ចៅសង្កាត់បន្សាយរាក់ នៃក្រុងសំរោង បានដាក់ពាក្យបណ្ដឹងទៅតុលាការខេត្តឧត្តរមានជ័យ ដោយចោទប្រកាន់សកម្មជនម្នាក់នៃគណបក្សសង្គ្រោះជាតិ ពីបទបរិហារកេរ្តិ៍ទៅលើអាជ្ញាធរថ្នាក់ខេត្ត និងឃុំ។ កាលពីថ្ងៃទី៦ ខែកញ្ញា តំណាងអយ្យការនៃសំណុំរឿងក្តី បានកោះហៅសកម្មជនគណបក្សសង្គ្រោះជាតិ ម្នាក់នោះទៅសាកសួរម្ដងមកហើយ ជាហេតុធ្វើឲ្យសកម្មជនបក្សប្រឆាំងខ្លះទៀតមានការព្រួយបារម្ភ។
សកម្មជនម្នាក់នៃគណបក្សសង្គ្រោះជាតិ នៅខេត្តឧត្តរមានជ័យ កំពុងព្រួយបារម្ភអំពីសុវត្ថិភាពផ្ទាល់ខ្លួន និងក្រុមគ្រួសារ។ ការព្រួយបារម្ភ កើតឡើងបន្ទាប់ពីចៅសង្កាត់បន្សាយរាក់ នៃក្រុងសំរោង មកពីគណបក្សប្រជាជនកម្ពុជា បានដាក់ពាក្យប្ដឹងទៅតុលាការ ហើយតុលាការបានកោះហៅរូបគាត់ទៅសាកសួរពីបទបរិហារកេរ្តិ៍កាលពីថ្ងៃទី៦ ខែកញ្ញា រួចមក។
អនុប្រធានគណៈកម្មការប្រតិបត្តិគណបក្សសង្គ្រោះជាតិ ខេត្តឧត្តរមានជ័យ គឺលោក អូន ស្រ៊ាន។ លោកអះអាងនៅរសៀលថ្ងៃអាទិត្យ ទី១០ ខែកញ្ញា ថា កាលពីអំឡុងខែសីហា ឆ្នាំ២០១៦ គឺមានសកម្មភាពទម្លាក់ស្លាក និងដុតបំផ្លាញស្លាកសញ្ញារបស់គណបក្សសង្គ្រោះជាតិ ជាច្រើនផ្ទាំងនៅសង្កាត់បន្សាយរាក់ នៅសង្កាត់កូនក្រៀល និងនៅស្រុកអន្លង់វែង។ កាលណោះ រូបលោកបានដាក់បណ្ដឹងទៅអាជ្ញាធរសង្កាត់បន្សាយរាក់ និងអាជ្ញាធរខេត្តឧត្តរមានជ័យ ឲ្យជួយរកមុខជនដៃដល់ក្នុងការទម្លាក់ស្លាក ប៉ុន្តែអាជ្ញាធរមិនបានចាត់វិធានការផ្លូវច្បាប់តាមរកមុខអ្នកទម្លាក់ស្លាកទាំងនោះទេ។ លោក អូន ស្រ៊ាន បញ្ជាក់ថា ដោយសារតែគ្មានចំណាត់ការអ្វីសោះពីអាជ្ញាធរ គឺលោកបានបង្ហោះការបញ្ចេញមតិនៅតាមបណ្ដាញសង្គមហ្វេសប៊ុក (Facebook) រិះគន់ទាំងអាជ្ញាធរសង្កាត់បន្សាយរាក់ និងអាជ្ញាធរខេត្តឧត្តរមានជ័យ ថាមិនបានរកមុខជនល្មើសទាំងនោះទេ។
លោក អូន ស្រ៊ាន កំពុងព្រួយបារម្ភពីសុវត្ថិភាពផ្ទាល់ខ្លួន និងក្រុមគ្រួសារ បន្ទាប់ពីតុលាការខេត្តឧត្តរមានជ័យ កោះហៅរូបលោកទៅសាកសួរជុំវិញបទបរិហារកេរ្តិ៍កាលពីថ្ងៃទី៦ ខែកញ្ញា រួចមក៖ «ប្រសិនបើអាជ្ញាធរអព្យាក្រឹត្យមែន គ្រាន់តែនិយាយប៉ុណ្ណឹង មិនត្រូវប្រកាន់រហូតដល់ទៅប្ដឹងចូលតុលាការនោះទេ។ គេប្ដឹងនេះប្រហែលជាគេមានគម្រោងគាបសង្កត់មែនទែន»។
ក្រុមប្រឹក្សាសង្កាត់បន្សាយរាក់ មកពីគណបក្សប្រជាជនកម្ពុជា ដែលទើបតែឡើងកាន់តំណែងថ្មី ទទួលស្គាល់ថា គេពិតជាបានដាក់ពាក្យបណ្ដឹងប្រឆាំងនឹងសកម្មជននៃគណបក្សសង្គ្រោះជាតិ ទៅតុលាការមែន។
ចៅសង្កាត់បន្សាយរាក់ លោក ប្រាក់ សារ៉ន មានប្រសាសន៍ថា មូលហេតុដែលលោកប្ដឹងសកម្មជនគណបក្សសង្គ្រោះជាតិ ពីបទបរិហារកេរ្តិ៍ ដោយសារតែគាត់ចោទប្រកាន់អភិបាលខេត្តឧត្តរមានជ័យ និងអាជ្ញាធរសង្កាត់បន្សាយរាក់ ថាជាអ្នកនៅពីក្រោយខ្នងនៃជនទម្លាក់ស្លាកគណបក្សទាំងនោះ។ លោកចៅសង្កាត់បញ្ជាក់ថា កាលពីអំឡុងខែសីហា ឆ្នាំ២០១៦ គឺសកម្មជនគណបក្សសង្គ្រោះជាតិ ម្នាក់នោះបានបង្ហោះតាមបណ្ដាញសង្គមហ្វេសប៊ុក (Facebook) ម្ដងមកហើយ ចំពោះការចោទប្រកាន់អាជ្ញាធរបែបនេះ ប៉ុន្តែកាលពីខែសីហា ឆ្នាំ២០១៧ គឺសកម្មជនដដែលបានបង្ហោះតាមបណ្ដាញសង្គមម្ដងទៀតនូវរឿងដដែល ជាហេតុធ្វើឲ្យរូបលោកត្រូវមានចំណាត់ការប្រឆាំងតបតវិញ៖ «មានន័យថាអ្វីដែលគាត់និយាយតាមបណ្ដាញសង្គម គឺចោទប្រកាន់អាជ្ញាធរដោយគ្មានមូលដ្ឋានច្បាស់លាស់។ គាត់ចោទប្រកាន់អាជ្ញាធរថានៅពីក្រោយខ្នងជនល្មើស។ ពាក្យនេះធ្ងន់ធ្ងរណាស់»។
មន្ត្រីគណបក្សសង្គ្រោះជាតិ យល់ថាករណីដែលចៅសង្កាត់បន្សាយរាក់ មកពីគណបក្សប្រជាជនកម្ពុជា ប្ដឹងសកម្មជនគណបក្សសង្គ្រោះជាតិ ពេលនេះ គឺជាចេតនាគាបសង្កត់ខាងនយោបាយច្រើនជាងការមិនសប្បាយចិត្តចំពោះរឿងរិះគន់ទៅលើអាជ្ញាធរ។
ប្រធានក្រុមការងារគណបក្សសង្គ្រោះជាតិ ខេត្តឧត្តរមានជ័យ លោក ម៉ោញ សារ៉ាត់ ចាត់ទុកករណីដែលចៅសង្កាត់បន្សាយរាក់ ប្ដឹងសកម្មជនរបស់លោកទៅតុលាការនោះ គឺជាចេតនាគាបសង្កត់ផ្នែកនយោបាយនៅស្របពេលដែលរដ្ឋាភិបាលកំពុងតែដាក់សម្ពាធយ៉ាងខ្លាំងទៅលើមេដឹកនាំគណបក្សប្រឆាំងដែរនោះ៖ «ករណីនេះវាកើតឡើងតាំងពីឆ្នាំ២០១៦ ប៉ុន្តែគេមកចាប់ផ្ដើមដាក់បណ្ដឹងដើម្បីអនុវត្តច្បាប់នៅក្នុងពេលដែលស្ថានភាពនយោបាយមានការប្រែប្រួលខ្លាំងនេះ វាហាក់ដូចជាគេរាវរកគ្រប់បញ្ហា ដើម្បីដាក់សម្ពាធឲ្យសកម្មជនបក្សប្រឆាំងមានការព្រួយបារម្ភ»។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន មានប្រសាសន៍ថា ការដែលចៅសង្កាត់បន្សាយរាក់ ដាក់ពាក្យប្ដឹងសកម្មជនគណបក្សសង្គ្រោះជាតិ នេះ គឺលោកទើបតែបានទទួលដំណឹង ប៉ុន្តែមិនទាន់បានចុះអង្កេតឲ្យស៊ីជម្រៅថាយ៉ាងណានៅឡើយ។ លោក ស្រី ណារ៉េន យល់ថា បញ្ហាដែលសកម្មជនគណបក្សប្រឆាំងបញ្ចេញមតិតាមបណ្ដាញសង្គមរិះគន់អាជ្ញាធរខេត្តឧត្តរមានជ័យ នោះ គឺជារឿងតូចតាច ដែលអាចនិយាយគ្នាបាន មិនគួរឈានដល់ការប្ដឹងផ្ដល់ទៅតុលាការដូច្នេះឡើយ៖ «រឿងតូចតាចអ៊ីចឹងអាចនិយាយគ្នាដោះស្រាយគ្នាតាមសន្តិវិធីបាន មិនគួរណាឈានទៅដល់ការលាបពណ៌ដាក់គ្នាដូចនេះទេ»។
គណបក្សនយោបាយមួយចំនួនដែលមិនកាន់អំណាច កំពុងព្រួយបារម្ភយ៉ាងខ្លាំងជុំវិញការវិវឌ្ឍន៍ស្ថានការណ៍នយោបាយនៅកម្ពុជា ចុងក្រោយ ដោយសារតែរដ្ឋាភិបាលបញ្ឈប់សកម្មភាពវិទ្យាស្ថានជាតិប្រជាធិបតេយ្យ (NDI) ការបិទទ្វារកាសែត ឌឹ ខេមបូឌា ដេលី (The Cambodia Daily) ការហាមមិនឲ្យស្ថានីយវិទ្យុនៅក្នុងស្រុកផ្សាយបន្តពីវិទ្យុសំឡេងសហរដ្ឋអាមេរិក វិទ្យុអាស៊ីសេរី និងវិទ្យុសំឡេងប្រជាធិបតេយ្យ ព្រមទាំងការចាប់ខ្លួនលោក ញឹក ប៊ុនឆៃ ប្រធានគណបក្សខ្មែររួបរួមជាតិ លោក សួន សេរីរដ្ឋា ប្រធានគណបក្សអំណាចខ្មែរ និងលោក កឹម សុខា ប្រធានគណបក្សសង្គ្រោះជាតិ ជាដើមនោះ៕