Clik here to view.
បន្ទាប់ពីចំណាយពេលតែពីរថ្ងៃក្នុងការសួរចម្លើយលោក កឹម សុខា តំណាងអយ្យការនៃតុលាការក្រុងភ្នំពេញ លោក សៀង សុខ នៅថ្ងៃទី៥ ខែកញ្ញា បានចោទប្រកាន់មេបក្សប្រឆាំងរូបនេះជាផ្លូវការហើយពីទោសក្បត់ជាតិ។ ប៉ុន្តែមេធាវីការពារក្ដីឲ្យលោក កឹម សុខា ច្រានចោលការចោទប្រកាន់នេះ ដោយបកស្រាយថា បទចោទនេះជារឿងនយោបាយសុទ្ធសាធក្រោមលេសអនុវត្តច្បាប់។
នេះអាចជាលើកទីមួយហើយដែលតំណាងអយ្យការអមតុលាការក្រុងភ្នំពេញ ចំណាយពេលទៅសួរចម្លើយជនសង្ស័យ កឹម សុខា ដល់ពន្ធនាគារនៅជិតព្រំដែនវៀតណាម ដែលរឿងក្តីកន្លងទៅ ច្រើនតែនាំជនសង្ស័យមកកាន់តុលាការផ្ទាល់ដើម្បីសាកសួរ។ តែពីរថ្ងៃគត់ សំណុំរឿងរបស់លោក កឹម សុខា បានធ្លាក់ដល់ដៃចៅក្រមស៊ើបសួរនៃតុលាការក្រុងភ្នំពេញ គឺលោក គី ឬទ្ធី ក្រោយពីព្រះរាជអាជ្ញារងបញ្ចប់ការស៊ើបអង្កេត និងចោទប្រកាន់ពីបទឃុបឃិតគ្នាដោយសម្ងាត់ជាមួយបរទេសផ្ដួលរំលំរដ្ឋាភិបាល។
សេចក្ដីថ្លែងការណ៍របស់អយ្យការអមតុលាការក្រុងភ្នំពេញ ចេញក្នុងពេលបញ្ចប់ការស៊ើបអង្កេតរបស់ខ្លួននៅថ្ងៃទី៥ ខែកញ្ញា អះអាងថា ការចាប់ខ្លួនដោយកម្លាំងនគរបាលយុត្តិធម៌ និងឆ្លងកាត់ការស្រាវជ្រាវពិនិត្យភស្តុតាង និងផ្ទៀងផ្ទាត់ចម្លើយរបស់ជនសង្ស័យ តុលាការអាចកំណត់បានថាមានមូលដ្ឋានគ្រប់គ្រាន់ដែលអាចឲ្យតំណាងអយ្យការ ចោទប្រកាន់ប្រឆាំងលើលោក កឹម សុខា ពីបទសន្ទិដ្ឋិភាពជាមួយបរទេស ឬត្រូវរ៉ូវគ្នាជាមួយបរទេស តាមបញ្ញត្តិមាត្រា៤៤៣ នៃក្រមព្រហ្មទណ្ឌបាន។
បើទោះជាបែបនេះក្ដី មេធាវីការពារក្ដីឲ្យលោក កឹម សុខា គឺលោក ជូង ជូងី យល់ឃើញថា ការចោទប្រកាន់ និងចាប់ខ្លួនដ៏ប្រញាប់ប្រញាល់ក្រោមបទចោទក្បត់ជាតិ ដោយអះអាងថាជាបទល្មើសជាក់ស្ដែងនេះ គឺពុំមានហេតុផលទាល់តែសោះ។ លោក ជូង ជូងី ដែលនៅពេលនេះត្រូវបានកម្លាំងនគរបាលបិទសិទ្ធិត្រង់មាត់ច្រកនៃគុកត្រពាំងផ្លុង មិនឲ្យចូលជួបលោក កឹម សុខា ក្នុងនាមជាមេធាវីនោះ ចាត់ទុកថាការរឹតបន្តឹងសិទ្ធិរហូតដល់មេធាវីមិនអាចចូលជួបកូនក្តីរបស់ខ្លួនបាន គឺជាការអនុវត្តច្បាប់ដោយបំពាន។ លោកបន្តថា «ចំណាត់ការអ៊ីចឹង គឺធ្វើឲ្យប៉ះពាល់ដល់ផ្លូវច្បាប់ផង ប៉ះពាល់ដល់សិទ្ធិឯកឧត្ដម កឹម សុខា ផង និងប៉ះពាល់ដល់សិទ្ធិខ្ញុំជាមេធាវីជាអ្នកការពារក្តីឲ្យឯកឧត្ដម កឹម សុខា ផង គឺឥរិយាបថក្នុងការចាត់ការ ឬក៏រុញពីមួយទៅមួយដូច្នេះហើយ គឺអត់ត្រឹមត្រូវទេ គឺប៉ះពាល់ទៅលើវិស័យច្បាប់»។
លោក កឹម សុខា ត្រូវបានកម្លាំងនគរបាលចូលឡោមព័ទ្ធផ្ទះ និងចាប់ខ្លួនទាំងកណ្ដាលអធ្រាត្រស្ថិតក្នុងខណ្ឌទួលគោក ក្រុងភ្នំពេញ កាលពីថ្ងៃទី៣ ខែកញ្ញា ពីបទក្បត់ជាតិ។ ក្រោយបញ្ចប់ការស៊ើបសួរ និងចេញដីកាសន្និដ្ឋានបញ្ជូនរឿងទៅចៅក្រមបន្ត តុលាការក៏បានបញ្ជូនដីកាទៅរដ្ឋសភាដែរ។ ការបញ្ជូនដីកាទៅរដ្ឋសភាក្រោយពេលចោទប្រកាន់ដោយអយ្យការអមតុលាការក្រុងភ្នំពេញនេះ អាចជាការស្នើឲ្យរដ្ឋសភាបើកផ្លូវដកអភ័យឯកសិទ្ធិសភាពីអ្នកតំណាងរាស្ត្រ ដើម្បីងាយស្រួលក្នុងដំណើរការតាមផ្លូវតុលាការ។
អ្នកនាំពាក្យរដ្ឋសភា លោក ឡេង ប៉េងឡុង ប្រាប់ថា បានទទួលដីកាពីតុលាការជុំវិញបទចោទនេះរួចហើយ។ លោកបញ្ជាក់ថា គណៈកម្មការអចិន្ត្រៃយ៍នៃរដ្ឋសភា នឹងប្រជុំសម្រេច ហើយឆ្លើយតបទៅតុលាការវិញក្នុងពេលដ៏ខ្លីខាងមុខនេះ។ លោកបន្តថា «យើងចង់ប្រជុំឆាប់ៗនេះ។ ឆាប់ៗនេះ ប៉ុន្តែមិនទាន់កំណត់ថ្ងៃណាទេ។ ឆាប់ៗមិនយូរទេ»។
ស្របពេលអាជ្ញាធរកម្ពុជា និងតុលាការប្រញាប់ប្រញាល់រុញសំណុំរឿងមេបក្សប្រឆាំង លោក កឹម សុខា នេះឲ្យដល់គោលដៅ មន្ត្រីនាំពាក្យក្រសួងការបរទេសចិន លោក ជេង ហ្សួង (Geng Shuang) ថ្លែងក្នុងសន្និសីទកាសែតកាលពីថ្ងៃទី៤ កញ្ញា ថា ក្នុងនាមជាអ្នកជិតខាងល្អ មិត្តភ័ក្ដិល្អ ជាដៃគូ និងជាបងប្អូនគ្នានឹងកម្ពុជា ភាគីចិន តែងគាំទ្រកម្ពុជា តាមផ្លូវអភិវឌ្ឍន៍ដែលសមស្របនឹងលក្ខខណ្ឌជាតិ និងកិច្ចប្រឹងប្រែងរបស់រដ្ឋាភិបាលកម្ពុជា ដើម្បីលើកកម្ពស់សន្តិសុខ និងស្ថិរភាពជាតិ។
ផ្ទុយពីជំហររបស់ចិន នេះ ស្ថានទូតចំនួនពីរ គឺស្ថានទូតស្វីស ដែលមានការិយាល័យនៅទីក្រុងបាងកក និងស្ថានទូតបារាំង ព្រមទាំងសហភាពអឺរ៉ុប បង្ហាញការព្រួយបារម្ភដូចគ្នាចំពោះការចាប់ខ្លួនមេបក្សប្រឆាំងនេះ។ សេចក្តីថ្លែងការណ៍នេះ សង្កត់ធ្ងន់ថា ការអនុវត្តច្បាប់នេះ គឺជាការបំផ្លាញប្រជាធិបតេយ្យដែលបានចាក់ឫសនៅកម្ពុជា។ ជាងនេះទៀត សេចក្តីថ្លែងការណ៍បន្តថា រដ្ឋាភិបាលត្រូវធានាឲ្យមានការបោះឆ្នោតនៅពេលខាងមុខនេះដោយសេរី គោរពសិទ្ធិអ្នកនយោបាយ និងប្រព័ន្ធផ្សព្វផ្សាយ ជាពិសេសត្រូវប្រាកដថា ដំណើរក្តីក្នុងសំណុំរឿងលោក កឹម សុខា ត្រូវមានភាពឯករាជ្យ។
សេចក្ដីថ្លែងការណ៍របស់ប្រទេសស្វីស ដាច់ដោយឡែកពីគ្នា ប៉ុន្តែចេញក្នុងថ្ងៃតែមួយកាលពីថ្ងៃទី៤ កញ្ញា បានអំពាវនាវឲ្យរដ្ឋាភិបាលរបស់លោក ហ៊ុន សែន ត្រូវគោរពសិទ្ធិសេរីភាពនៃការបញ្ចេញមតិដូចដែលមានចែងក្នុងរដ្ឋធម្មនុញ្ញ និងច្បាប់អន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ៕