Clik here to view.
ជោគវាសនាជនជាតិដើមភាគតិចម៉ុងតាញ៉ា-វៀតណាម ចំនួន ៣៦នាក់ កំពុងនៅឋិតនៅក្នុងប្រទេសកម្ពុជា នៅមានភាពស្រពិចស្រពិលនៅឡើយ។ ស្របពេលជាមួយគ្នា មានសេចក្តីរាយការណ៍ថា ជនជាតិម៉ុងតាញ៉ា ចំនួន ២៩នាក់ក្នុងចំណោម ៣៦នាក់នេះ រដ្ឋាភិបាលកម្ពុជា គ្រោងនឹងបញ្ជូនទៅកាន់ប្រទេសវៀតណាម វិញក្នុងពេលខាងមុខ។
បើទោះជាមានព័ត៌មាននៃការចាប់បញ្ជូនជនជាតិដើមភាគតិចម៉ុងតាញ៉ា-វៀតណាម ថ្មីបន្ថែមទៀតទៅកាន់ប្រទេសវៀតណាម វិញក្តី មន្ត្រីរដ្ឋាភិបាលកម្ពុជា នៅមិនទាន់បញ្ជាក់ថា តើរឿងនេះជាការពិត ឬយ៉ាងណានៅឡើយទេ។
នៅក្នុងសេចក្តីរាយការណ៍របស់កាសែត ឌឹ ខេមបូឌា ដេលី (The Cambodia Daily) នៅថ្ងៃទី៤ កញ្ញា ដែលជាថ្ងៃអវសាននៃកាសែតបរទេសមួយនេះ បានរាយការណ៍ថា ជនជាតិដើមភាគតិចម៉ុងតាញ៉ា-វៀតណាម ចំនួន ២៩នាក់ក្នុងចំណោម ៣៦នាក់នៅកម្ពុជា នឹងត្រូវរដ្ឋាភិបាលកម្ពុជា បញ្ជូនទៅកាន់ប្រទេសវៀតណាម វិញ បើទោះជាមានការព្យាយាមពីភ្នាក់ងារអង្គការសហប្រជាជាតិ ផ្នែកជនភៀសខ្លួនដើម្បីបញ្ជូនពួកគេទៅកាន់ប្រទេសទីបីក្តី។
ព័ត៌មាននេះ ត្រូវបានមន្ត្រីនៃឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន យូ.អិន.អេច្ឆ.ស៊ី.អ (UNHCR) ម្នាក់សុំមិនបញ្ចេញឈ្មោះ បានទម្លាយប្រាប់កាសែត ឌឹ ខេមបូឌា ដេលី តាមរយៈសារអ៊ីមែល (Email)។ មន្ត្រីអង្គការសហប្រជាជាតិរូបនេះបញ្ជាក់ថា ផ្អែកតាមនិយាមអន្តរជាតិ ជនជាតិដើមភាគតិចម៉ុងតាញ៉ា-វៀតណាម ទាំង ២៩នាក់នេះ គួរត្រូវបានទទួលស្គាល់ជាជនភៀសខ្លួន។ មន្ត្រីដដែលអះអាងថា UNHCR បានបង្ហាញនូវជម្រើសផ្សេងទៀត នោះគឺបញ្ជូនជនជាតិម៉ុងតាញ៉ា ដែលមានអំណះអំណាងច្រើនបង្ហាញថាជាជនភៀសខ្លួនទៅកាន់ប្រទេសទី៣ ប៉ុន្តែត្រូវបានរដ្ឋាភិបាលបដិសេធ ដោយអះអាងថា ករណីរបស់ជនជាតិម៉ុងតាញ៉ា ទាំងអស់នេះ ត្រូវបានដោះស្រាយរួចរាល់ហើយ។
មន្ត្រីដដែលនេះឲ្យដឹងថា អង្គការសហប្រជាជាតិ នឹងព្យាយាមបញ្ជូនជនជាតិម៉ុងតាញ៉ា ៧នាក់ផ្សេងទៀតទៅកាន់ប្រទេសទី៣ ឲ្យបានកាន់តែឆាប់អាចធ្វើទៅបាន។
ទោះជាយ៉ាងណា ប្រធាននាយកដ្ឋានអន្តោប្រវេសន៍ក្រសួងមហាផ្ទៃ លោក តាន់ សុវិជ្ជា នៅមិនទាន់អាចបញ្ជាក់ថា ព័ត៌មាននៃគម្រោងបញ្ជូនជនជាតិម៉ុងតាញ៉ា ទៅវៀតណាម ថ្មីបន្ថែមទៀតនេះ ពិតឬយ៉ាងណានោះទេ នៅថ្ងៃទី៤ កញ្ញា ដោយលោកថ្លែងថា លោកមិនមានព័ត៌មានពីថ្នាក់លើនៅឡើយ។
ក្នុងចំណោមជនជាតិម៉ុងតាញ៉ា ទាំង ៣៦នាក់ដែលកំពុងស្នាក់នៅកម្ពុជា ៣នាក់ ត្រូវបានរដ្ឋាភិបាលផ្តល់ឋានៈជាជនភៀសខ្លួនរួចហើយ។ ចំណែក ៣៣នាក់ផ្សេងទៀតបានប្តឹងឧទ្ធរណ៍ ក្រោយពីបានធ្លាក់នៅជុំទី១។ ទោះជាយ៉ាងណា លោក តាន់ សុវិជ្ជា មិនបានឲ្យដឹងឡើយថា ក្នុងចំណោមពួកគេ ៣៣នាក់នេះ ប៉ុន្មាននាក់ធ្លាក់ និងប៉ុន្មាននាក់ជាប់នោះទេ ដោយលោកបង្វែរឲ្យទៅសួរមន្ត្រី UNHCR វិញ ព្រោះលោកថាព័ត៌មានទាំងអស់ រដ្ឋាភិបាលបានបញ្ជូនទៅឲ្យ UNHCR អស់ហើយ។
អាស៊ីសេរី នៅមិនទាន់ទទួលបានការឆ្លើយតបពីមន្ត្រីផ្នែកព័ត៌មានសាធារណៈប្រចាំតំបន់របស់ UNHCR អ្នកស្រី វីវៀន តាន់ (Vivian Tan) បាននៅឡើយទេនៅថ្ងៃដដែលនេះ។
កាលពីថ្ងៃទី១០ សីហា ជនជាតិដើមភាគតិចម៉ុងតាញ៉ា ចំនួន ១៣នាក់ ត្រូវបានកម្ពុជា បញ្ជូនទៅស្រុកកំណើតនៅវៀតណាម ក្រោមការសម្របសម្រួលរបស់អង្គការសហប្រជាជាតិ។ ការបញ្ជូននេះ ក្រោយពីពួកគេមិនទទួលបានឋានៈជាជនភៀសខ្លួននៅកម្ពុជា។
ដោយឡែកកាលពីថ្ងៃទី២៤ សីហា អាជ្ញាធរខេត្តរតនគិរី បានបញ្ជូនជនជាតិម៉ុងតាញ៉ា មួយគ្រួសារមានគ្នា ៤នាក់ទៅឲ្យអាជ្ញាធរវៀតណាម ខេត្តយ៉ាឡាយ (Gia Lai) វិញដែរ។ ពួកគេបានរត់គេចខ្លួនពីស្រុកកំណើតមករស់នៅភ្នំពេញ រួចបន្តដំណើរទៅកាន់ប្រទេសថៃ ស្នាក់នៅមួយរយៈ ប៉ុន្តែចុងក្រោយបានសម្រេចវិលទៅវៀតណាម វិញតាមខេត្តរតនគិរី ដោយស្នាក់នៅផ្ទះសំណាក់មួយកន្លែងក្នុងក្រុងបានលុង ដើម្បីស្វែងរកលទ្ធភាពឆ្លងដែនទៅស្រុកកំណើត ពីព្រោះខ្លាចអាជ្ញាធរវៀតណាម ធ្វើទុក្ខបុកម្នេញ។ ពួកគេត្រូវបានសមត្ថកិច្ចខេត្តរតនគិរី ជូនដំណើរទៅប្រគល់ឲ្យអាជ្ញាធរវៀតណាម ស្រុកដាក់កឺ ខេត្តយ៉ាឡាយ ដោយមានក្រុមគ្រួសារពួកគេនៅរង់ចាំទទួលទៅលំនៅឋានវិញ៕
