ថ្វីបើមានការវិវត្តន៍ផ្នែកបច្ចេកវិទ្យាយ៉ាងណាក្ដី មកទល់នឹងពេលនេះមាតាបិតា និងជីដូនមួយចំនួន នៅតែប្រព្រឹត្តឥរិយាបថតាមទំនៀមទម្លាប់ និងជំនឿតៗដោយច្របាច់ក្បាលសុដន់របស់ទារកអាយុ ក្រោម ១ខែ។
តើការប្រព្រឹត្តបែបនេះជាការត្រឹមត្រូវដែរ ឬទេ និងមានផលប៉ះពាល់អ្វីខ្លះ?
គ្រូពេទ្យកុមារ និងគ្រូពេទ្យឯកទេសសុដន់ព្រួយបារម្ភចំពោះសុខភាពទារកដែលមាតាបិតាបញ្ជូនមកមន្ទីរពេទ្យដោយសារតែទារកទាំងនោះគ្រុនក្ដៅ និងមានដំបៅនៅត្រង់សុដន់ បន្ទាប់ពីមាតាបិតា ឬជីដូនច្របាច់ក្បាលសុដន់ទារកអាយុក្រោម១ខែ ដែលគេជឿថាកុំអោយសុដន់ធំឬយារនៅពេលពេញវ័យ។
គ្រូពេទ្យឯកទេសរោគកុមារ និងទារកនៅមន្ទីរពេទ្យកុមារជាតិ លោកវេជ្ជបណ្ឌិត ប៉ែន កក្កដា មានប្រសាសន៍ថា ជាទស្សនៈយល់ច្រឡំមួយដែលមនុស្សចាស់ធ្វើតគ្នាពីបុរាណមក ហើយកូនចៅជំនាន់ក្រោយមិនអាចប្រកែក បានទោះបណ្ដាលឲ្យមានផលប៉ះពាល់ធ្ងន់ធ្ងរក៏ដោយ។ លោកបន្តថា គ្មានការសិក្សាណាមួយដែលបញ្ជាក់ថា សុដន់ធំ ឬយារនៅពេលពេញវ័យដោយសារមិនបានច្របាច់យកគ្រាប់ចេញនៅពេលជាទារកនោះទេ។ ផ្ទុយទៅវិញ ទម្រង់ប្រែប្រួលនៅពេលមនុស្សពេញវ័យគឺអាស្រ័យទៅលើតំណពូជ។ ម្យ៉ាងវិញទៀតឥរិយាបថនៃការប្រព្រឹត្តបែបនេះបានផ្ដល់ផលលំបាកដល់ទារក ដែលនាំឲ្យទារកគ្រុនក្ដៅ មានហើមនៅលើសុដន់ និងរហូតដល់ឡើងដំបៅដែលឈានទៅដល់ការវះកាត់ជាដើម៖ «»។
លោកវេជ្ជបណ្ឌិត ប៉ែន កក្កដា បញ្ជាក់ទៀតថា ការច្របាច់ក្បាលសុដន់នេះនាំឲ្យដាច់រលាត់សាច់រហូតដល់ឈាមក៏មាន។ ករណីនេះដោយសារមេរោគឆ្លងតាមរយៈដៃមិនស្អាត ឆ្លងទៅតាមឈាម នាំឲ្យមានមេរោគនៅក្នុងឈាមឆ្លងទៅជាជំងឺផ្សេងៗ ពិបាកព្យាបាល ព្រោះមេរោគនេះនឹងទៅប៉ះដល់ទីណានោះនឹងឆ្លងដល់កន្លែងនោះ៖ «»។
មន្ត្រីចូលនិវត្តន៍រោគស្ត្រី និងសម្ភព នៃមន្ទីរពេទ្យកាល់ម៉ែត ដែលសិក្សាឯកទេសសុដន់ពីប្រទេសបារាំង អ្នកស្រីវេជ្ជបណ្ឌិត ជូ ពិន ឆ្លើយតបថា មាតាបិតាមិនគួរគប្បីធ្វើអ្វីលើទារកហួសពីការណែនាំដោយគ្រូពេទ្យឡើយ។ អ្នកស្រីបន្តថា បន្ទាប់ពីសម្រាលហើយគ្រូពេទ្យបានតាមដានលើអវយវៈ សំខាន់៤ គឺឆ្អឹងបង្ហើយ ផ្ចិត ប្រដាប់បន្តពូជ និងស្បែក។ អ្នកស្រីផ្ដល់ឱវាទថា ការច្របាច់ក្បាលសុដន់បានធ្វើឲ្យប៉ះទង្គិចទៅលើសរីរាង្គសុដន់ដែលកំពុងដំណើរការលូតលាស់ ការវិវឌ្ឍន៍នៃសុដន់ និងនាំឲ្យគ្រាំហើយរលាកក្រពេញសុដន់៖«»។
ងាកមកការព្យាបាលចំពោះទារកដែលរងការប៉ះទង្គិច លោកវេជ្ជបណ្ឌិត ប៉ែន កក្កដា បានណែនាំឲ្យអាណាព្យាបាលឆាប់បញ្ជូនកូនទៅមន្ទីរពេទ្យនៅពេលទារកទទួលរងនូវបញ្ហានេះ។ លោកថា គ្រូពេទ្យនឹងពិនិត្យទៅតាមសភាពជំងឺទារកអាចនឹងត្រូវវះកាត់យកខ្ទុះចេញ និងទទួលការព្យាបាលដោយប្រើថ្នាំ៖ «បើសិនជាក្នុងដំណាក់កាលគ្រាន់តែប៉ោង ហើមគ្រាន់តែប្រើថ្នាំបំបាត់ការឈឺចាប់។ តែបើក្នុងករណីហើមក្លាយដោយសារដាច់ស្បែកមានមេរោគចូល យើងសំអាតយកខ្ទុះចេញ ចាក់ថ្នាំផ្សះដើម្បីកុំឲ្យក្នុងឈាមទាន់»។
ទាក់ទងទៅនឹងការថែទាំទារកដែលទើបនឹងកើតវិញ មាតាបិតា និងជីដូនក្រៅពីធ្វើតាមការណែនាំរបស់គ្រូពេទ្យគប្បីគាត់ត្រូវស្វែងយល់ និងចេះដឹងដោយខ្លួនឯងដែរ ដូចជា មិនត្រូវលាបប្រេងកូឡានៅលើបង្ហើយចុងដង្ហើមទារក ឬលាបនៅលើផ្ចិត។ កុំបន្ថែមម្សៅទឹកអប់លើស្បែកទារក តែអាចប្រើម្សៅបានលុះត្រាតែទារកមានរលាកត្រង់ក្រលៀន ក ឬត្រកៀក ជាដើម តែត្រូវពិនិត្យមើលប្រភេទម្សៅនោះជៀសវាងជាម្សៅដែលអាចមានប្រតិកម្មលើស្បែកទារក។ និយាយឲ្យចំដូចពាក្យចាស់លោកពោលថា ដំបៅមិនឈឺកុំយកឈឺចាក់៕