Clik here to view.
អ្នកគាំទ្រគណបក្សសង្គ្រោះជាតិ នៅរក្សាភាពស្ងប់ស្ងាត់ក្នុងពេលដែលអាជ្ញាធរចាប់ខ្លួនប្រធានគណបក្ស គឺលោក កឹម សុខា។ អនុប្រធានគណបក្សសង្គ្រោះជាតិ អ្នកស្រី មូរ សុខហួរ ចាត់ទុកស្ថានការណ៍នយោបាយពេលនេះជាស្ថានការណ៍មិនល្អ។
អនុប្រធានគណបក្សសង្គ្រោះជាតិ អ្នកស្រី មូរ សុខហួរ មានប្រសាសន៍ខ្លីជាមួយអ្នកកាសែតនៅឯទីស្នាក់ការកណ្ដាលរបស់គណបក្សរសៀលថ្ងៃទី៣ ខែកញ្ញា ថា ការចាប់ខ្លួនលោក កឹម សុខា ពេលនេះ ធ្វើឲ្យស្ថានការណ៍ប្រទេសជាតិ កាន់តែធ្ងន់ធ្ងរខ្លាំង៖ «សភាពការណ៍ធ្ងន់ធ្ងរ ហើយជំហររបស់យើងច្បាស់ណាស់នៅក្នុងការបោះឆ្នោតត្រឹមត្រូវ និងយុត្តិធម៌ សុំឲ្យមានការបោះឆ្នោតត្រឹមត្រូវ និងយុត្តិធម៌ ហើយរឿងនេះ ភាគីណាទទួលខុសត្រូវ ភាគីនោះទទួលខុសត្រូវ រួមកម្លាំងជាមួយគ្នានៅក្នុងការធ្វើឲ្យមានបោះឆ្នោតដ៏ត្រឹមត្រូវ សេរី និងយុត្តិធម៌»។
លោក កឹម សុខា ដែលអាជ្ញាធររដ្ឋាភិបាលចាប់ខ្លួនពីផ្ទះកាលពីម៉ោង ១២កន្លះរំលងអធ្រាត្រចូលថ្ងៃទី៣ ខែកញ្ញា ត្រូវបានបញ្ជូនទៅមន្ទីរអប់រំកែប្រែត្រពាំងផ្លុង ហៅកាត់ថា ម-៣ នៅខេត្តត្បូងឃ្មុំ។
លោកនាយករដ្ឋមន្ត្រី ហ៊ុន សែន ប្រកាសនៅព្រឹកថ្ងៃទី៣ កញ្ញា ថា ការចាប់ខ្លួនលោក កឹម សុខា ពីបទក្បត់ជាតិ ព្រោះតែលោកបង្ហាញផែនការផ្ដួលរំលំរដ្ឋាភិបាលគាំទ្រដោយសហរដ្ឋអាមេរិក ដែលមិនអាចអត់អោនបាន។
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍បញ្ជាក់ថា រហូតមកដល់ល្ងាចថ្ងៃទី៣ ខែកញ្ញា លោក កឹម សុខា ត្រូវបានដាក់នៅក្នុងបរិវេណមន្ទីរអប់រំកែប្រែ ម-៣ នៅត្រពាំងផ្លុង ខេត្តត្បូងឃ្មុំ ដដែល ប៉ុន្តែមិននៅក្នុងបន្ទប់ឃុំឃាំងទេ៖ «យើងបានបញ្ជូនលោកទៅមន្ទីរអប់រំកែប្រែ ម-៣ នៅត្រពាំងផ្លុង ប៉ុន្តែមិនទាន់បានបញ្ចូលទៅក្នុង Cell (បន្ទប់ឃុំឃាំង) ទេ គឺឋិតនៅក្នុង Office (ការិយាល័យ) របស់មន្ត្រីការងារនៅឡើយ។ Office មន្ត្រីពន្ធនាគារ ធម្មតា»។
នៅរសៀលថ្ងៃទី៣ កញ្ញា ដដែល អង្គរក្សទាំង ៨រូបរបស់លោក កឹម សុខា ត្រូវបានដោះលែងវិញហើយ។ ប្រធាននាយកដ្ឋានកិច្ចការបោះឆ្នោត និងនីតិកម្មរបស់គណបក្សសង្គ្រោះជាតិ អ្នកស្រី ម៉េង សុភារី ឲ្យដឹងថា អ្នកទាំង ៨នាក់ ត្រូវបានមេធាវីរបស់គណបក្សធានាសុំឲ្យនៅក្រៅឃុំ។ ទន្ទឹមគ្នានេះ លោក ខៀវ សុភ័គ ថ្លែងបញ្ជាក់ថា ករណីនេះពាក់ព័ន្ធតែលោក កឹម សុខា ម្នាក់ប៉ុណ្ណោះ ហើយអំពាវនាវឲ្យពលរដ្ឋទាំងអស់កុំឲ្យចលាចល ដែលអាចវឹកវរដូចប្រវត្តិសាស្ត្ររដ្ឋប្រហារឆ្នាំ១៩៧០៖ «អាស្រ័យទៅលើស្ថាប័នតុលាការ។ ប៉ុន្តែរឿងហ្នឹងខ្ញុំគិតថា បច្ចុប្បន្ននេះត្រឹមតែគាត់មួយសិនទេ ចោទប្រកាន់ត្រឹមគាត់ទេ ឬមួយរកឃើញដល់គណបក្ស អាហ្នឹងយើងបន្តទៅទៀត។ ប៉ុន្តែឥឡូវត្រឹមគាត់ទេ»។
ទោះជាយ៉ាងណាក្ដី មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ មិនអាចធ្វើអត្ថាធិប្បាយអ្វីទាក់ទងនឹងការចាប់ខ្លួន លោក កឹម សុខា ទេ ពេលដែលអ្នកកាសែតជួបលោក នៅឯទីស្នាក់ការកណ្ដាលបក្ស នៅសង្កាត់ចាក់អង្រែលើ រាជធានីភ្នំពេញ។ មន្ត្រីជាន់ខ្ពស់ផ្សេងទៀតរបស់គណបក្ស ក៏ចាកចេញពីទីស្នាក់ការដែរ។ ក្រៅអ្នកគាំទ្រគណបក្សសង្គ្រោះជាតិ ប្រមាណ ៣០នាក់ និងអ្នកកាសែតប្រមាណ ២០នាក់ មិនមានមនុស្សប្រមូលផ្ដុំគ្នាទៀតទេ។ មន្ត្រីនាំពាក្យដែលមិនចង់បញ្ចេញឈ្មោះម្នាក់ឲ្យដឹងថា គណបក្សសង្គ្រោះជាតិ នឹងចៀសវាងការប្រមូលផ្ដុំ ឬធ្វើបាតុកម្មតវ៉ាចំពោះការចាប់ខ្លួនលោក កឹម សុខា៕
