សមត្ថកិច្ចខណ្ឌដូនពេញដោះលែងបុរសម្នាក់ ដែលជិះម៉ូតូតាមផ្លូវលើកបដាជូនពរលោកនាយករដ្ឋមន្ត្រី ហ៊ុន សែន ឲ្យមានអាយុដល់៥០០ឆ្នាំ វិញហើយ បន្ទាប់ពីធ្វើកិច្ចសន្យាលែងប្រព្រឹត្តទង្វើបែបនេះបន្តទៀត។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី ឲ្យអាស៊ីសេរីដឹងនៅថ្ងៃទី១៥ កញ្ញា ថា បុរសម្នាក់នោះ ត្រូវបានសមត្ថកិច្ចឃាត់ខ្លួន នៅសង្កាត់ជ័យជំនះ ខណ្ឌដូនពេញ កាលពីថ្ងៃទី១៤ កញ្ញា ខណៈរូបគេជិះម៉ូតូដឹកបដាពីក្រោយ និងសរសេរជូនពរលោក ហ៊ុន សែន មានអាយុ ៥០០ឆ្នាំ។
អ្នកនាំពាក្យរូបនេះ មិនបញ្ជាក់ពីអត្តសញ្ញាណរបស់បុរសរូបនោះទេ ខណៈសារព័ត៌មានក្នុងស្រុកចុះផ្សាយថា បុរសម្នាក់នេះតែងលើកបដាបែបនេះតាមរូបភាពផ្សេងៗដូចជាតាមម៉ូតូ និងកង់ជាដើម។
លោក ម៉េត មាសភក្ដី ថា ករណីបុរសនេះ មិនមែនជាបញ្ហាធំនោះទេ ប៉ុន្តែសមត្ថកិច្ចគ្រាន់ហៅមកណែនាំ ដើម្បីបញ្ចៀសភាពមិនមានសណ្ដាប់ធ្នាប់ក្នុងសង្គម។
នេះជាសារជូនពរលើក១ ចំពោះប្រមុខរដ្ឋាភិបាលកម្ពុជាឲ្យមានអាយុច្រើនបែបនេះ ខណៈមន្ត្រីរបស់លោកប្រើសារជូនពរត្រឹមមានអាយុយឺនយូរប៉ុណ្ណោះ ក្នុងថ្ងៃខួបកំណើតរបស់លោករៀងរាល់ឆ្នាំ។ ចំណែកលោក ហ៊ុន សែន ខ្លួនឯងធ្លាប់អះអាងថា លោកអាចមានអាយុដល់៩០ឆ្នាំ៕