កិច្ចពិភាក្សាកំណត់ប្រាក់ឈ្នួលកម្មករសម្រាប់ឆ្នាំ២០១៨ កាលពីថ្ងៃទី២៥ ខែកញ្ញា នោះ នៅតែស្ថិត ក្នុងភាពចម្រូងចម្រាសនៅឡើយ។
ភាពចម្រូងចម្រាសនោះត្រង់ថា ឆ្លងកាត់កិច្ចប្រជុំច្រើនលើកមកហើយ ភាគីពាក់ព័ន្ធ មានតំណាងកម្មករ ថៅកែរោងចក្រ និងតំណាងរដ្ឋាភិបាល នៅតែមិនទាន់អាចសម្រេចជ្រើសរើសយកតួលេខរួមមួយក្នុងការដំឡើងប្រាក់ខែកម្មករបាននៅឡើយទេ។
ប្រធានសហភាពការងារកម្ពុជា លោក អាត់ ធន់ ដែលបានចូលរួមប្រជុំ ថ្លែងថា ភាគីដែលចូលរួមជជែកពិភាក្សាគ្នានេះ បានលើកយកតួលេខផ្សេងៗគ្នា និងប្រកាន់យកគោលជំហររៀងខ្លួន ដែលមិនអាចឈានដល់ការកំណត់យកតួលេខរួមមួយបាន។
លោក អាត់ ធន់បានឲ្យដឹងថា ក្រុមភាគីតំណាងកម្មករ ធ្លាប់បានប្រជុំពិភាក្សាគ្នា ដើម្បីកំណត់ប្រាក់ឈ្នួល សម្រាប់កម្មករអាចរស់នៅបានសមរម្យ មុនពេលដែលលើកយកតួលេខនេះ ទៅពិភាក្សាគ្នាជាមួយនឹងភាគីរោងចក្រ និងភាគីរាជរដ្ឋាភិបាល។
ក្នុងកិច្ចប្រជុំកំណត់ប្រាក់ឈ្នួលកម្មករ ភាគីនីមួយៗបានរកឃើញតួលេខរៀងៗខ្លួន។ចំណែកភាគីនិយោជក បានលើកសំណើដំឡើងប្រាក់ឈ្នួល កម្មករចំនួន ៥.៣ភាគរយ ដែលស្មើនឹងប្រាក់ ១៦១ ដុល្លារសហរដ្ឋអាមេរិក ដោយសំអាងទៅលើកត្តាទីផ្សារប្រកួតប្រជែង។ ដោយឡែក ភាគីក្រសួងអះអាងថា លទ្ធភាពដែលអាចដំឡើងបានគឺចំនួន ៦.៣២ភាគរយ ដែលស្មើនឹង ១៦២.៦៧ដុល្លារសហរដ្ឋអាមេរិក។
កិច្ចពិភាក្សានេះ បានរំសាយទៅវិញ នៅម៉ោងប្រមាណ២រសៀលថ្ងៃដដែល ដោយមិនទាន់មានលទ្ធផល ហើយភាគីទាំងអស់បានសម្រេចលើកពេលជជែកគ្នាជាថ្មីម្ដងទៀត នៅថ្ងៃទី២៩ ខែកញ្ញា។
ទាក់ទងនឹងការដំឡើងប្រាក់ឈ្នួលកម្មករនេះដែរ កាលពីថ្ងៃទី២០ ខែសីហា លោកនាយករដ្ឋមន្ត្រីហ៊ុន សែន បានប្រកាសនៅលើបណ្ដាញសង្គមហ្វេសប៊ុក (Facebook) ថា ប្រាក់ខែរបស់កម្មករនៅឆ្នាំ ២០១៨ តិចបំផុត គឺអាចនឹងឡើងដល់ ១៦៨ដុល្លារ ក្នុងមួយខែ ដោយបូករួមជាមួយនឹងអត្ថប្រយោជន៍ផ្សេងៗទៀត។
ទោះយ៉ាងណាប្រធានសហភាពការងារកម្ពុជា លោក អាត់ ធន់ បញ្ជាក់ថា តួលេខដែលលោកនាយករដ្ឋមន្ត្រី ហ៊ុន សែន ប្រកាសនេះ មិនមែនជាតួលេខផ្លូវការនោះទេ ហើយការកំណត់ប្រាក់គោលពីតំណាងរដ្ឋាភិបាល ក៏មិនបានយកតាមការប្រកាសរបស់លោក ហ៊ុន សែន តាមហ្វេសប៊ុក កាលពីពេលថ្មីៗនោះដែរ។
របាយការណ៍រដ្ឋាភិបាលបង្ហាញថា គិតត្រឹមដំណាច់ឆ្នាំ២០១៦ ប្រទេសកម្ពុជា មានរោងចក្រផ្នែកឧស្សាហកម្មតម្បាញ កាត់ដេរ សំលៀកបំពាក់ និងផលិតស្បែកជើងជាង ១ពាន់ (១.០៧៩) និងមានកម្លាំងពលកម្មបម្រើការក្នុងវិស័យនេះជិត ៨សែននាក់។ ដោយឡែកប្រាក់ខែគោលរបស់កម្មករក្នុងឆ្នាំ២០១៧ គឺចំនួន ១៥៣ដុល្លារក្នុងមួយខែ។
គិតចាប់ពីដើមខែសីហា រហូតមកដល់ពេលនេះ ករណីកម្មការិនីរោងចក្របម្រើការក្នុងវិស័យកាត់ដេរបានដួលសន្លប់ និងស្លាប់ស្ទើរបន្តកន្ទុយគ្នា។ កាលពីថ្ងៃទី៣ សីហា កម្មការិនីកាត់ដេរម្នាក់នៅក្នុងរោងចក្រ យ៉ាកជីន (Yakjin) ក្នុងខេត្តកំពង់ស្ពឺ ឈ្មោះ មាស ស្រីល័ក្ខ ក៏បានដួលសន្លប់ និងស្លាប់ បន្ទាប់ពីធ្វើការថែមម៉ោង។ ចំណែកនៅរាជធានីភ្នំពេញវិញ កម្មការិនីចំនួន ១០៦នាក់នៅរោងចក្រ ញ៉ូវ អរេន ខេមបូឌា ហ្គាមិន (New Orient) និងកម្មការិនីចំនួន ៩នាក់នៅរោងចក្រ លូស៊ីដា កម្ពុជា (Lucida Cambodia Enterprise Co., Ltd) ដែលរោងចក្រទាំងពីរនេះស្ថិតនៅម្ដុំផ្លូវវ៉េងស្រេង ក្នុងសង្កាត់ចោមចៅ ក៏បានដួលសន្លប់ផ្ទួនៗដែរ។ ករណីចុងក្រោយ គឺនៅព្រឹកថ្ងៃទី១៩ សីហា នៅរោងចក្រ ខេបូយូនិសូល អិល.ធី.ឌី (Cambounisol Ltd) ស្ថិតក្នុងស្រុកខ្សាច់កណ្ដាល ខេត្តកណ្ដាល មានកម្មការិនីម្នាក់ទៀតឈ្មោះ ហៅ ស្រីនាត បានដួលសន្លប់បាត់ស្មារតី ហើយក្រោយមកបានស្លាប់ភ្លាមៗនៅពេលកំពុងបញ្ជូនទៅកាន់មន្ទីរពេទ្យព្យាបាល។ ករណីដួលសន្លប់ និងស្លាប់ជាបន្តបន្ទាប់នេះ គេសង្ស័យថាអាចដោយសារការហូបចុកអាហារគ្មានជីវជាតិ ធ្វើការលើសកម្លាំង ព្រមទាំងរោងចក្រគ្មានបរិយាកាសល្អ និងគ្មានស្តង់ដារជាដើម៕