្នោត និងអ្នកផ្លាស់ប្ដូរទីលំនៅ ព្រមទាំងពលករនៅក្រៅប្រទេស មិនទាន់បានចុះឈ្មោះបោះឆ្នោតនោះទេ។ សេចក្ដីប្រកាសព័ត៌មានរបស់គ.ជ.ប បង្ហាញថា គិតត្រឹមម៉ោង៦ល្ងាច ថ្ងៃទី១៥ ខែតុលា គឺមានប្រជាពលរដ្ឋជាង ៣៩ម៉ឺននាក់ (៣៩៣,៥៩៣) បានទៅចុះ ឈ្មោះបោះឆ្នោត ខណៈប្រជាពលរដ្ឋដែលត្រូវមកចុះឈ្មោះបោះឆ្នោតមានជាង ១លាន ៦សែននាក់។
លោក កន សាវាង្ស លើកឡើងថា ចំនួនអ្នកដែលបានចុះឈ្មោះបោះឆ្នោត គឺនៅមានចំនួនតិចនៅ ឡើយ។
លោក កន សាវាង្យ បន្ថែមថាដើម្បីជំរុញឲ្យពលរដ្ឋចុះឈ្មោះបោះឆ្នោតបានច្រើននោះ គឺត្រូវសម្រួល ឲ្យពលករនៅក្រៅប្រទេស បានចុះឈ្មោះបោះឆ្នោត។ គ.ប.ជ ត្រូវបង្កើនការចុះអប់រំផ្សព្វផ្សាយដល់ ពលរដ្ឋ និងអាជ្ញាធរមូលដ្ឋាន និងពង្រីកក្រុមការងារចុះឈ្មោះបោះឆ្នោតចល័តឲ្យបានច្រើន។ ទន្ទឹម គ្នានេះ រដ្ឋាភិបាល ត្រូវស្តារស្ថានភាពនយោបាយឲ្យល្អប្រសើរឡើងវិញ។
ដំណើរការចុះឈ្មោះបោះឆ្នោតក្នុងបញ្ជីបោះឆ្នោតថ្មីឆ្នាំ២០១៧ និងការធ្វើបច្ចុប្បន្នភាពបញ្ជីបោះ ឆ្នោតឆ្នាំ២០១៦ មានរយៈពេល៧០ថ្ងៃ រាប់ចាប់ពីថ្ងៃទី១ ខែកញ្ញា ដល់ថ្ងៃទី៩ ខែវិច្ឆិកាឆ្នាំ២០១៧។
វិបត្តិនយោបាយដែលកើតឡើងជាច្រើនថ្ងៃខែ រួមមានការចាប់ខ្លួនមេដឹកនាំគណបក្សនយោបាយរួម មានលោក កឹម សុខា និងបណ្ដឹងរំលាយគណបក្សសង្គ្រោះជាតិ ព្រមទាំងការធ្វើវិសោធនកម្មច្បាប់ បោះឆ្នោតចំនួន៤ យ៉ាងតក់ក្រហល់ដោយក្រុមតំណាងរាស្ត្រ ៦៧រូប មកពីខាងបក្សកាន់អំណាច ដើម្បីបើកអោយមានការដកហូតអាសនៈរបស់បក្សប្រឆាំង ទៅចែកឲ្យក្រុមគណបក្សតូចៗនោះ បានបណ្ដាលឲ្យប្រជាពលរដ្ឋជាច្រើនសសម្ដែងការខកចិត្ត និងខ្លះទៀតព្រមានថានឹងមិនទៅចុះ ឈ្មោះបោះឆ្នោតទេ។
មជ្ឈដ្ឋានទូទៅ មើលឃើញថា ប្រសិនបើស្ថានភាពបែបនេះ នៅតែបន្ត នោះមានន័យថា ដំណើរការ ឆ្ពោះទៅរកការបោះឆ្នោតដោយសេរី កាន់តែរួមតូចដែរ។ ប្រជាពលរដ្ឋ គណបក្សនយោបាយ និងសហគមន៍អន្តរជាតិ សុទ្ធតែបានចាត់ទុកស្ថានភាពនយោបាយកាន់តែធ្ងន់ធ្ងរ និងអំពាវនាវជាបន្ត បន្ទាប់ឲ្យរដ្ឋាភិបាលជួយកែប្រែ ស្ថានភាពនយោបាយឲ្យល្អប្រសើរឡើងវិញ ដើម្បីធានាឲ្យបោះឆ្នោត នៅពេលខាងមុខប្រព្រឹត្តទៅ ដោយសេរី យុត្តិធម៌ត្រឹមត្រូវ និងអាចទទួលយកបានទាំងអស់គ្នា៕
