កាសែត ឌឹ ខេមបូឌា ដេលី (The Cambodia Daily) ដែលជាសារព័ត៌មានឯករាជ្យ ឈប់ដំណើរការនៅថ្ងៃទី៤ កញ្ញា បន្ទាប់ពីខ្លួនបានដំណើរការចំនួន ២៤ឆ្នាំ និង ១៥ថ្ងៃនៅប្រទេសកម្ពុជា ក្រោយពីមិនមានដំណោះស្រាយស្ដីពីរឿងពន្ធតម្លៃ ២៥ពាន់លានរៀល ឬជាង ៦លានដុល្លារសហរដ្ឋអាមេរិក ដែលកាសែតនេះអះអាងថា ជាគំនាបផ្នែកនយោបាយ។ ការអះអាងនេះ ត្រូវបានរដ្ឋាភិបាលបដិសេធ។ ចំណែកអ្នកវិភាគយល់ថា ការឈប់ផ្សាយនេះ គឺទាក់ទងនឹងរឿងបោះឆ្នោតឆ្នាំ២០១៨។
អគ្គនាយកដ្ឋានពន្ធដារ បានបញ្ជាក់ថា ទោះបីជាកាសែត ខេមបូឌា ដេលី បិទក៏ដោយ កាសែតនេះត្រូវតែសងបំណុលពន្ធ។
នៅថ្ងៃទី៤ កញ្ញា អគ្គនាយកដ្ឋានពន្ធដារបានស្នើអគ្គនាយកដ្ឋានអន្តោប្រវេសន៍ ឲ្យទប់ស្កាត់ការធ្វើដំណើររបស់អ្នកទទួលខុសត្រូវកាសែតនេះចាកចេញពីប្រទេសកម្ពុជា ដើម្បីដាក់បន្ទុកឲ្យពួកគេបង់ពន្ធ ជៀសវាងការបាត់បង់ប្រាក់ចំណូលរដ្ឋ។
ត្រឹមម៉ោងផ្សាយ អាស៊ីសេរី មិនអាចទាក់ទងអ្នកគ្រប់គ្រងកាសែត ខេមបូឌា ដេលី ដើម្បីសុំការឆ្លើយតបចំពោះចំណាត់ការនេះនៅឡើយ។
កាសែតផ្សាយជាភាសាអង់គ្លេស និងដំណឹងប្រែសម្រួលជាភាសាខ្មែរ បានបញ្ចប់ការផ្សាយរបស់ខ្លួនដោយអត្ថបទគម្របមុខ ស្ដីពីការព្រមានរបស់អ្នកតាមដានពីការធ្លាក់ចូលស្ថានភាពផ្ដាច់ការគ្មានកាលកំណត់នៅកម្ពុជា បន្ទាប់ពីមានការចាប់ខ្លួនមេបក្សប្រឆាំង លោក កឹម សុខា ខណៈការបោះឆ្នោតសកលមកដល់នៅឆ្នាំក្រោយ។
កាសែត ខេមបូឌា ដេលី បោះពុម្ពផ្សាយចំនួន ៣ ទៅ ៤ពាន់ច្បាប់ជារៀងរាល់ថ្ងៃ ហើយមានអត្ថបទស្ដីពីបញ្ហាពុករលួយ ការកាប់ និងជួញដូរព្រៃខុសច្បាប់ ការតវ៉ាដីធ្លី និងរឿងនយោបាយជ្រាលជ្រៅ។ ប្រធានបទទាំងនេះពិបាករកនៅលើទូរទស្សន៍ និងបណ្ដាញផ្សព្វផ្សាយព័ត៌មានក្នុងស្រុកដទៃទៀត។ កាសែតនេះ ប្រកាសបិទដំណើរការដោយខ្លួនឯងរយៈពេលមួយខែគត់ បន្ទាប់ពីរដ្ឋាភិបាលដាក់ឱសានវាទឲ្យបង់ពន្ធចំនួន ៦,៣លានដុល្លារសហរដ្ឋអាមេរិក ដោយអគ្គនាយកដ្ឋានពន្ធដារចោទថា កាសែតនេះគេចមិនបង់ពន្ធជាច្រើនឆ្នាំមកហើយ សូម្បីតែ ១រៀល ហើយលោកនាយករដ្ឋមន្ត្រី ហ៊ុន សែន បានចោទប្រកាន់បណ្ណាធិការកាសែតនេះថាជា «មេចោរ»។ លោកបានបញ្ជាក់ថា ប្រសិនបើកាសែតនេះមិនព្រមបង់ពន្ធទេ នឹងត្រូវវេចបង្វេចចាកចេញ។
ទោះបីជាយ៉ាងណា ម្ចាស់កាសែត ខេមបូឌា ដេលី អ្នកស្រី ដេបូរ៉ា គ្រីស័រស្ទៀល (Deborah Krisher-Steele) បានថ្លែងថា អំណាចពន្ធ គឺជាអំណាចដែលមានចេតនាបំផ្លាញ។ អ្នកស្រីថា កាសែតនេះត្រូវបានចាត់ការដោយសារការកំណត់ថ្លៃពន្ធខ្ពស់កប់ពពក ការបែកធ្លាយតាមបណ្ដាញព័ត៌មានគាំទ្ររដ្ឋាភិបាល និងសេចក្តីថ្លែងការណ៍មិនពិតដោយនាយកដ្ឋានពន្ធដារ និងការនិយាយមួលបង្កាច់ជាសាធារណៈដោយប្រមុខរដ្ឋាភិបាលមុនពេលសវនកម្ម ដែលវាខុសឆ្ងាយពីដំណើរការស្របច្បាប់។
ស្ថាបនិកកាសែត ឌឹ ខេមបូឌា ដេលី លោក បឺនី គ្រីស័រ (Bernie Krisher) គូសបញ្ជាក់ថា លោកបានដំណើរការកាសែតនេះដោយស្របច្បាប់ ហើយនឹងអនុញ្ញាតតុលាការកម្ពុជា កាត់ទោសលោក ប្រសិនបើតុលាការរកឃើញថាមានទោស។
និពន្ធនាយកកាសែត ខេមបូឌា ដេលី អ្នកស្រី ចូឌី ដឺជុង (Jodie DeJonge) ព្រួយបារម្ភថា ការបោះឆ្នោតសកលឆ្នាំ២០១៨ នឹងត្រូវធ្វើក្នុងភាពងងឹត ហើយរដ្ឋាភិបាលនឹងប្រើអំណាចដែលមានទាំងប៉ុន្មាន ដើម្បីគាស់អ្នកប្រឆាំង និងបិទមាត់អ្នកដែលអាចមានការយល់ឃើញផ្សេងពីរដ្ឋាភិបាល៖ «ខ្ញុំយល់ថាកាសែត ដេលី មិនសូវត្រូវជាមួយលោកនាយករដ្ឋមន្ត្រី ហ៊ុន សែន ហើយគាត់ក៏ក្រពុលមុខជាមួយយើងមិនតិចពេលដែរ»។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី ច្រានចោលការលើកឡើងរបស់កាសែត ខេមបូឌា ដេលី ដែលថានេះជាយុទ្ធនាការរបស់រដ្ឋាភិបាលបំបិទសំឡេងមតិរិះគន់។ លោកហៅកាសែតនេះថាជាក្រុមឧទ្ទាម និងញុះញង់ធ្វើឲ្យកម្ពុជា ឈ្លោះគ្នា៖ «»។
ដោយឡែកលោកបណ្ឌិត មាស នី អ្នកវិភាគនយោបាយ យល់ថា នេះជាការបិទសំឡេងឯករាជ្យមិនឲ្យប្រជាពលរដ្ឋឮ៖ «»។
កាលពីថ្ងៃទី៣ កញ្ញា វិទ្យុអេហ្វ.អិម (FM) មួយចំនួនដែលផ្សាយបន្តកម្មវិធីព័ត៌មានរបស់វិទ្យុដែលផ្តល់ជំនួយដោយសហរដ្ឋអាមេរិក វីអូអេ (VOA) និងអាស៊ីសេរី (RFA) ឈប់ចាក់កម្មវិធីព័ត៌មាន បន្ទាប់ពីទទួលបានបញ្ជាពីក្រសួងព័ត៌មាន។ បទបញ្ជានេះ កើតឡើងមុនពេលមានការចាប់ខ្លួនប្រធានគណបក្សប្រឆាំង៕