ម្ចាស់កាសែត ឌឹ ខេមបូឌា ដេលី (The Cambodia Daily) នៅតែអះអាងថា អ្នកស្រីមិនបានគេចពន្ធ និងមានវិក្កយបត្របញ្ជាក់ត្រឹមត្រូវ។ ការអះអាងនេះ បន្ទាប់ពីអគ្គនាយកដ្ឋានពន្ធដារចោទថា រាប់ឆ្នាំមកនេះ កាសែតអ្នកស្រីមិនប្រកាសពន្ធសូម្បីតែមួយរៀល និងថែមទាំងប្រមូលអាករលើតម្លៃបន្ថែម ដាក់ហោប៉ៅផ្ទាល់ខ្លួនថែមទៀតផង។
អ្នកស្រី ដេប៉្រា គ្រីស័រ-ស្ទាល (Deborah Krisher-Steele) បានប្រាប់អាស៊ីសេរី តាមសារអេឡិចត្រូនិក កាលពីថ្ងៃទី២៩ ខែសីហា នេះថា កាសែត ឌឹ ខេមបូឌា ដេលី បានបង់ពន្ធអាករលើតម្លៃបន្ថែមនេះ គ្មានខ្វះមួយរៀលនោះទេ។ អ្នកស្រីថែមទាំងស្នើថា មិនបាច់ទៅរកភ័ស្តុតាងឯណាទេ ក្រសួងហិរញ្ញវត្ថុអាចពិនិត្យមើលវិក្កយបត្រនៅក្រសួងសាមីបាន បើចង់បានភ័ស្តុតាងបញ្ជាក់អំពីការបង់ពន្ធនេះនោះ។
អគ្គនាយកដ្ឋានពន្ធដារ កាលពីថ្ងៃទី២៩ ខែសីហា នេះ បានព្រមានបិទកាសែត ឌឹ ខេមបូឌា ដេលី បើនៅតែមិនព្រមបង់ពន្ធតាមកាលកំណត់។ ក្នុងសេចក្ដីបំភ្លឺដែលអគ្គនាយកដ្ឋានពន្ធដារអះអាងថា ការបំភ្លឺនេះ ធ្វើច្រើនលើកច្រើនសាមកហើយ។ អគ្គនាយកដ្ឋានពន្ធដារ ថាខ្លួនគ្មានជម្រើសអ្វីក្រៅពីអនុវត្តយ៉ាងម៉ឺងម៉ាត់តាមច្បាប់ជាធរមាន។
អគ្គនាយកដ្ឋានពន្ធដារអះអាងថា ស្ថាប័ន ឌឹ ខេមបូឌា ដេលី បានជំពាក់ថ្លៃពន្ធរយៈពេល ១០ឆ្នាំ គឺតាំងពីឆ្នាំ២០០៧ ដល់ឆ្នាំ២០១៦ ដែលគិតជាទឹកប្រាក់ប្រហែល ៦,៣លានសែនដុល្លារអាមេរិក។ អគ្គនាយកដ្ឋានពន្ធដារបានដាក់ឱសានវាទឱ្យកាសែតនេះ សងថ្លៃពន្ធទាំងនោះ ត្រឹមថ្ងៃទី៤ ខែកញ្ញា ខាងមុខ បើមិនដូច្នោះទេ ស្ថាប័ននេះនឹងប្រឈមការរឹបអូសយកទ្រព្យសម្បត្តិ ហើយឈានដល់ការបិទអាជីវកម្មទាំងស្រុងតែម្ដង៕