ចៅសង្កាត់អូរចារ ក្រុងបាត់ដំបង កញ្ញា ស៊ីន ចាន់ពៅរ៉ូហ្ស៊េត បានប៉ះពាក្យសម្ដីគ្នាជាមួយសមាជិកក្រុមប្រឹក្សានៃសង្កាត់នេះ មកពីគណបក្សប្រជាជនកម្ពុជា នៅក្នុងករណីមានគ្រឿងចក្រទៅកាយប្រឡាយនៅក្នុងសង្កាត់ ដោយពុំបានជូនដំណឹងទៅចៅសង្កាត់។
សមាជិកក្រុមប្រឹក្សាសង្កាត់បានរិះគន់ចៅសង្កាត់ស្ត្រីវ័យក្មេងមកពីគណបក្សប្រឆាំងថា ពុំបើកចិត្តទូលាយទទួលការចូលរួមអភិវឌ្ឍមូលដ្ឋាន ដ្បិតការកាយប្រឡាយនោះជាគម្រោងរបស់ អ្នកតំណាងរាស្ត្រគណបក្សប្រជាជនកម្ពុជា លោក ឈាង វុន។ ប៉ុន្តែចម្លើយនោះត្រូវនាងបដិសេធថានាងគ្រាន់តែចង់បានការជូនដំណឹង ដើម្បីងាយស្រួលបំពេញការងារ។
ចៅសង្កាត់អូរចារស្នើភាគីពាក់ព័ន្ធអោយជូនដំណឹងដល់អាជ្ញាធរ ពីការចូលរួមអភិវឌ្ឍមូលដ្ឋាន ដើម្បីអាជ្ញាធរអាចជួយសម្រួល និងមានរបាយការណ៍ជាក់លាក់ពីការរួមគ្នាអភិវឌ្ឍក្នុងមូលដ្ឋាន។
ចៅសង្កាត់អូរចារ កញ្ញា ស៊ិន ចាន់ពៅរ៉ូហ្ស៊េត លើកឡើងនៅទីតាំងដែលមានដាក់គ្រឿងចក្រកាយប្រឡាយនៅក្នុងសង្កាត់អូរចារថា កញ្ញាធ្លាប់បានទទួលការព្រមានពីអាជ្ញាធរក្រុង ចំពោះការអភិវឌ្ឍនានា ដែលនោះជាមូលហេតុ ដែលកញ្ញាទាមទារអោយមានការជូនដំណឹងពីគម្រោងអភិវឌ្ឍនានាក្នុងមូលដ្ឋាន។ កញ្ញាអះអាងថា មិនរារាំងការអភិវឌ្ឍឡើយគឺស្វាគមន៍ និងសហការមិនប្រកាន់គណបក្សឡើយ៖ «សុំអោយខាងលើទាំងអ្នកតំណាងរាស្ត្រ ថ្នាក់លើដែលគាត់តែងតែយកតួនាទី ឬមួយខាងខេត្ត ឬមួយខាងក្រុងអីហ្នឹង បើគាត់ចុះមកអីក្នុងមូលដ្ឋានអូរចារក៏ចុះទៅចុះ យើងអត់ដែលទៅរំខាន អត់ដែលទៅអី គ្រាន់តែថាអោយដំណឹងមកខាងសង្កាត់អូរចារផង ដើម្បីចូលរួមសម្របសម្រួល»។
នៅក្នុងវីដេអូដែលផ្សាយផ្ទាល់តាមហ្វេសប៊ុក(Facebook) របស់កញ្ញា ស៊ិន ចាន់ពៅរ៉ូហ្ស៊េត នៅព្រឹកថ្ងៃទី១៤ ខែ តុលា បង្ហាញថា កញ្ញាព្យាយាមស្វែងរកព័ត៌មានពីអ្នកដែលមានគម្រោងចុះទៅកាយប្រឡាយ។ សមាជិកក្រុមប្រឹក្សាមកពីគណបក្សប្រជាជនកម្ពុជាម្នាក់ គឺលោក វ៉ាន់ ចំណាន ពុំបានឆ្លើយប្រាប់ឡើយ ដោយរុញទៅអោយសួរក្រុមប្រឹក្សាមួយរូបទៀត។ លើសពីនេះក្រុមប្រឹក្សារូបនោះថែមទាំងបានរិះគន់ចៅសង្កាត់ថា ហាក់មិនសប្បាយចិត្តនឹងការចូលរួមអភិវឌ្ឍនៅពេលដែលពលរដ្ឋកំពុងសប្បាយចិត្ត។
ការជជែកដ៏តឹងសរសៃកដោយសម្ដីខ្លាំងៗ រវាង កញ្ញា ស៊ិន ចាន់ពៅរ៉ូហ្ស៊េត និង លោក វ៉ាន់ ចំណានបានបន្តជាច្រើននាទី ទើបក្រុមប្រឹក្សាមួយរូបទៀត លោក ឯម សុផល បានមកដល់ ហើយបានបញ្ជាក់ថា ការកាយប្រឡាយនោះជាគម្រោងរបស់អ្នកតំណាងរាស្ត្រ គណបក្សប្រជាជនកម្ពុជា លោក ឈាង វុន៖ «គ្រាន់តែ ឯកឧត្ដម ឈាង វុន គាត់ប្រាប់អោយជួយមើល គាត់ប្រាប់ថា បើមានចម្ងល់អីអោយទាក់ទងសួរគាត់។ គាត់គ្រាន់អោយខ្ញុំជួយមើលក្រែងប្រជាពលរដ្ឋមិនសុខចិត្តរឿងអី តែប្រជាពលរដ្ឋគាត់សុខចិត្តទាំងអស់ហើយ»។
ការជជែកវែកញែកបានបញ្ចប់ទៅនៅក្រោយពេល ដែលចៅសង្កាត់អូរចារ បានដឹងថានោះគឺជាគម្រោងរបស់តំណាងរាស្ត្រ។ ចៅសង្កាត់អូរចារ កញ្ញា ស៊ិន ចាន់ពៅរ៉ូហ្ស៊េត បានផ្ដាំផ្ញើទៅភាគីនានា ជាពិសេសលោក ឈាង វុន អោយផ្ដល់ដំណឹងដល់មូលដ្ឋានចំពោះគម្រោងអភិវឌ្ឍន៍។
មកដល់ពេលនេះនៅមិនទាន់មានការឆ្លើយតបពីអ្នកតំណាងរាស្ត្រគណបក្សប្រជាជនកម្ពុជា លោក ឈាង វុន នៅឡើយទេ។
កន្លងទៅលោក ឈាង វុន ជាញឹកញាប់បានចុះដល់មូលដ្ឋានខេត្តបាត់ដំបង និងធ្លាប់ប៉ះទង្គិចពាក្យសម្ដីជាមួយចៅសង្កាត់អូរចារកញ្ញា ស៊ិន ចាន់ពៅរ៉ូហ្ស៊េត ដែរក្នុងរឿងអភិវឌ្ឍន៍ដាក់លូបង្ហូរទឹកនៅក្នុងសង្កាត់នេះ ដោយលោក ឈាង វុន បានស្ដីបន្ទោសទៅចៅសង្កាត់បក្សប្រឆាំងរូបនេះ ថាអភិវឌ្ឍខុសបច្ចេកទេស និងគ្មានស្តង់ដារ។ ចៅសង្កាត់វ័យក្មេងរូបនេះត្រូវបានសាលាក្រុងបាត់ដំបងចេញលិខិតកោះហៅទៅព្រមានជាច្រើនលើករួចមកហើយដែរ ដោយសារស្ដីបន្ទោសឲ្យបំពេញការងារតាមបែបរដ្ឋបាលរបស់ក្រសួងមហាផ្ទៃ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំខេត្តបាត់ដំបងលោក យិន ម៉េងលី ធ្លាប់លើកឡើងថា អាជ្ញាធរពាក់ព័ន្ធគួរតែងាកមករកការពិភាក្សាគ្នាប្រសើរជាងការទម្លាក់កំហុស ទៅលើបុគ្គលម្នាក់ៗ ដើម្បីសម្របសម្រួលបំពេញការងារអោយមានប្រសិទ្ធភាពទៅតាមតម្រូវការរបស់ពលរដ្ឋ៕