ក្រុមអ្នកតំណាងរាស្ត្រគណបក្សសង្គ្រោះជាតិ និងសមាជិកសភាមួយក្រុមបាននាំគ្នាទៅខាងមុខមន្ទីរអប់រំកែប្រែទី៣ ឬហៅថាពន្ធនាគារត្រពាំងផ្លុង នៅព្រឹកថ្ងៃច័ន្ទទី២ ខែ តុលា ក្នុងបំណងទៅសួរសុខទុក្ខ ប្រធានគណបក្សប្រឆាំង លោក កឹម សុខា ប៉ុន្តែត្រូវរារាំងដោយកងកម្លាំងនគរបាល។
នៅក្នុងឃ្លីបវីដេអូ ដែលត្រូវគេបង្ហោះតាមបណ្ដាញសង្គមហ្វេសប៊ុក (Facebook) តំណាងរាស្ត្រមណ្ឌលកំពង់ស្ពឺ លោក សួន រីដា ដែលដឹកនាំក្រុមមានប្រសាសន៍នៅចំពោះមុខក្រុមកងកម្លាំងដែលត្រូវដាក់អោយរារាំងដំណើរទៅសួរសុខទុក្ខនោះថា ក្រុមរបស់លោក មានបំណងចូលសួរសុខទុក្ខ លោក កឹម សុខា ប៉ុន្តែមិនត្រូវបានចៅក្រមស៊ើបសួរសាលាដំបូងរាជធានីភ្នំពេញអនុញ្ញាតទេ។ លោក ក៏បានថ្លែងទៅរកក្រុមនគរបាលដែរ ប៉ុន្តែក៏ត្រូវក្រុមកងកម្លាំងទាំងនោះស្រែកបណ្ដេញមកវិញ។
ប្រធានគណបក្សសង្គ្រោះជាតិ លោក កឹម សុខា ត្រូវអាជ្ញាធរចាប់ខ្លួន និងនាំ ទៅឃុំនៅពន្ធនាគារត្រពាំងផ្លុងកាលពីរំលងអធ្រាត្រឈានចូលថ្ងៃ ទី ៣ ខែ កញ្ញា ដោយត្រូវចោទប្រកាន់ពីអំពើក្បត់ជាតិ។
គិតដល់ពេលនេះមានរយៈពេល៣០ថ្ងៃហើយដែល លោក កឹម សុខា បានជាប់ឃុំហើយសាលាដំបូងរាជធានីភ្នំពេញ បានបដិសេធសំណើចូលសួរសុខទុក្ខ ពីក្រុមតំណាងរាស្ត្របក្សប្រឆាំងជាលើកទី៣ហើយដែរ។ ចៅក្រមស៊ើបសួរសាលាដំបូងរាជធានីភ្នំពេញ លោក គឺ ឫទ្ធី បានចេញលិខិតជម្រាបជូនលោក សួន រីដា ដោយលើកហេតុផលថា សំណុំរឿង លោក កឹម សុខា កំពុងស្ថិតនៅក្នុងចំណាត់ការស៊ើបសួរ និងស្រាវជ្រាវប្រមូលភស្តុតាងនានា ហើយចៅក្រមមិនទាន់បានសាកសួរជនត្រូវចោទនៅឡើយ ហេតុនេះការចូលជួប ឬសួរសុខទុក្ខ អាចអនុញ្ញាត ឲ្យបានតែមេធាវី និងក្រុមគ្រួសារជនត្រូវចោទ ដែលមិនទាក់ទិនក្នុងសំណុំរឿងតែប៉ុណ្ណោះ។ សម្រាប់អ្នកដទៃផ្សេងទៀត ការចូលសួរសុខទុក្ខ អាចអនុញ្ញាតឲ្យបាន ក្រោយពីចៅក្រមបានបំពេញកិច្ចចាំបាច់មួយចំនួនសិន។
បើទោះជាយ៉ាងណាក្រុមអ្នកតំណាងរាស្ត្រគណបក្សសង្គ្រោះជាតិ បានកំណត់អំពីផែនការទៅសួរសុខទុក្ខលោក កឹម សុខា នៅរៀងរាល់ថ្ងៃច័ន្ទដើមសប្ដាហ៍ ទោះបីជាតុលាការមិនអនុញ្ញាតក្ដី។ ពួកគេថាយ៉ាងហោចណាស់ពួកគេបានទៅដល់មុខពន្ធនាគារត្រពាំងផ្លុង ដើម្បីសម្ដែងមតិជំទាស់នឹងការចាប់ខ្លួន លោក កឹម សុខា ទាំងមានអភ័យឯកសិទ្ធិនេះ៕