ប្រជាពលរដ្ឋតាមបណ្តាស្រុកមួយចំនួនក្នុងខេត្តកំពង់ចាម ដែលធ្លាប់ស្តាប់កម្មវិធីផ្សេងៗ ពិសេសព័ត៌មានដែលផ្សាយចេញដោយវិទ្យុកំពង់ចាម យល់ឃើញថា រាជរដ្ឋាភិបាលមិនគួរបិទស្ថានីយវិទ្យុមួយនេះទេ។ ការលើកឡើងនេះ ក្រោយពេលក្រសួងព័ត៌មាន ចេញលិខិតមួយកាលពីថ្ងៃទី២១ សីហា ប្រកាសលុបចោលសិទ្ធិធ្វើអាជីវកម្មរបស់ម្ចាស់ស្ថានីយវិទ្យុមួយនេះ ដោយអះអាងថាបានរំលោភប្រកាសអនុញ្ញាតឲ្យធ្វើអាជីវកម្មរបស់ក្រសួងព័ត៌មាន។
ពលរដ្ឋរស់នៅខេត្តកំពង់ចាម មួយចំនួនស្នើឲ្យក្រសួងព័ត៌មាន ផ្តល់សិទ្ធិបន្តការផ្សាយដល់ស្ថានីយវិទ្យុកំពង់ចាម បន្តទៀត ដោយពួកគេយល់ថា វិទ្យុនេះបានផ្តល់ចំណេះដឹងច្រើនដល់ពួកគាត់។ ចំណេះដឹងទាំងនោះដូចជានិយាយអំពីផ្លូវច្បាប់ មាននាទីកសិកម្ម និងនាទីព័ត៌មានសង្គម ពិសេសវិទ្យុនេះបានផ្សាយបន្តព័ត៌មានអាស៊ីសេរី (RFA) និងសំឡេងសហរដ្ឋអាមេរិក (VOA) ព្រមទាំងវិទ្យុសំឡេងប្រជាធិបតេយ្យ វីអូឌី (VOD) ជាដើម។
ពលរដ្ឋនៅស្រុកចម្ការលើ ម្នាក់ថ្លែងក្នុងលក្ខខណ្ឌមិនបញ្ចេញឈ្មោះ បញ្ជាក់ថា ការបិទស្ថានីយវិទ្យុកំពង់ចាម គឺប៉ះពាល់ដល់ពួកគាត់ ដែលតែងតែស្តាប់កម្មវិធីផ្សេងៗ និងព័ត៌មានផង។ លោកយល់ថា មូលហេតុដែលគេបិទ គឺអាចដោយសារវិទ្យុកំពង់ចាម ទទួលផ្សាយបន្តព័ត៌មានអាស៊ីសេរី និងព័ត៌មានសំឡេងសហរដ្ឋអាមេរិក តែម្តង៖ «ផ្តល់ផលប្រយោជន៍ដល់ពលរដ្ឋដូចជាលោកគ្រូ ថាន សុរិទ្ធ ហ្នឹងបង្កើតជាកម្មវិធីជួយពលរដ្ឋ និងចាក់ប៉ុស្តិ៍អាស៊ីសេរី»។
វិទ្យុកំពង់ចាម ផ្សាយតាមរលកធាតុអាកាស អេហ្វ.អឹម (FM) ៩៩ ចុច ៧០ អាចគ្របដណ្ដប់ទៅដល់តំបន់ដាច់ស្រយាលក្នុងខេត្តកំពង់ចាម ហើយឆ្លងទៅតំបន់ក្នុងខេត្តផ្សេងទៀត ដូចជាខេត្តត្បូងឃ្មុំ និងខេត្តកំពង់ធំ ជាដើម។
មិនខុសគ្នានេះ ពលរដ្ឋនៅស្រុកកំពង់សៀម សុំមិនបញ្ចេញឈ្មោះដែរយល់ថា ការបិទស្ថានីយវិទ្យុមួយនេះ គឺប៉ះពាល់ពលរដ្ឋច្រើន ពិសេសពលរដ្ឋរស់នៅតាមជនបទ ពីព្រោះពួកគាត់មិនមានទូរស័ព្ទទំនើបសម្រាប់ប្រើអ៊ីនធឺណិតដើម្បីស្តាប់ព័ត៌មានសង្គម ដែលជាប្រយោជន៍សម្រាប់មនុស្សទូទៅ។ ក្រៅពីនេះ វាបង្ហាញពីការគាបសង្កត់ផ្នែកសិទ្ធិសេរីភាពថែមទៀតផង៖ «អ៊ីចឹងខ្ញុំ សំណូមពរឲ្យពលរដ្ឋទាំងអស់គ្នាមានការគាំទ្រ និងលើកទឹកចិត្តឲ្យវិទ្យុកំពង់ចាម ហ្នឹងបើកដំណើរការតទៅទៀតបង»។
កាលពីថ្ងៃទី២១ សីហា ក្រសួងព័ត៌មាន បានចេញលិខិតមួយ ហើយលិខិតនោះម្ចាស់ស្ថានីយវិទ្យុកំពង់ចាម ទទួលបាននៅថ្ងៃទី២៤ សីហា ដោយសម្រេចលុបចោលប្រកាសលេខ១៨២ ដែលចុះកាលពីថ្ងៃទី២៨ ខែមីនា ឆ្នាំ២០១៤ ដែលអនុញ្ញាតឲ្យលោក ផល សុជា ធ្វើអាជីវកម្មជំនួសអ្នកស្រី មៀច លក្ខណា។ ក្នុងប្រកាសរបស់ក្រសួងព័ត៌មាន កាលពីឆ្នាំ២០១៤ បញ្ជាក់ថា រាល់ដំណើរការផ្សាយត្រូវគោរពតាមរដ្ឋធម្មនុញ្ញ បញ្ញត្តិនៃច្បាប់ បទបញ្ជា កិច្ចសន្យា និងសេចក្តីណែនាំផ្នែកសោតទស្សន៍នៃប្រទេសកម្ពុជា។ ករណីជួលម៉ោងផ្សាយ ការនាំចូល ការដំឡើង និងផ្លាស់ប្ដូរឧបករណ៍ផ្សេងៗ ត្រូវមានការអនុញ្ញាតពីក្រសួង ហើយមុនដំណើរការផ្សាយ ត្រូវជូនដំណឹងមកក្រសួងព័ត៌មាន ដើម្បីត្រួតពិនិត្យបច្ចេកទេសធានាសុវត្ថិភាពនៃការប្រើរលកហ្វ្រេកង់ និងត្រូវចុះបញ្ជីបង់ថ្លៃប្រើហ្វ្រេកង់នៅក្រសួងប្រៃសណីយ៍ និងទូរគមនាគមន៍ ទៀតផង។ មិនតែប៉ុណ្ណោះ ម្ចាស់ស្ថានីយមិនត្រូវលក់ ជួល ឬផ្ទេរប្រកាសអនុញ្ញាតធ្វើអាជីវកម្មរបស់ក្រសួងព័ត៌មាន ទៅអ្នកដទៃឡើយ។
ការចេញសេចក្តីប្រកាសសម្រេចលុបចោលសិទ្ធិធ្វើអាជីវកម្មរបស់ម្ចាស់ស្ថានីយវិទ្យុមួយនេះ ក្រោមហេតុផលថា បានរំលោភប្រកាសអនុញ្ញាត និងកិច្ចសន្យាធ្វើអាជីវកម្មដែលតម្កល់ទុកនៅក្រសួងព័ត៌មាន។
ក្រោយពេលទទួលលិខិតប្រកាសរបស់ក្រសួងព័ត៌មាន នៅថ្ងៃទី២៤ សីហា ម្ចាស់ស្ថានីយវិទ្យុកំពង់ចាម ដែលពីមុនមានឈ្មោះថា វិទ្យុពាណិជ្ជកម្ម សម្រេចបិទការផ្សាយរបស់ខ្លួនទាំងស្រុងតែម្តង។
ម្ចាស់ស្ថានីយវិទ្យុកំពង់ចាម លោក ថាន សុរិទ្ធ ដែលទទួលសិទ្ធិធ្វើអាជីវកម្មបន្តពីលោក ផល សុជា មានប្រសាសន៍ថា ខាងលោកសោកស្តាយចំពោះការបិទស្ថានីយរបស់ខ្លួន។ លោកយល់ថា ការបិទស្ថានីយរបស់លោក គឺជារឿងនយោបាយច្រើនជាងការអនុវត្តច្បាប់ពិតប្រាកដ។ ម្យ៉ាងការបិទនេះ គឺប៉ះពាល់ដល់ពលរដ្ឋ ព្រមទាំងបុគ្គលិករបស់ខ្លួនទៀតផង៖ «បញ្ជាក់ថាវិទ្យុនៅក្នុងខេត្តកំពង់ចាម ទាំងអស់ គឺមានតែវិទ្យុ អេហ្វ.អឹម (FM) ៩៩ ចុច ៧០ វិទ្យុកំពង់ចាម មួយគត់ដែលគេប្រកាសបិទ មិនឲ្យធ្វើការផ្សព្វផ្សាយហ្នឹង»។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានអះអាងនៅព្រឹកថ្ងៃទី២៤ សីហា ថា ខាងក្រសួងបិទតែស្ថាប័នវិទ្យុណាដែលរំលោភច្បាប់ប៉ុណ្ណោះ។
មន្ត្រីសម្របសម្រួលសមាគមអាដហុក (ADHOC) លោក នាង សុវ៉ាត ដែលធ្លាប់បានធ្វើជាវាគ្មិននៅក្នុងកម្មវិធីរបស់ស្ថានីយវិទ្យុកំពង់ចាម យល់ថា ការបិទស្ថាប័នមួយនេះ គឺប៉ះពាល់ច្រើនដល់ពលរដ្ឋ ព្រោះពួកគាត់ទទួលបានចំណេះដឹង និងការអប់រំច្រើនពីស្ថាប័នមួយនេះ។ លោកសោកស្ដាយចំពោះការបិទស្ថាប័នវិទ្យុណាដែលផ្តល់ការអប់រំ និងចំណេះដឹងដល់ប្រជាពលរដ្ឋបែបនេះ។ លោកមិនអាចដឹងពីមូលហេតុផ្ទៃក្នុង ចំពោះការបិទស្ថានីយវិទ្យុនេះទេ ប៉ុន្តែបើក្រសួងយកហេតុផលនៃការរំលោភប្រកាសរបស់ខ្លួន ដោយលក់សិទ្ធិធ្វើអាជីវកម្មដល់អ្នកដទៃ ឬជួលម៉ោងផ្សាយដល់ស្ថាប័នដទៃ គឺមិនអាចឈានដល់ការបិទស្ថានីយនោះបានទេ ព្រោះត្រូវការពិភាក្សាគ្នា ព្រមទាំងធ្វើឡើងតាមជំហានៗជាមុនសិន ដូចជាការចេញលិខិតព្រមាន ឬហៅទៅណែនាំ និងចុងក្រោយទើបឈានដល់ដំណាក់កាលបិទស្ថានីយនោះជាផ្លូវការ មិនអាចចេញប្រកាសបិទភ្លាមៗបែបនេះទេ៕