គណៈកម្មការនីតិកម្ម និងយុត្តិធម៌នៃរដ្ឋសភា មិនទាន់ឆ្លើយតបនឹងសំណើរបស់ក្រុមតំណាងរាស្ត្រគណបក្សប្រឆាំងដែលសុំកែប្រែច្បាប់បោះឆ្នោត ដើម្បីបើកផ្លូវឲ្យមានការបើកការិយាល័យចុះឈ្មោះបោះឆ្នោត និងបោះឆ្នោតនៅបរទេស។
រហូតមកដល់ពេលនេះ សេចក្តីស្នើកែប្រែច្បាប់នេះស្ថិតក្នុងដៃរបស់គណៈកម្មការជំនាញ បន្ទាប់ពីវាត្រូវបញ្ជូនទៅកាលពីថ្ងៃទី២១ សីហា។
តំណាងរាស្ត្រគណបក្សសង្គ្រោះជាតិ លោក សុន ឆ័យ ឲ្យដឹងនៅថ្ងៃទី២៤ សីហា ថា បើតាមនីតិវិធី វាមិនមានការកំណត់រយៈពេលដែលគណៈកម្មការនេះត្រូវផ្តល់មតិយោបល់ត្រឡប់មកវិញនោះឡើយ៖ «គណៈកម្មការជំនាញ បើមានពេលពិគ្រោះក្នុងគណៈកម្មការគាត់ហើយ គាត់ហៅតំណាងអ្នកស្នើទៅជជែក ហើយបានគាត់ធ្វើសេចក្តីសរុបមួយហើយ ផ្ញើមកគណៈកម្មការអចិន្ត្រៃយ៍វិញ»។
លោក សុន ឆ័យ កត់សម្គាល់ថា ប្រសិនបើរដ្ឋាភិបាលស្នើកែប្រែច្បាប់ណាមួយ រដ្ឋសភាមិនសូវទុកយូរនោះទេ ហើយបើសេចក្តីស្នើធ្វើឡើងដោយគណបក្សប្រឆាំង វាត្រូវការពេលយូរ ហើយមិនសូវបានជោគជ័យឡើយ។ ទោះបីជាយ៉ាងណា លោករង់ចាំការឆ្លើយតបរបស់គណៈកម្មការជំនាញនៃរដ្ឋសភានេះ ហើយត្រៀមខ្លួនពិភាក្សាចរចា៖ «យើងអ្នកស្នើ មិនរឹងទេ។ បើត្រង់ណាមិនច្បាស់ ហើយគណៈកម្មការស្នើឲ្យកែតម្រូវ ឬបញ្ជាក់ ឬកែសម្រួលមាត្រា យើងនឹងធ្វើទៅតាមសំណើរបស់គាត់។ អ្វីសំខាន់ គឺការធ្វើច្បាប់នេះបើកឲ្យពលរដ្ឋយើងនៅក្រៅប្រទេស អាចបោះឆ្នោតបាន»។
អាស៊ីសេរី មិនអាចទាក់ទងតំណាងគណៈកម្មការនីតិកម្ម និងយុត្តិធម៌នៅថ្ងៃទី២៤ សីហា ដើម្បីសុំការបញ្ជាក់បន្ថែមបានទេ។
សមាជិករដ្ឋសភាមកពីគណបក្សសង្គ្រោះជាតិ ចំនួន ៣៣រូប កាលពីថ្ងៃទី១១ សីហា ស្នើកែប្រែខ្លឹមសារច្បាប់បោះឆ្នោតមួយចំនួន ដើម្បីបើកផ្លូវឲ្យពលរដ្ឋខ្មែរនៅក្រៅប្រទេសអាចចុះឈ្មោះបោះឆ្នោត និងបោះឆ្នោតបាននៅប្រទេសដែលខ្លួនកំពុងស្នាក់នៅ និងធ្វើការ។
មន្ត្រីគណបក្សកាន់អំណាចធ្លាប់លើកឡើងថា ការរៀបចំឲ្យមានការចុះឈ្មោះបោះឆ្នោត និងបោះឆ្នោតនៅក្រៅប្រទេស នឹងធ្វើឲ្យខូចប្រយោជន៍ពលករ។
សង្គមស៊ីវិលបានបញ្ជាក់ថា តំណាងរាស្ត្រគួរជំរុញឲ្យពលករកម្ពុជា នៅក្រៅប្រទេសទាំងនោះអាចចុះឈ្មោះបោះឆ្នោតបាន ដើម្បីឲ្យស្របតាមរដ្ឋធម្មនុញ្ញដែលចែងថា ពលរដ្ឋខ្មែរគ្រប់រូបមានសិទ្ធិស្មើគ្នា មានសិទ្ធិបោះឆ្នោត និងមានសិទ្ធិឈរឈ្មោះឲ្យគេបោះឆ្នោតជូន។
ទិន្នន័យរបស់ក្រសួងការងារ នៅឆ្នាំ២០១៦ បានបង្ហាញថា ក្នុងមួយឆ្នាំៗ ពលករចំណាកស្រុកផ្ញើប្រាក់មកឲ្យគ្រួសារនៅស្រុកកំណើតចំនួន ១ពាន់លានដុល្លារសហរដ្ឋអាមេរិក។
ពលករចំណាកស្រុកកម្ពុជា នៅបរទេសមានប្រហែលជិត ២លាននាក់ កំពុងធ្វើការក្នុងប្រទេសថៃ ជាង ៦ម៉ឺននាក់ទៀតកំពុងធ្វើការក្នុងប្រទេសកូរ៉េខាងត្បូង ជាង ៣ម៉ឺននាក់នៅប្រទេសម៉ាឡេស៊ី និងប្រហែលជាង ១ម៉ឺននាក់នៅប្រទេសជប៉ុន។
បន្ថែមពីនេះ ពលរដ្ឋខ្មែរប្រមាណជាងកន្លះលាននាក់ផ្សេងទៀត កំពុងរស់នៅបរទេស។ អ្នកទាំងនោះ ភាគច្រើនរស់នៅសហរដ្ឋអាមេរិក បារាំង អូស្ត្រាលី កាណាដា និងបណ្ដាប្រទេសមួយចំនួនក្នុងសហគមន៍អឺរ៉ុប។
បច្ចុប្បន្ន ប្រទេសចំនួន ៩៣ ក្នុងពិភពលោកដែលប្រកាន់របបលទ្ធិប្រជាធិបតេយ្យ បានរៀបចំឲ្យពលរដ្ឋរបស់ខ្លួនអាចបោះឆ្នោតនៅក្រៅប្រទេសបាន៕