គណៈកម្មាធិការជាតិរៀបចំការបោះឆ្នោត (គ.ជ.ប) នឹងប្រើពេល ៧០ថ្ងៃ ចាប់ពីថ្ងៃទី១ ខែកញ្ញា ដល់ថ្ងៃទី៩ ខែវិច្ឆិកា ឆ្នាំ២០១៧ ដើម្បីចុះឈ្មោះ និងធ្វើបច្ចុប្បន្នភាពបញ្ជីឈ្មោះបោះឆ្នោត។ នៅថ្ងៃដំបូងនៃការចុះឈ្មោះបោះឆ្នោតឆ្នាំ២០១៧ ដើម្បីបម្រើឲ្យការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ នៅតាមការិយាល័យជាច្រើនក្នុងខេត្តកំពង់ឆ្នាំង មានសភាពស្ងប់ស្ងាត់។
ក្រុមមន្ត្រីចុះឈ្មោះបោះឆ្នោតនៅការិយាល័យសង្កាត់ផ្សារឆ្នាំង ក្រុងកំពង់ឆ្នាំង ឲ្យដឹងថា ក្នុងចំណោមអ្នកត្រូវចុះឈ្មោះបោះឆ្នោតជាង ៦០០នាក់ (៦៣១) មានតែបីនាក់ប៉ុណ្ណោះដែលបានមកចុះឈ្មោះនៅថ្ងៃដំបូងនេះ។ ពួកគេថា ការចុះឈ្មោះបានតិចនៅថ្ងៃដំបូង អាចមកពីពលរដ្ឋយល់ថា រយៈពេលនៃការចុះឈ្មោះនៅសល់ច្រើនថ្ងៃទៀត ឬអាចមកពីពលរដ្ឋមិនទាន់ទទួលព័ត៌មាននៃការចុះឈ្មោះ។
ប្រធានក្រុមចុះឈ្មោះបោះឆ្នោតនៅសង្កាត់ផ្សារឆ្នាំង លោក តោ ឬទ្ធី មានប្រសាសន៍ថា ការិយាល័យរបស់លោកបានបើកចុះឈ្មោះតាមកាលកំណត់របស់ គ.ជ.ប ដោយមានក្រុមប្រឹក្សាសង្កាត់ និងភ្នាក់ងារសង្កេតការណ៍របស់គណបក្សនយោបាយចូលរួម។ លោកថា ក្រៅពីពលរដ្ឋបីនាក់ដែលបានមកចុះឈ្មោះនេះ ក៏មានអ្នកមកផ្ទៀងផ្ទាត់ឈ្មោះរបស់ខ្លួនដែលចុះពីមុនរួចហើយខ្លះដែរ៖ «ចំពោះការសង្ឃឹមយ៉ាងម៉េចខ្ញុំដូចជាមិនប្រាកដទេ ព្រោះយើងទើបចាប់ផ្ដើមដំបូង ហើយគាត់ទើបមកបានពីរ ឬបីនាក់។ ដូចជាព័ត៌មានដែលយើងផ្ដល់ឲ្យគាត់ ដូចជាគាត់មិនទាន់បានជ្រួតជ្រាបយ៉ាងម៉េចទេ»។
នៅតាមការិយាល័យចុះឈ្មោះមួយចំនួនដែលអាស៊ីសេរី ចុះឃ្លាំមើលដូចជា សង្កាត់កំពង់ឆ្នាំង សង្កាត់ផ្អេរ និងសង្កាត់កំពង់ឆ្នាំង ជាដើម មិនសូវឃើញមានអ្នកមកផ្ទៀងផ្ទាត់ឈ្មោះ ឬចុះឈ្មោះថ្មីនៅឡើយ។
លេខាធិការរបស់គណៈកម្មាធិការដើម្បីបោះឆ្នោតដោយសេរី និងយុត្តិធម៌នៅកម្ពុជា (COMFREL) ប្រចាំខេត្តកំពង់ឆ្នាំង លោក លាភ ប៊ុនលាង យល់ថា ការផ្សព្វផ្សាយពីការចុះឈ្មោះបោះឆ្នោតតាមរយៈមេភូមិ ឬមេឃុំ មានប្រសិទ្ធភាពតិចជាងការចាក់ឧបករណ៍បំពងសំឡេងតាមភូមិ។ ប៉ុន្តែលោកថា ការចុះឈ្មោះបានតិចតួចនៅថ្ងៃដំបូងនេះមិនអាចជាបញ្ហាឡើយ ព្រោះពលរដ្ឋចំណាកស្រុក ឬកម្មករកាត់ដេរអាចឆ្លៀតឱកាសក្នុងថ្ងៃបុណ្យភ្ជុំបិណ្ឌទៅចុះឈ្មោះបោះឆ្នោតបានគ្រប់គ្នាមិនខាន៖ «ប៉ុន្តែបើសិនណាផ្សព្វផ្សាយតាមឧគ្ឃោសនស័ព្ទដែលគេហៅថា មេក្រូហ្នឹង គឺប្រជាពលរដ្ឋយើងនឹងមានការចាប់អារម្មណ៍ច្រើនជាង។ អ៊ីចឹងយើងសំណូមពរឲ្យគណៈកម្មាធិការជាតិមានការផ្សព្វផ្សាយតាមរយៈមេក្រូឲ្យច្រើន ដើម្បីឲ្យព័ត៌មាននេះដឹងដល់ប្រជាពលរដ្ឋឲ្យបានសព្វ»។
ចំណែកប្រធានលេខាធិការដ្ឋាននៃគណៈកម្មាធិការរៀបចំការបោះឆ្នោតខេត្តកំពង់ឆ្នាំង អ្នកស្រី នួន ចាន់នី ថ្លែងថា ការផ្សព្វផ្សាយពីការចុះឈ្មោះបោះឆ្នោតតាមឧបករណ៍បំពង់សំឡេងតាមភូមិពិតជាមាន ប៉ុន្តែអ្នកស្រីមិនទាន់ទទួលបានថាសស៊ីឌីផ្សព្វផ្សាយពី គ.ជ.ប នៅឡើយ។ អ្នកស្រីយល់ថា ការផ្សព្វផ្សាយតាមមេក្រូ និងអាជ្ញាធរមិនខុសគ្នាប៉ុន្មាននោះទេ ខណៈមន្ត្រីបោះឆ្នោតបានចែកប៉ាណូ និងខិត្តប័ណ្ណដើរបិទ ឬចងតាមភូមិ/ឃុំជាច្រើនសន្លឹករួចហើយ៖ «យើងបានផ្សព្វផ្សាយតាមទូរទស្សន៍តាមអីច្រើនហើយ ហើយយើងបានចង់បដា ជម្រាបជូនពួកគាត់ និងបិទផ្សាយនៅតាមភូមិ/ឃុំហើយ។ ខ្ញុំជឿថា ពួកគាត់នឹងយល់ដឹង ប៉ុន្ដែអ្នកដែលយល់ដឹងនៅតែយល់ដឹង អ្នកអត់ដឹងនៅតែអត់ដឹង»។
អ្នកស្រី នួន ចាន់នី បញ្ជាក់ថា ការចុះឈ្មោះបោះឆ្នោតនេះ មិនសូវមានសកម្មភាពខ្លាំងដូចចុះឈ្មោះដំបូងឡើយ ព្រោះពេលនេះចុះឈ្មោះតែអ្នកទើបគ្រប់អាយុ អ្នកផ្លាស់ទីលំនៅចូលថ្មី និងអ្នកមិនដែលបានចុះឈ្មោះសោះ។ សម្រាប់ខេត្តកំពង់ឆ្នាំង មានអ្នកត្រូវចុះឈ្មោះថ្មីជិត ៤ម៉ឺននាក់ (៣៦.៥៣១)។ រីឯអ្នកបានចុះឈ្មោះក្នុងបញ្ជីបោះឆ្នោតកាលពីឆ្នាំ២០១៦ មានជិតបីសែននាក់ (២៩០.៦៥៥)។
រាជរដ្ឋាភិបាលបានចេញអនុក្រឹត្យកំណត់យកថ្ងៃទី២៩ ខែកក្កដា ឆ្នាំ២០១៨ គឺជាថ្ងៃបោះឆ្នោតជ្រើសតាំងតំណាងរាស្ត្រនីតិកាលទី៦៕