ចៅសង្កាត់មកពីគណបក្សប្រឆាំង ដែលកំពុងកាន់តំណែងនៅរាជធានីភ្នំពេញបញ្ជាក់ថា ពួកគាត់ ខ្វល់ពីការធ្វើឯកសារ និងកង្វល់របស់ពលរដ្ឋនៅក្នុងមូលដ្ឋាន ជាជាងការរំលាយគណបក្សប្រឆាំង ដែលនាំឲ្យពួកគាត់អស់តំណែង។ ពួកគាត់ថា តំណែងនេះ មិនមែនជាកេរ្តិ៍មរតកដែលឪពុកម្ដាយ បន្សល់ទុកឲ្យទេ តែជាការផ្ដល់ឲ្យដោយពលរដ្ឋនៅក្នុងមូលដ្ឋានរបស់ពួកគេ។
ដំណើរការវិវត្តន៍នយោបាយ ឈានទៅរំលាយគណបក្សប្រឆាំង ដ៏មានប្រជាប្រិយភាពនៅកម្ពុជា ត្រូវបានគេឃើញថា បានដើរដល់សេណារីយ៉ូខិតរំលាយដោយបង្ខំហើយ។
ចៅសង្កាត់ទួលសង្កែទី១ លោក គ្រុយ សុខេមរិទ្ធ មកពីគណបក្សសង្គ្រោះជាតិ ប្រាប់ថា លោកគ្មានការព្រួយបារម្ភអំពីតំណែងជាចៅសង្កាត់ទេ ប៉ុន្តែលោកខ្វល់អំពីកង្វល់របស់ពលរដ្ឋនៅមូលដ្ឋាន ដែលបានបោះឆ្នោត ឲ្យលោកជាចៅសង្កាត់៖ «ខ្ញុំក៏មិនបានចាប់អារម្មណ៍ ហើយក៏មិនខ្វល់ដែរពីបញ្ហាបើសិនជារដ្ឋាភិបាល រំលាយគណបក្ស នេះជារឿងរបស់រដ្ឋាភិបាលហើយខ្ញុំគិតឃើញថា ខ្ញុំគិតឃើញថាខ្ញុំ តំណែងនេះ តួនាទីនេះគឺមិនមែនជាតំណែងរបស់ឪពុកម្ដាយខ្ញុំដែលទុកកេរ្តិ៍អោយខ្ញុំទេគឺជាប្រជាពលរដ្ឋដែរគាត់ជ្រើសរើសខ្ញុំអោយ ជាប់ជាចៅសង្កាត់នេះ ចំពោះរឿងអ្វីទៀតខ្ញុំមិនខ្វល់ហើយខ្ញុំមិនបានគិតថា អ្វីដែរមានបញ្ហាចំពោះខ្ញុំក៏ខ្ញុំអត់គិតដែរខ្ញុំដឹងថា ធ្វើការងារបម្រើផលប្រយោជន៍ប្រជាពលរដ្ឋ»។
ស្របពេលដែលស្ថានការណ៍នយោបាយកំពុងឡើងកម្ដៅ នៅឯមូលដ្ឋាន សង្កាត់ទួលសង្កែទី១ ក៏មានការធ្វើទុកបុកម្នេញ ដែលនាំឲ្យចៅសង្កាត់បក្សប្រឆាំងពិបាកធ្វើការងារបម្រើពលរដ្ឋ។
គណបក្សសង្គ្រោះជាតិបានរងនូវការរំលាយបក្ស គឺក្រោយពេលដែល លោកនាយករដ្ឋមន្ត្រី ហ៊ុន សែន ចោទ លោក កឹម សុខា បានក្បត់ជាតិ។ ដំណើរការនៃសេណារីយ៉ូ រំលាយបក្សប្រឆាំង ត្រូវបានអ្នកវិភាគមើលឃើញ នៅក្រោយការចោទមេបក្សប្រឆាំងដ៏មានឥទ្ធិពល ថា ក្បត់ជាតិ។
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា ធ្លាប់ប្រាប់អាស៊ីសេរីថា នៅក្រោយពេលមានការរំលាយបក្សប្រឆាំង តំណែងទាំងអស់របស់សកម្មជនបក្សប្រឆាំង នៅក្នុងស្ថាប័នរដ្ឋ នឹងត្រូវបញ្ចប់តួនាទីទាំងអស់ ចាប់រាប់ពីតំណែងសមាជិកព្រឹទ្ធសភា រដ្ឋសភា ក្រុមប្រឹក្សារាជធានី ខេត្ត ក្រុង ស្រុក ខណ្ឌ រហូត ដល់មេឃុំ ចៅសង្កាត់ និងក្រុមប្រឹក្សានៅតាមឃុំ-សង្កាត់ ទូទាំងប្រទេស។
ចៅសង្កាត់មកពីកូតាគណបក្សប្រឆាំងម្នាក់ទៀត នៅសង្កាត់បឹងទំពុនទី១ នៃខណ្ឌមានជ័យ គឺ លោក សូរ ស៊ឹមគារ ប្រាប់ថា លោកមិនបារម្ភអំពីការរំលាយបក្សប្រឆាំងនោះទេ។ រាល់ថ្ងៃលោកចៅសង្កាត់ ថា ព្រួយបារម្ភអំពីថវិកាសម្រាប់អភិវឌ្ឍន៍មូលដ្ឋាន ដូចជា ប្រព័ន្ធលូ និងផ្លូវ ដែលជាតម្រូវការរបស់ពលរដ្ឋតែប៉ុណ្ណោះ៖ «អ្វីដែរយើងបារម្ភគឺនៅតែបារម្ភអ្វីដែរបារម្ភខ្ពស់ គឺបារម្ភពីការបម្រើពលរដ្ឋអត់ទាន់តម្រូវការព្រួយបារម្ភ យ៉ាងមិចយើងអភិវឌ្ឍមូលដ្ឋានយើងដល់អ៊ីចឹងទៅ នៅតែបារម្ភហើយចំពោះដែលគេហៅថាសំណូមពរពីប្រជាពលរដ្ឋ អ្វីក៏ដោយដែលគាត់សំណូមពរធ្វើលូមួយខ្សែប្រវែងពីររយម៉ែត្រ យើងខ្វះថវិកា ដល់ពេលអ៊ីចឹងបារម្ភថា យើងដេកគិតថា យើងអាចរំពឹងថវិកាមកពីកន្លែងណា វាជាការព្រួយបារម្ភរបស់អ្នកតូច»។
កាលពីថ្ងៃទី៦ ខែតុលា មេធាវីមួយក្រុម តំណាងឲ្យក្រសួងមហាផ្ទៃ បានដាក់ពាក្យស្នើទៅតុលាការដើម្បីសុំរំលាយបក្សប្រឆាំង តាមសំណើរបស់គណបក្សគ្មានប្រជាប្រិយភាព២ គឺ គណបក្សយុវជនកម្ពុជា និងគណបក្សហ៊្វុនស៊ិនប៉ិច ក្រោមហេតុផលថា បក្សប្រឆាំងបានព្យាយាមជួយ លោក កឹម សុខា ដែលរដ្ឋាភិបាលចោទថា ក្បត់ជាតិ មុនមានសាលដីកាពីតុលាការ។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បាននិយាយនៅក្នុងបទសម្ភាសន៍ឲ្យវិទ្យុបាយ័ន ផ្សាយនៅថ្ងៃទី១១ តុលា ថា ការរំលាយគណបក្សប្រឆាំងនឹងធ្វើឲ្យលទ្ធិប្រជាធិបតេយ្យនៅកម្ពុជាកាន់តែរឹងមាំ។ ហេតុផលដែលធ្វើឲ្យប្រជាធិបតេយ្យរឹងមាំនោះ គឺ លោក ផៃ ស៊ីផាន បាននិយាយតាម លោក ហ៊ុន សែន គឺ រំលាយបក្សមួយក្នុងសភា ហើយយកកៅអីនោះ ទៅចែកឲ្យបក្សប្រាំទៀត នាំឲ្យក្នុងរដ្ឋសភា មានបក្សនយោបាយចំនួន៦៖ «គណបក្សសង្គ្រោះជាតិ មិនដែរគោរពនឹងអនុវត្តនៅរបបប្រជាធិបតេយ្យ សេរីពហុបក្សនោះទេ យើងអត់ដែរទេ គណបក្សនេះតែងតែយកនៅឥរិយាបថឈ្លានពាន ដែរមិនធ្វើការវាយប្រហារប្រឆាំងពហុអីជាមួយនឹងគណបក្សប្រជាជន អាណឹងដែរ ជាការមើលឃើញទាំងអស់គ្នាជាក់ស្ដែង»។
ពលរដ្ឋចាត់ទុកការចែកអាសនៈរបស់បក្សប្រឆាំងក្នុងរដ្ឋសភា ជាទង្វើមិនខ្មាសអៀន របស់គណបក្សកាន់អំណាច និងជាការប្លន់សំឡេងឆ្នោតរបស់ពលរដ្ឋ។
អ្នករត់ម៉ូតូឌុប នៅក្រុងភ្នំពេញម្នាក់ ឈ្មោះ ហៃ ម៉េងគីម យល់ថា ចេតនារបស់គណបក្សកាន់អំណាច ដែលចង់រំលាយបក្សប្រឆាំងនៅគ្រានេះ អ្នកដែលរងគ្រោះ គឺប្រជាពលរដ្ឋខ្មែរតែប៉ុណ្ណោះ។ លោកសម្ដែងការសោកស្ដាយ ដែលអ្នកកាន់អំណាចបានសុខចិត្ដបណ្ដោយឲ្យពលរដ្ឋរងគ្រោះ ដើម្បីរក្សាអំណាច ក្រុមគ្រួសារ និងបក្សពួកខ្លួន៖ «វាជះឥទ្ធិពលខ្លះណាស់សម្រាប់ប្រជាពលរដ្ឋទាំងមូល គឺគណបក្សប្រជាជន ធ្វើអីធ្វើតាមអំពើចិត្តដែលខ្លួននឹកឃើញនឹកចង់ធ្វើចង់រំលាយគណបក្សសង្គ្រោះជាតិ គឺដូចថាធ្វើ បាបធ្វើអោយប្រជាពលរដ្ឋរងទុក្ខវេទនា និងគណបក្សប្រជាជន តែម្ដងក្នុងអារម្មណ៍របស់ខ្ញុំ ថារំលាយគណបក្សសង្គ្រោះជាតិ គឺចំពោះខ្ញុំម្នាក់ដូចអស់សង្ឃឹមក្នុងជីវិត»។
ពលរដ្ឋម្នាក់ទៀត អាយុជាង ៧០ឆ្នាំ ឈ្មោះ ច័ន្ទ សុផាត យល់ថា ការរំលាយបក្សប្រឆាំង នឹងមិនប៉ះពាល់ដល់រូបលោកទេ ព្រោះលោកចាស់ណាស់ទៅហើយ។ ប៉ុន្តែលោកបារម្ភអំពីជោគវាសនារបស់យុវជន និងពលរដ្ឋកម្ពុជាគ្រប់រូប៖ «វាមិនគួរមានបក្សណាទៅសង្កត់សង្កិនគណបក្សណារំលាយនឹងវាគ្មាន បើតាមខ្ញុំយល់ នឹងវាគ្មាន បើតាមខ្ញុំយល់ខ្លួនខ្ញុំម៉ងភាសាដែរ មានការចោទប្រកាន់ខ្លះពីអំពើដែរស្អីៗណាក្បត់ជាតិ អានឹងគឺថាធ្ងន់ធ្ងរណាស់ ប្រជាពលរដ្ឋក៏អាចយល់ដឹងណាស់ទូទៅហើយប្រជាពលរដ្ឋក៏យល់ដឹងដែរយល់ដឹងថា ក្នុងសង្គមប្រជាធិបតេយ្យ វាតែងតែមានបក្សរួមហើយហើយមតិក៏ចម្រុះដែរពហុមតិ តែងតែមានអ្នកថាអ្នករិះគន់ដែរអីចឹង ហើយខ្ញុំយល់ថាបើយើងថាយើងរិះគន់បានទើបប្រទេសជាតិរីកចម្រើន»។
បើទោះជាអ្នកនយោបាយនៅខាងបក្សកាន់អំណាច មិនមានការព្រួយបារម្ភអំពីស្ថានការណ៍វិបត្តិរបស់កម្ពុជា នៅក្រោយការរំលាយបក្សប្រឆាំងក៏ដោយ ប៉ុន្តែសម្រាប់ពលរដ្ឋ អ្នកនយោបាយជើងចាស់ អ្នកវិភាគ និងសហគមន៍អន្តរជាតិ បារម្ភថា កម្ពុជានឹងត្រូវតែលតោល ដោយអន្តរជាតិ ឈប់រាប់អាន ឬត្រូវរងវិបត្តិសេដ្ឋកិច្ច ដែលនាំឲ្យពលរដ្ឋនៅក្នុងប្រទេសក្រីក្រមួយនេះ កាន់តែលំបាក ហើយសោយសុខតែក្រុមបក្សពួករបស់អ្នកកាន់អំណាចនៃប្រទេសនេះ៕