ពលរដ្ឋនៅឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង ចោទនាយផ្នែករដ្ឋបាលជលផលកំពង់ប្រាសាទ ឈ្មោះ ឃីម ឡុង ថា បានទទួលសំណូក ២០ម៉ឺនរៀលជាថ្នូរនឹងការប្រគល់ឧបករណ៍នេសាទខុសច្បាប់ប្រភេទស្បៃមុង ចំនួនបីខ្សែឲ្យទៅជនល្មើសវិញ។ ក្រុមពលរដ្ឋ និងមន្ត្រីអង្គការក្រៅរដ្ឋាភិបាលចាត់ទុកទង្វើរបស់មន្ត្រីជំនាញនេះ ថាពុករលួយ និងជំរុញឲ្យពលរដ្ឋប្រព្រឹត្តបទល្មើស។
ក្រុមពលរដ្ឋឲ្យដឹងថា របាំងស្បៃមុងបីខ្សែប្រវែងចន្លោះពី ៥០ ទៅ ១៥០ម៉ែត្រ របស់ឈ្មោះ ទិន និងឈ្មោះ ម៉េត ដែលទើបលស់ពីមន្ត្រីជំនាញជលផលថ្ងៃទី២៤ ខែសីហា ចាប់ផ្ដើមដាក់ចាប់ត្រីល្អិតៗ នៅទីតាំងដដែលក្បែររបាំងជាង ៥០ខ្សែផ្សេងទៀត ឋិតនៅចំណុចទំនប់ថ្មីក្នុងភូមិស្ដីពន្លិច។ អ្នកទាំងពីរប្រមូលលុយម្នាក់ ១០ម៉ឺនរៀល ឲ្យទៅលោក ឃីម ឡុង នៅម៉ោងប្រហែល ៨យប់ ថ្ងៃទី២៤ ខែសីហា។
ពលរដ្ឋម្នាក់ដែលថ្លែងក្នុងលក្ខខណ្ឌសុំមិនបញ្ចេញឈ្មោះប្រាប់ថា កម្លាំងសមត្ថកិច្ចចម្រុះ ចុះបង្ក្រាបបទល្មើសនៅឃុំអំពិលទឹក ដោយដកហូតរបាំងទាំងបីខ្សែនៅពេលថ្ងៃមករក្សាទុកនៅផ្នែករដ្ឋបាលជលផលកំពង់ប្រាសាទ ហើយម្ចាស់របាំងបានមកលស់វិញនៅយប់ថ្ងៃដដែលនោះ។ លោកស្នើឲ្យសមត្ថកិច្ចពាក់ព័ន្ធចាត់វិធានការចំពោះមន្ត្រីដែលបានប្រព្រឹត្តអំពើល្មើសច្បាប់រូបនេះ៖ «ដល់ពេលល្ងាចម៉ោង ៨ ឬម៉ោង ៩ ជនល្មើសបានលស់យកស្បៃមុងវិញ ដោយម្នាក់ឲ្យលូស្បៃមុងមួយបង្គាប់យកលុយ ១០ម៉ឺនម្នាក់ទៀតមានលូស្បៃមុងពីរយកលុយ ១០ម៉ឺនដែរ។ អ៊ីចឹងខ្ញុំសំណូមពរដល់រដ្ឋាភិបាលសូមរឹតបន្តឹងមន្ត្រីអស់នេះកុំឲ្យខិលខូច ហើយសមគំនិតនឹងជនល្មើសដើម្បីការពារមច្ឆាជាតិសម្រាប់ប្រជាពលរដ្ឋខ្មែរយើងទាំងអស់គ្នា»។
អាស៊ីសេរី មិនអាចទាក់ទងនាយផ្នែករដ្ឋបាលជលផលកំពង់ប្រាសាទ លោក ឃីម ឡុង ដើម្បីបំភ្លឺតបនឹងការចោទប្រកាន់នេះបានទេ នៅថ្ងៃទី២៦ ខែសីហា ដោយទូរស័ព្ទចូលហើយពុំមានអ្នកទទួល។
ទោះជាយ៉ាងណា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង លោក ងិន ហ៊ុន ថា លោកមិនទាន់បានដឹងពីករណីសូកប៉ាន់ដើម្បីរំដោះយកឧបករណ៍នេសាទខុសច្បាប់នេះទេ ប៉ុន្តែលោកនឹងចាត់វិធានការចំពោះមន្ត្រីរបស់ខ្លួនបើរកឃើញថា មានកំហុសដូចការចោទប្រកាន់មែននោះ៖ «អត់បានជ្រាបទេ … ប៉ុន្តែជាទម្លាប់មន្ត្រីកាលណាចាប់បានហើយអាស្បៃមុងហ្នឹងអត់ឲ្យវិញទេ អត់ថ្នូរជាលុយទេ ព្រោះលុយ ២០ម៉ឺនរៀលតិចណាស់មិនអាចថ្នូរនឹងរបាំងហ្នឹងរួចទេ។ អូស..! អាហ្នឹងហើយដែលខ្ញុំដែលខ្ញុំថា បើយើងចាប់របស់គេហើយ យកទៅលក់វិញ អាហ្នឹងធ្វើឲ្យមានបទល្មើសកាន់តែកើនឡើង»។
មន្ត្រីសម្របសម្រួលសហគមន៍ជុំវិញបឹងទន្លេសាបរបស់អង្គការសម្ព័ន្ធភាពដើម្បីអភិរក្សធនធានជលផល (FACT) អ្នកស្រី នូ សារិម យល់ថា បើមន្ត្រីជំនាញបានប្រព្រឹត្តល្មើសដូចការចោទមែន គឺជាទង្វើខុសច្បាប់ស្ដីពីជលផលដែលមិនគួរលើកលែង។
លោកស្រីធ្លាប់ឮមន្ត្រីទទួលសំណូកពេលចុះបង្ក្រាបបទល្មើស ប៉ុន្តែកម្រឮករណីជនល្មើសទៅលស់យកឧបករណ៍នេសាទពីមន្ត្រីជំនាញណាស់៖ «សម្រាប់ជំនាញជលផល បើសិនចាប់ហើយ ទី១ក្នុងករណីដែលបានអប់រំដល់ជនល្មើសហ្នឹង ហើយមួយលើកជាពីរលើកហើយ និងបានធ្វើកិច្ចសន្យា ហើយជនល្មើសនៅតែប្រព្រឹត្តទៀត គាត់អាចក៏សាងសំណុំរឿងទៅតុលាការ ហើយវត្ថុតាំងដែលប្រមូលបានគាត់មានសិទ្ធិកម្ទេចចោល»។
មាត្រា១០៣ នៃច្បាប់ជលផលឆ្នាំ២០០៦ បានចែងផ្ដន្ទាទោសចំពោះមន្ត្រីរដ្ឋបាលជលផលដាក់ពន្ធនាគារពី ១ឆ្នាំ ទៅ ៣ឆ្នាំ និងពិន័យជាប្រាក់ពី ៥លានរៀល ទៅ ៥០លានរៀល ក្នុងករណីដែលមន្ត្រីជលផលផ្ដល់ការអនុញ្ញាតណាមួយផ្ទុយបទបញ្ញត្តិនៃច្បាប់នេះ និងករណីចូលរួមទាំងស្រុង ឬដោយប្រយោលក្នុងសកម្មភាពណាមួយនៃការធ្វើអាជីវកម្មជលផលផ្ទុយពីច្បាប់នេះជាដើម។ រីឯមាត្រា ១០៣ ត្រង់ប្រការ៥ នៃច្បាប់ស្ដីពីជលផលដដែលចែងថា មន្ត្រីរដ្ឋបាលជលផលដែលមិនបានរាយការណ៍ ឬមិនបានដាក់ពាក្យបណ្ដឹងចំពោះបទល្មើសជលផលថ្នាក់ទី១ ដែលកើតឡើងក្នុងរង្វង់សមត្ថកិច្ចរបស់ខ្លួនទាន់ពេលវេលា ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ ៣ឆ្នាំ និងពិន័យប្រាក់ចាប់ពី ៥លានរៀល ដល់ ៥០លានរៀល៕