Clik here to view.
ពលរដ្ឋនៅខេត្តបាត់ដំបងថា ខ្លួនកំពុងរងគ្រោះព្រោះក្រុមហ៊ុនសាងសង់ផ្ទះបង់រំលោះមិនបានអនុវត្តតាមកិច្ចសន្យារបស់ខ្លួនជាមួយពលរដ្ឋដោយយកប្រាក់រួចហើយ ប៉ុន្តែមិនបានសាងសង់តាមថ្លៃឈ្នួល។ ភាគីក្រុមហ៊ុនឆ្លើយដាក់គ្នាចុះឡើងហើយ គ្មានអ្នកអះអាងថា នឹងសាងសង់បន្តជូនពលរដ្ឋនោះទេ។
ខណៈសន្ទុះអាជីវកម្មផ្ទះល្វែងបង់រំលោះ និងអាជីវកម្មម៉ៅការសង់ផ្ទះបង់រំលោះកំពុងរីកដុះដាល និងឃោសនាតាមប្រព័ន្ធផ្សព្វផ្សាយ រួមទាំងបណ្ដាញទំនាក់សង្គមហ្វេសប៊ុកនោះ ក្រុមពលរដ្ឋមួយចំនួនកំពុងជួបបញ្ហានេះ ព្រោះពួកគេបានបង់លុយជារៀងរាល់ខែទៅឲ្យភាគីសាងសង់ ប៉ុន្តែគម្រោងសាងសង់នោះមិនដំណើរការដូចការបង់ប្រាក់របស់ពលរដ្ឋនោះទេ។
ករណីជាក់ស្ដែងពលរដ្ឋរស់នៅខេត្តបាត់ដំបង ថាខ្លួនបានចុះកិច្ចសន្យាជាមួយក្រុមហ៊ុនមួយឈ្មោះ ឌិន សត្យា ខនស្ត្រាក់សិន ដើម្បីសាងសង់ផ្ទះលើដីរបស់ខ្លួនដោយប្រាក់រំលោះ ប៉ុន្តែភាគីក្រុមហ៊ុនមិនបានសាងសង់តាមកិច្ចសន្យាឡើយ។
លោកស្រី រឹម មី ជាពលរដ្ឋរស់នៅខេត្តបាត់ដំបង ឲ្យអាស៊ីសេរីដឹងថា លោកស្រីបានបង់ប្រាក់ទៅក្រុមហ៊ុន ឌិន សត្យា ខនស្ត្រាក់សិន (Construction) បានបួនដំណាក់កាលដែលគិតជាទឹកប្រាក់ជិត ៦ម៉ឺនដុល្លារ ប៉ុន្តែក្រុមហ៊ុនសាងសង់មិនបានសាងសង់ផ្ទះឲ្យដូចទៅនឹងទំហំទឹកប្រាក់ដែលបានបង់នោះទេ។
លោកស្រីបន្តថា នៅរយៈពេលជាង ៣ខែកន្លងមកនេះ ក្រុមហ៊ុនមិនបានសាងសង់ផ្ទះបន្ថែមទេ ជាងនេះទៅទៀត ក្រុមហ៊ុនបែរជាទាមទារឲ្យលោកស្រីបង់លុយបន្ថែមទៀតផង៖ «សុំឲ្យក្រុមហ៊ុនសងលុយខ្ញុំត្រឹមតែបីបួនពាន់ដុល្លារមកវិញមកក៏បានដែរ ខ្ញុំយកមកធ្វើខ្លួនឯងវិញ ព្រោះក្រុមហ៊ុនគាត់អត់សហការគ្នាអ៊ីចឹង»។
ក្នុងកិច្ចសន្យាសាងសង់ផ្ទះរវាងក្រុមហ៊ុន ឌិន សត្យា ខនស្ត្រាក់សិន ដែលមានលោក ឌិន សត្យា ជាអគ្គនាយកជាមួយក្រុមគ្រួសារលោកស្រី រឹម មី កាលពីឆ្នាំ២០១៥ ដែលលោកស្រី រឹម មី បានផ្តល់មកឲ្យអាស៊ីសេរី បញ្ជាក់ថា ភាគីទាំងពីរព្រមព្រៀងគ្នាសាងសង់ផ្ទះនៅភូមិបឹងចែង ឃុំស្នឹង ស្រុកបាណន់ ខេត្តបាត់ដំបង ជាផ្ទះវិឡា ១ជាន់ មានជាន់ផ្ទាល់ដី និងដំបូលប្រក់ក្បឿងដោយភាគីទទួលខុសត្រូវសាងសង់ឲ្យចប់សព្វគ្រប់ ក្នុងរយៈពេល ៦ខែ ដែលនឹងបញ្ចប់ការសាងសង់ខែមេសា ឆ្នាំ២០១៦។ ការទូទាត់ថ្លៃសាងសង់ធ្វើឡើងចំនួន ៦ ដំណាក់កាល។ ភាគីទាំងពីរថែមទាំងព្រមព្រៀងគ្នាថា បើខាងក្រុមហ៊ុនសាងសង់មិនទាន់តាមកាលកំណត់ ក្រុមហ៊ុននឹងសងការខាតបង់មួយថ្ងៃ ២០ដុល្លារ ប៉ុន្តែបើភាគីម្ចាស់ផ្ទះគ្មានលុយបង់តាមដំណាក់កាល ក្រុមហ៊ុននឹងផ្អាកការសាងសង់។
ទាក់ទងកិច្ចសន្យានេះ លោកស្រី រឹម មី ប្រាប់ទៀតថា នៅពេលនេះ ក្រុមហ៊ុនបានធ្វើកិច្ចសន្យានោះហើយ បើទោះជាលោកស្រីទាមទារប្រាក់ដែលបានបង់រួចហើយមកវិញ ក៏ក្រុមហ៊ុនមិនបានប្រគល់ប្រាក់ត្រឡប់មកវិញដែរ។
ឆ្លើយតបការលើកឡើងរបស់ភាគីម្ចាស់ផ្ទះដូចនេះ អគ្គនាយកក្រុមហ៊ុន ឌិន សត្យា ខនស្ត្រាក់សិន លោក ឌិន សត្យា និយាយថា ក្រុមហ៊ុនលោកពិតជាបានចុះកិច្ចសន្យាសាងសង់ផ្ទះដូចការលើកឡើងរបស់លោកស្រី រឹម មី មែន។ ប៉ុន្តែលោកថា ក្រុមហ៊ុនរបស់លោកផ្ទេរសិទ្ធិទៅអតីតអគ្គនាយករងក្រុមហ៊ុននេះ គឺលោក ជាង សុវណ្ណឫទ្ធី កាលពីបីខែមុនរួចហើយ៖ «ខ្ញុំបានកាត់គម្រោងមួយចំនួនទៅឲ្យគាត់ (ជាង សុវណ្ណឫទ្ធី) ដែលមានមេធាវីអារកាត់រួចរាល់ហើយអស់»។
អតីតអគ្គនាយករងក្រុមហ៊ុននេះ គឺលោក ជាង សុវណ្ណឫទ្ធី បដិសេធមិនទទួលខុសត្រូវ និងថាលោកមិនបានដឹងរឿងនេះទេ។
អាស៊ីសេរីមិនអាចសុំការបំភ្លឺពីអភិបាលរងស្រុកបាណន់ លោក ជុំ ញ៉ និងអភិបាលខេត្តបាត់ដំបង លោក ច័ន្ទ សុផល បានទេ នៅថ្ងៃទី១៣ ខែកញ្ញា។
លោក សុក សំអឿន ប្រធានការិយាល័យមេធាវីក្រុមអ្នកច្បាប់អមរិន្ទ្រ យល់ថា ករណីនេះជារឿងស្មុគស្មាញ ដូច្នេះភាគីទាំងពីរគួរជជែកសើរើពីកិច្ចសន្យារបស់ខ្លួនឲ្យច្បាស់ឡើងវិញ។ លោកថា បើភាគីទាំងពីរចរចាគ្នាលែងកើតហើយ មានតែប្ដឹងទៅតុលាការដើម្បីរកយុត្តិធម៌នោះទេ៕