Clik here to view.
សំណុំរឿងស៊ើបអង្កេតគណបក្សសង្គ្រោះជាតិ ដែលក្រសួងមហាផ្ទៃ បើកការស្រាវជ្រាវនោះ ពេលនេះក្រសួងប្រគល់ភារកិច្ចនេះទាំងស្រុងឲ្យទៅអគ្គស្នងការនគរបាលជាតិ របស់លោក នេត សាវឿន ជាអ្នកស្រាវជ្រាវវិញម្ដង។
មន្ត្រីជាន់ខ្ពស់ក្រសួងមហាផ្ទៃ ឲ្យអាស៊ីសេរី ដឹងថ្ងៃទី២ ខែកញ្ញា ថា អគ្គស្នងការនគរបាលជាតិ កំពុងផ្ទៀងផ្ទាត់ទិន្នន័យរបស់គណបក្សសង្គ្រោះជាតិ ទៅនឹងព័ត៌មានដែលបង្ហោះនៅតាមបណ្តាញសង្គមហ្វេសប៊ុក (Facebook) ដែលចោទប្រកាន់ពីប្រភពលុយគណបក្ស និងចោទគណបក្សនេះថា មានគម្រោងធ្វើបដិវត្តន៍ពណ៌ដើម្បីផ្ដួលរំលំរដ្ឋាភិបាល។
ទោះបីក្រសួងមហាផ្ទៃ នៅពេលនេះ មិនទាន់រកឃើញតម្រុយអ្វីជុំវិញការចោទប្រកាន់មកលើគណបក្សសង្គ្រោះជាតិក្ដី ក៏អ្នកនាំពាក្យគណបក្សអំណាច លោក សុខ ឥសាន សំណូមពរឲ្យក្រសួងមហាផ្ទៃ ចាត់ការស៊ើបអង្កេតរកឲ្យឃើញការពិត និងចាត់ទុកការផ្សាយព័ត៌មានចោទប្រកាន់លើគណបក្សប្រឆាំងថា ជាការផ្សាយដ៏មានសារសំខាន់។
អ្នកនាំពាក្យក្រសួងមហាផ្ទៃ លោក ខៀវ សុភ័គ អះអាងថា ប្រសិនបើក្រុមជំនាញនៃអគ្គស្នងការនគរបាលជាតិរបស់លោក នេត សាវឿន រកឃើញពីកំហុសរបស់គណបក្សនេះ ក្រសួងនឹងប្ដឹងទៅតុលាការ ដែលអាចឈានដល់រំលាយគណបក្សនេះចោល។ ចំណែកអ្នកនាំពាក្យគណបក្សសង្គ្រោះជាតិថា គណបក្សនឹងសហការជាមួយសមត្ថកិច្ចក្នុងការផ្ដល់របាយការណ៍ដែលសមត្ថកិច្ចចង់បាន។
អ្នកនាំពាក្យក្រសួងមហាផ្ទៃ លោក ខៀវ សុភ័គ មិនទាន់បង្ហាញតម្រុយនៃការរកឃើញយ៉ាងណានៅឡើយ ដោយលោកគ្រាន់តែប្រាប់ថា ក្រុមសវនករអគ្គស្នងការនគរបាលជាតិ នៃក្រសួងមហាផ្ទៃ កំពុងផ្ទៀងផ្ទាត់របាយការណ៍របស់គណបក្សសង្គ្រោះជាតិ ទៅនឹងព័ត៌មានដែលត្រូវបានផ្សព្វផ្សាយដោយបណ្ដាញសង្គមហ្វេសប៊ុក និងប្រព័ន្ធផ្សព្វផ្សាយ។ លោកថា នៅពេលរកឃើញយ៉ាងណានោះ ក្រសួងនឹងកសាងសំណុំរឿងបញ្ជូនទៅតុលាការ៖ «មិនអាចធ្វើអ្វីកើតទេ ក្រសួងមហាផ្ទៃ គ្រាន់តែកសាងសំណុំរឿងបញ្ជូនទៅតុលាការប៉ុណ្ណឹងទេ បើមានមែន»។
ការបង្ហាញពីចំណាត់ការរបស់ស្ថាប័នរដ្ឋមកលើគណបក្សប្រឆាំងនៅពេលនេះ បន្ទាប់ពីសារព័ត៌មានហ្វ្រេសញូវ (Fresh News) ដែលស្និទ្ធនឹងលោក ហ៊ុន សែន បានចុះផ្សាយជាបន្តបន្ទាប់ ដោយយោងតាមប្រភពពីហ្វេសប៊ុក ឈ្មោះ “កូនខ្មែរ” ឬ "ចៅចាក់ស្មុគ" ដែលជាប្រភេទហ្វេសប៊ុក មិនហ៊ានបង្ហាញម្ចាស់គណនេយ្យពិតប្រាកដមកចុះផ្សាយពីភាពមិនស្របច្បាប់នៃនៃប្រភពហិរញ្ញប្បទានរបស់បក្សប្រឆាំង និងការចោទប្រកាន់ថា បក្សប្រឆាំងរៀបចំផែនការធ្វើបដិវត្តន៍ពណ៌ដើម្បីផ្ដួលរំលំរដ្ឋាភិបាលរបស់លោក ហ៊ុន សែន ដោយគណបក្សនេះមានទំនាក់ទំនងសម្ងាត់ជាមួយក្រុមជ្រុលនិយមតៃវ៉ាន់ ដែលទំនាក់ទំនងនេះ តភ្ជាប់ដោយកូនស្រីប្រធានគណបក្សសង្គ្រោះជាតិ កញ្ញា កឹម មនោវិទ្យា។
ទាក់ទងការស៊ើបអង្កេតរបស់អគ្គស្នងការនគរបាលជិតនៅពេលនេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ប្រាប់ថា ក្រៅពីរបាយការណ៍ប្រចាំឆ្នាំដែលគណបក្សតែងផ្ដល់ឲ្យទៅក្រសួងមហាផ្ទៃនោះ នៅពេលនេះគណបក្សមិនទាន់ឃើញក្រុមសមត្ថកិច្ចមកទាមទារឯកសារអ្វីនៅឡើយទេ។ យ៉ាងណាក៏ដោយចុះ លោកថា គណបក្សនឹងសហការជាមួយសមត្ថកិច្ចក្នុងការផ្ដល់ព័ត៌មាន និងឯកសារ៖ «បាទ! ក្នុងករណីចាំបាច់ត្រូវការឯកសារអី គឺគណបក្សឲ្យអត់មានបញ្ហាទេ»។
នៅរយៈពេលចុងក្រោយនេះ រដ្ឋាភិបាលរបស់លោក ហ៊ុន សែន បានលើកហេតុផលផ្សេងៗដោយប្រើកណ្ដាប់ដៃដែករបស់ខ្លួនបិទវិទ្យាស្ថានជាតិដើម្បីប្រជាធិបតេយ្យ (NDI) និងការបិទវិទ្យុក្នុងស្រុកមួយចំនួនដែលទទួលផ្សាយកម្មវិធីព័ត៌មានរបស់វិទ្យុសំឡេងប្រជាធិបតេយ្យ វិទ្យុអាស៊ីសេរី និងវិទ្យុសំឡេងសហរដ្ឋអាមេរិក ព្រមទាំងព្រមានបិទកាសែត ឌឹ ខេមបូឌា ដេលី (The Cambodia Daily)។
ចំណាត់ការទាំងនេះ ធ្វើឲ្យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស បង្ហាញការព្រួយបារម្ភ និងអំពាវនាវដល់រដ្ឋាភិបាលកម្ពុជា ធានាឲ្យបានពេញលេញនូវសិទ្ធិពលរដ្ឋ និងសិទ្ធិនយោបាយ ព្រមទាំងសេរីភាពសារព័ត៌មាននៅមុនការបោះឆ្នោតជាតិ ឆ្នាំ២០១៨ ខាងមុខ៕
