Clik here to view.
ប្រជាពលរដ្ឋ និងក្រុមប្រឹក្សាឃុំខ្នាចរមាស ស្រុកបវេល ខេត្តបាត់ដំបងមកពីគណបក្សសង្គ្រោះជាតិ កំពុងព្រួយបារម្ភពីអាជ្ញាធរមូលដ្ឋាន និងសកម្មជនគណបក្សប្រជាជនកម្ពុជា ដែលចុះសួរពលរដ្ឋតាមផ្ទះពួកគាត់ថា បោះឆ្នោតឲ្យគណបក្សណានៅពេលខាងមុខ។
ទាក់ទងនឹងបញ្ហានេះអាជ្ញាធរភូមិនៅឃុំខ្នាចរមាសម្នាក់អះអាងថា ការសាកសួរនេះ គឺធ្វើតាមបញ្ជារបស់មន្ត្រីថ្នាក់លើ ដើម្បីចង់ដឹងពីចំនួនពិតប្រាកដអ្នកដែលបោះឆ្នោតឲ្យគណបក្សប្រជាជនកម្ពុជា។
ទាំងប្រជាពលរដ្ឋមន្ត្រីបក្សប្រឆាំងនៅឃុំខ្នាចរមាស និងមន្ត្រីសង្គមស៊ីវិល ហៅការចុះស្រង់ឈ្មោះពលរដ្ឋនៅមុនការបោះឆ្នោតដោយអាជ្ញាធរនេះ គឺជារឿងមិនត្រឹមត្រូវឡើយ។
ពលរដ្ឋម្នាក់សុំមិនឲ្យបញ្ចេញឈ្មោះ រស់នៅភូមិកោះរាម ឃុំខ្នាចរមាស ឲ្យដឹងនៅថ្ងៃទី៨ តុលា ថា សកម្មជនគណបក្សប្រជាជនកម្ពុជា និងអនុប្រធានភូមិមានគ្នាប្រមាណ៣នាក់បានមកសាកសួររូបគាត់ដល់ផ្ទះ កាលពីថ្ងៃទី៤ តុលា ដោយសុំរូបថតពួកគាត់ដែលគ្រប់អាយុបោះឆ្នោត ហើយសួរថាការបោះឆ្នោតនៅពេលខាងមុខតើបោះឲ្យគណបក្សប្រជាជនកម្ពុជា ឬគណបក្សណា។
ពលរដ្ឋរូបនេះបន្តថា រូបគាត់ មិនបោះឆ្នោតឲ្យគណបក្សប្រជាជនកម្ពុជាទេ ក្រោយមកសកម្មជនគណបក្សកាន់អំណាចក៏នាំគ្នាដើរចេញទៅវិញ៖ បើតាមគំនិតខ្ញុំ មិនដឹងគាត់យករូបថតរបស់ខ្ញុំធ្វើស្អី និងក្នុងគោលបំណងអ្វីនោះទេ។ ម្យ៉ាងការធ្វើដូច្នេះវាហាក់ដូចជាការមកបង្ខិតបង្ខំខ្ញុំឲ្យបោះឆ្នោតទៅគណបក្សកាន់អំណាច ព្រោះខ្ញុំមិនទាន់សម្រេចចិត្តបោះឆ្នោតឲ្យគណបក្សណាមួយនៅឡើយ»។
ឆ្លើយតបនឹងបញ្ហានេះ អនុប្រធានភូមិកោះរាម លោក ទិត្យ ម៉ៅ មានប្រសាសន៍ថា លោកពិតជាបាននាំក្រុមការងារគណបក្សប្រជាជនកម្ពុជាចុះសាកសួរពលរដ្ឋពីទៅបោះឆ្នោត នៅពេលខាងមុខប្រាកដមែន។ ប៉ុន្តែលោកអះអាងថា ការសាកសួរនេះគឺគ្រាន់តែចង់ដឹងពីចំនួនពិតប្រាកដរបស់អ្នកដែលបោះឆ្នោតឲ្យគណបក្សប្រជាជនកម្ពុជា ដើម្បីរៀបចំធ្វើសៀវភៅគ្រួសារជូនពួកគាត់៖ «មានថ្នាក់ភូមិ ថ្នាក់ស្រុកនិងខេត្តក៏បានចុះមកជាមួយដែរ ដោយពួកគាត់ប្រើឲ្យខ្ញុំធ្វើ។ ការសួរនាំនេះ បើសួរគាត់ទៅគាត់ថាគណបក្សសង្គ្រោះជាតិ យើងមិនស្រង់ឈ្មោះគាត់ទេ គឺសួររកអ្នកដែលជាសមាជិកគណបក្សប្រជាជនកម្ពុជាតែប៉ុណ្ណោះ»។
ចំណែកក្រុមប្រឹក្សាឃុំខ្នាចរមាស មកពីគណបក្សសង្គ្រោះជាតិលោក រៀល មុនី អះអាងថា លោកព្រួយបារម្ភយ៉ាងខ្លាំង ចំពោះសកម្មភាពរបស់អាជ្ញាធរមូលដ្ឋាន និងសកម្មជនជនគណបក្សកាន់អំណាច ដែលបានដើរបញ្ចុះបញ្ចូលប្រជាពលរដ្ឋតាមភូមិ ដើម្បីឲ្យចូលជាសមាជិកគណបក្សរបស់ពួកគេ។ លោក ហៅទង្វើនេះថា ជាការធ្វើឲ្យប្រជាពលរដ្ឋភ័យខ្លាច៖ «ការដែលអាជ្ញាធរចុះទៅនោះ គឺចុះគ្រប់ទីកន្លែងតែម្ដង ដោយគាត់សួរគេថាបោះឆ្នោតឲ្យអ្នកណា? ហើយបានប្រាប់ពលរដ្ឋថាធ្វើសៀវភៅគ្រួសារចូលជាមួយគេទៅក្រែងពេលចែកអំណោយអីមិនប៉ះទៅលើគណបក្សគេផ្សេង»។
ទាក់ទងនឹងបញ្ហានេះមន្ត្រីស៊ើបអង្កេតជាន់ខ្ពស់អង្គការខុមហ្វ្រែល (Comfrel) លោក កន សាវាង្ស មានប្រសាសន៍ថា អាជ្ញាធរភូមិនាំសកម្មជនគណបក្សប្រជាជនកម្ពុជាសាកសួរពលរដ្ឋពីការបោះឆ្នោតនេះ ចាត់ជាការគំរាមកំហែងមួយដល់ប្រជាពលរដ្ឋក្នុងការបោះឆ្នោតដោយខុសច្បាប់ ព្រោះធ្វើឲ្យពួកគាត់ភ័យខ្លាច និងមិនអាចរក្សាការសម្ងាត់បានឡើយ៖ «ករណីនេះពួកគាត់អាចប្ដឹងទៅអាជ្ញាធរមូលដ្ឋាន ឬក៏ប្ដឹងទៅគណៈកម្មការរៀបចំការបោះឆ្នោតនៅតាមឃុំ-សង្កាត់ក៏បាន ដោយប្រាប់គេថាការធ្វើបែបនេះធ្វើឲ្យពួកខ្ញុំមានការព្រួយបារម្ភហើយ»។
លោក រៀល មុនី ឲ្យដឹងថា សកម្មជនគណបក្សកាន់អំណាចធ្វើយុទ្ធនាការ ស្រង់ឈ្មោះពលរដ្ឋដែលបោះឆ្នោតឲ្យគណបក្សរបស់ខ្លួននេះ ធ្វើនៅគ្រប់ភូមិក្នុងឃុំខ្នាចរមាស ហើយសកម្មភាពមួយនេះនៅតែបន្តមិនទាន់ឈប់នៅឡើយ។
លោក កន សាវាង្ស ថា សមត្ថកិច្ចអនុវត្តច្បាប់នៅកម្ពុជាមិនស្មើភាពគ្នាទេ។ លោកប្រៀបធៀបករណីសកម្មជនបក្សប្រជាជនកម្ពុជា និងអាជ្ញាធរមូលដ្ឋាន ដើរសួរអ្នកភូមិនៅខេត្តបាត់ដំបងនេះថា បោះឆ្នោតអោយបក្សណា ទៅនឹងករណីតុលាការខេត្តរតនគិរី ដំណើរក្ដីទៅលើអ្នកយកព័ត៌មានរបស់កាសែត ឌឹ ខេមបូឌា ដេលី (The Cambodia Daily) កាលពីមុនបោះឆ្នោតឃុំសង្កាត់កន្លងទៅ។ ករណីនេះ ថ្មីៗ តុលាការបានចោទប្រកាន់អ្នកទាំងពីរពីបទញុះញង់ ឲ្យប្រព្រឹត្តបទឧក្រិដ្ឋ បន្ទាប់ពីពួកគេទាំងពីរបានសួរនាំអ្នកភូមិទាក់ទងនឹងការបោះឆ្នោតអោយគណបក្សណា។
អតីតអ្នកកាសែត ខេមបូឌា ដេលី ២រូបនោះ គឺលោក ស៊ុមប័រ ភីធ័រ (Zsombor Peter) និង លោក អូន ភាព កាលពី៥ខែមុន បានចុះសម្ភាសន៍ពលរដ្ឋក្នុងឃុំប៉ាតេ ស្រុកអូរយ៉ាដាវ ខេត្តរតនគិរី ជុំវិញការបោះឆ្នោតក្រុមប្រឹក្សាឃុំ-សង្កាត់ ក្នុងបំណងសិក្សាស្រាវជ្រាវ ៕