Clik here to view.
អ្នកជំនាញផ្នែកច្បាប់ព្រហ្មទណ្ឌ យល់ឃើញថា ចង់រំលាយគណបក្សណាមួយ វាមិនមែនជាការងាយទេ។ ការរំលាយគណបក្សនយោបាយណាមួយទៅបាន លុះត្រាមានសំណើសុំឲ្យរំលាយដោយក្រសួងមហាផ្ទៃ ទៅតុលាការកំពូល។ ការបញ្ជាក់ដូចនេះ របស់អ្នកច្បាប់ ស្របពេលគណបក្សប្រឆាំង ត្រូវរងការគំរាមកំហែងពីបក្សនយោបាយចំនួន២ គ្រោងនឹងដាក់បណ្ដឹងទៅតុលាការកំពូលខាងមុខនេះ ដើម្បីស្នើតុលាការរំលាយគណបក្សសង្គ្រោះជាតិចេញពីបញ្ជីឈ្មោះគណបក្សនយោបាយ។
អតីតមេធាវីការពារក្ដីឲ្យជួប សម្លាប់ គឺលោក យុង ផានិត អះអាងថា ថ្វីបើក្នុងនីតិវិធីច្បាប់ បានបើកផ្លូវឲ្យពលរដ្ឋគ្រប់រូប អាចមានសិទ្ធិតាំងខ្លួនធ្វើជាដើមបណ្ដឹងយ៉ាងណាក្តី ក៏សំណុំរឿងខ្លះ ប្រជាពលរដ្ឋទូទៅ នៅតែមិនអាចធ្វើជាដើមបណ្ដឹងបានទេ ព្រោះទាក់ទងនឹងផលប្រយោជន៍ និងសមត្ថភាពរបស់ពួកគេ ដែលពុំមានប្រយោជន៍នៅក្នុងរឿងក្ដីដែលត្រូវប្ដឹងហ្នឹងទេ គឺពុំអាចដើរតួជាដើមបណ្ដឹងបានឡើយ។
ការបញ្ជាក់ដូចនេះរបស់លោក យុង ផានិត ស្របពេលដែលគណបក្សហ៊្វុនស៊ិនប៉ិច របស់សម្ដេចក្រុមព្រះ នរោត្តម រណឫទ្ធិ និងគណបក្សយុវជនកម្ពុជារបស់លោក ពេជ្រ ស្រស់ រៀបចំដាក់បណ្ដឹងទៅតុលាការកំពូល មុនក្រោយគ្នាមួយថ្ងៃ ស្នើឲ្យរំលាយបក្សប្រឆាំង។ បើទោះជាបែបណា អ្នកជំនាញផ្នែកច្បាប់ព្រហ្មទណ្ឌរូបនេះ យល់ឃើញថា វាពិតជាមានភាពស្មុគស្មាញ និងរឹតតែមិនអាចទៅរួចថែមទៀតផង ប្រសិនបើភាគីដែលតាំងខ្លួនជាដើមបណ្ដឹងនោះ ពុំមានជាប់ទិនក្នុងហេតុផលណាមួយ ជាមួយនិងភាគីដែលខ្លួនត្រូវប្ដឹងនោះទេ។ លោក យុង ផានិត បន្តថា ផ្អែកនីតិវិធី អ្នកដែលអាចមានសិទ្ធិប្ដឹងសូមឲ្យតុលាការកំពូល រំលាយបក្សនយោបាយណាមួយទៅបាន គឺមានតែក្រសួងមហាផ្ទៃ ឬរដ្ឋាភិបាលប៉ុណ្ណោះ។
នៅពេលនេះ ទាំងគណបក្សរាជានិយមហ៊្វុនស៊ិនប៉ិច និងគណបក្សយុវជនកម្ពុជា បានប្រកាសជំហរដូចគ្នាថា នឹងរៀបចំបណ្ដឹងទៅតុលាការកំពូល ដើម្បីស្នើសុំឲ្យតុលាការ រំលាយបក្សសង្គ្រោះជាតិ ចេញពីបញ្ជីឈ្មោះគណបក្សនយោបាយ។ មន្ត្រីនយោបាយទាំងពីរគណបក្សនេះ ចោទប្រកាន់ថា លោក កឹម សុខា ក្បត់ជាតិ ហេតុនេះជាចាំបាច់ត្រូវស្នើឲ្យតុលាការត្រូវរំលាយបក្សប្រឆាំងនេះចេញ មិនអាចទុកតទៅទៀតបានឡើយ។
យ៉ាងនេះក្ដីលោក យុង ផានិត ដែលជាមេធាវីជំនាញផ្នែកច្បាប់ព្រហ្មទណ្ឌ មិនបដិសេធទេគឺ ពលរដ្ឋអាចមានសិទ្ធិតាំងខ្លួនជាដើមបណ្ដឹងបានពិតមែន ប៉ុន្តែបណ្ដឹងដែលដាក់ទៅតុលាការកំពូលនោះ គ្រាន់តែជាបណ្ដឹងបរិហារកេរ្តិ៍ប៉ុណ្ណោះ ពោលមិនមែនជាប្រភេទបណ្ដឹងចំពោះមុខដូចរដ្ឋាភិបាល ឬ ក្រសួងមហាផ្ទៃឡើយ ដែលចាំបាច់ត្រូវទាមទារឲ្យតុលាការ បើកការស៊ើបអង្កេតជាមុនសិន មុននឹងកំណត់ថា ខុស ឬត្រូវ។
អាស៊ីសេរី ពុំអាចសុំប្រតិកម្មក្នុងរឿងនេះ ពីមន្ត្រីគណបក្សសង្គ្រោះជាតិបានទេ នៅថ្ងៃទី១ ខែតុលា។យ៉ាងនេះក្ដីលោក សួន រីដា សមាជិកសភារបស់បក្សប្រឆាំង បានបង្ហោះលើបណ្ដាញសង្គមរបស់ខ្លួនដោយហៅយុទ្ធនាការ ចង់កម្ចាត់បក្សសង្គ្រោះជាតិនេះថា នេះជារបៀបបក្សនយោបាយ ដែលមិនជោគជ័យ។ ផ្ទុយទៅវិញ ចរន្តនយោបាយនេះ រឹតតែធ្វើឲ្យបក្សប្រឆាំង មានការគាំទ្រ រឹងមាំ និងខ្លាំងជាងមុនថែមទៀតផង។
ក្នុងពេលសម្ដេចក្រុមព្រះ នរោត្តម រណឫទ្ធិ ប្រកាសជំហរចូលរួម ទាត់គណបក្សប្រឆាំង ចេញពីឆាកនយោបាយ ដូចគណបក្សលោក ពេជ្រ ស្រស់ ដែរនោះ មានការរិះគន់ជាបន្តបន្ទាប់ នៅលើបណ្ដាញសង្គមហ្វេសប៊ុក (Facebook)។ អ្នកខ្លះពាប់ជ្រាយថា គណបក្សយុវជនកម្ពុជាបង្កើតឡើង មិនចេះធ្វើអ្វី ក្រៅពីដើរប្ដឹងប៉ុណ្ណោះ។ លើសពីនេះទៀត អ្នកនយោបាយទាំងពីរគណបក្សនេះ រងការចោទថាជាកូនអុក និងជាអាយ៉ងចាំបម្រើផលប្រយោជន៍ឲ្យលោកនាយករដ្ឋមន្ត្រី ហ៊ុន សែន និង បក្សកាន់អំណាចតែប៉ុណ្ណោះ។
ស្របពេលនេះដែរ អ្នកអង្គម្ចាស់ស៊ីសុវត្ថិ ចក្រីនុពល ត្រូវបានបណ្ដាញសង្គមចុះផ្សាយ អំពីសាររិះគន់របស់ទ្រង់ ចំពោះការសម្រេចចិត្តរបស់សម្ដេចក្រុមព្រះ នរោត្តម រណឫទ្ធិ នៅថ្ងៃទី១ តុលា ថា នេះ ជាការបញ្ចប់ជីវិតនយោបាយ សម្រាប់សែរាជវង្ស ដែលនៅសេសសល់ចុងក្រោយ នៅក្នុងដៃរបស់សម្រេចក្រុមព្រះ នរោត្តម រណឫទ្ធិ។ ជាងនេះទៀត ការដើរនយោបាយរបស់សម្ដេច ក្រុមព្រះមួយជំហានចុងក្រោយនេះ បានធ្វើឲ្យអាប់ឱន និងប៉ះពាល់យ៉ាងធ្ងន់ធ្ងរ ដល់ស្ថាប័នព្រះមហាក្សត្រ៕
