អ្នកវិភាគ និងតំណាងសហជីព លើកឡើងថា យុទ្ធនាការជួបកម្មកររបស់លោកនាយករដ្ឋមន្ត្រី ហ៊ុន សែន នៅពេលនេះជារឿងល្អមួយ ដើម្បីឲ្យមេដឹកនាំដឹងសុខទុក្ខកម្មករដែលកំពុងតែប្រឈមនឹងបញ្ហាលំបាកនាពេលបច្ចុប្បន្ន។ ក៏ប៉ុន្តែពួកគេអះអាងថា បើសិនជាលោកនាយករដ្ឋមន្ត្រីពិតជាគិតគូរដល់កម្មករជាធំមែននោះ លោក ហ៊ុន សែន ប្រាកដជាទាមទារឲ្យអាជ្ញាធរពាក់ព័ន្ធ រួមទាំងតុលាការ រកយុត្តិធម៌ជូនកម្មករនៅផ្លូវវ៉េងស្រេង ដែលរងការបាញ់ប្រហារពីកងកម្លាំងប្រដាប់អាវុធកាលពីឆ្នាំ២០១៣ នោះហើយ។
ការលើកឡើងរបស់អ្នកវិភាគ និងតំណាងសហជីពនេះ ធ្វើឡើងនៅស្របពេលលោកនាយករដ្ឋមន្ត្រីកំពុងធ្វើយុទ្ធនាការចុះជួបកម្មកររោងចក្រកាត់ដេរ និងសន្យាថានឹងផ្ដល់ប្រាក់ឈ្នួលជូនកម្មករនៅឆ្នាំ២០១៨ ខាងមុខ ជាដើម។
លោកនាយករដ្ឋមន្ត្រី ហ៊ុន សែន អះអាងថា ប្រាក់ចំណូលពីវិស័យវាយនភណ្ឌកាត់ដេរបានកើតឡើងជាបន្តបន្ទាប់គិតចាប់ពីឆ្នាំ១៩៩៧ មក។
លោក ហ៊ុន សែន ថ្លែងទៅកាន់កម្មករនៅតំបន់សេដ្ឋកិច្ចក្នុងខណ្ឌពោធិ៍សែនជ័យ នាព្រឹកថ្ងៃទី២៣ សីហា ថា ប្រាក់ចំណូលពីវិស័យកាត់ដេរចំនួន ២០០លានដុល្លារនៅឆ្នាំ១៩៩៧ បានកើនដល់ជាង ៧ពាន់លានដុល្លារនាពេលបច្ចុប្បន្ន។ លោក ហ៊ុន សែន បញ្ជាក់ថា ប្រាក់ចំណូលដែលកើនឡើងជាបន្តបន្ទាប់នេះ គឺដោយសារតែលោកប្រើយុទ្ធសាស្ត្រ ៣សុំ គឺទី១ សុំឲ្យគេមកវិនិយោគនៅកម្ពុជា គឺយុទ្ធសាស្ត្ររក្សាចាស់បង្កើតថ្មី ទី២ សុំឲ្យគេមកទិញទំនិញពីកម្ពុជា និងទី៣ សុំឲ្យផ្ដល់ជំនួយមកកម្ពុជា។
ទន្ទឹមនឹងនេះ លោក ហ៊ុន សែន បានអំពាវនាវឲ្យកម្មករឈប់គាំទ្រក្រុម ៣កុំ ដែលលោកអាចចង់សំដៅទៅបក្សប្រឆាំង ទី១ កុំឲ្យគេមកវិនិយោគ ទី២ កុំឲ្យគេមកទិញទំនិញពីកម្ពុជា និងទី៣ កុំឲ្យផ្ដល់ជំនួយ។ លោកចាត់ទុកក្រុមនេះថាជាជនក្បត់ជាតិ ហើយលោកក៏ព្រមានដល់អ្នកដែលថាកម្ពុជា គ្មានការធ្វើ ឲ្យជំរុញកម្មករទៅធ្វើកម្មករនៅប្រទេសថៃ ដែរ៖ «»។
ក្រៅពីនេះទៀត លោក ហ៊ុន សែន ព្រមានថា មិនអនុញ្ញាតឲ្យធ្វើបាតុកម្មដូចកាលពីឆ្នាំ២០១៣ វិលត្រឡប់មកវិញទេ ហើយក៏មិនឲ្យមានទារ ៣ដែរ គឺទារដំឡើងប្រាក់ឈ្នួល ទារឲ្យចុះចេញ និងទារឲ្យធ្វើបាតុកម្មដែរ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មិនធ្វើអត្ថាធិប្បាយចំពោះការចោទប្រកាន់របស់លោក ហ៊ុន សែន អំពីរឿងក្បត់ជាតិចំពោះការលើកឡើងក្រុមបីកុំនោះទេ ប៉ុន្តែលោកបញ្ជាក់ថា ការជួបកម្មករនេះត្រូវធ្វើឡើងដោយស្មើភាពគ្នា ហើយគណបក្សសង្គ្រោះជាតិ នៅតែប្រកាន់ជំហរធ្វើនយោបាយឲ្យប្រទេសជាតិមានស្ថិរភាព និងសន្តិវិធី៖ «»។
កាលពីថ្ងៃទី២០ សីហា លោកនាយករដ្ឋមន្ត្រី ហ៊ុន សែន សន្យាថានឹងដំឡើងប្រាក់ឈ្នួលកម្មកររោងចក្រឲ្យបានដល់ ១៦៨ដុល្លារក្នុងមួយខែនៅឆ្នាំ២០១៨។ ក្រៅពីនេះ កម្មការិនីអាចជិះរថយន្តក្រុងសាធារណៈពីរឆ្នាំដោយឥតគិតថ្លៃ ចាប់ពីខែសីហា ឆ្នាំ២០១៧ ដល់ខែសីហា ឆ្នាំ២០១៩ ដោយគ្រាន់តែបង្ហាញកាតការងារ។ លោក ហ៊ុន សែន ក៏បានប្រកាសដែរថា ចាប់ពីខែមករា ឆ្នាំ២០១៨ ទៅ ថៅកែក្រុមហ៊ុនត្រូវទទួលខុសត្រូវបង់ថ្លៃសេវាគាំពារសុខភាពកម្មករ ១០០ភាគរយ រីឯចាប់ពីឆ្នាំ២០១៩ កម្មករកម្មការិនីនឹងទទួលបានប្រាក់ចូលនិវត្តន៍ដូចមន្ត្រីរាជការដែរ។
ប្រធានសហភាពការងារកម្ពុជា លោក អាត់ ធន មានប្រសាសន៍ថា ការចុះជួបកម្មករនេះជារឿងល្អមួយដែលលោកនាយករដ្ឋមន្ត្រីអាចដឹងពីសុខទុក្ខរបស់កម្មករ តែលោកបញ្ជាក់ថា ការចុះជួបនេះ លោកនាយករដ្ឋមន្ត្រីចង់ទាញការគាំទ្រពីកម្មករមកវិញ។ ចំពោះការសន្យាដំឡើងប្រាក់ឈ្នួលវិញ លោក អាត់ ធន់ អះអាងថា មិនទាន់គ្រប់គ្រាន់សម្រាប់កម្មករចំណាយប្រចាំខែទេនៅពេលកម្ពុជា មានអតិផរណាកើនឡើងជាបន្តបន្ទាប់នោះ៖ «»។
អ្នកវិភាគលើកឡើងថា រដ្ឋាភិបាលកំពុងតែធ្វើនយោបាយប្រជាភិថុតិជាមួយកម្មករ ពីព្រោះថាបើសិនជារដ្ឋាភិបាលគិតគូរពីកម្មករដូចដែលលោកនាយករដ្ឋមន្ត្រីថ្លែងទៅកាន់កម្មករមែននោះ មិនមែនលោកនាយករដ្ឋមន្ត្រីបិទសិទ្ធិសេរីភាពធ្វើបាតុកម្មនោះដែរ ហើយការបាញ់ប្រហារកម្មករកាលពីឆ្នាំ២០១៣ មកទល់ពេលនេះ មិនទាន់មានយុត្តិធម៌នៅឡើយ។
អ្នកឃ្លាំមើលការអភិវឌ្ឍសង្គម លោកបណ្ឌិត មាស នី មានប្រសាសន៍ថា រដ្ឋាភិបាលមិនអាចទប់ស្កាត់កម្មករក្នុងការធ្វើបាតុកម្មបាននោះទេ បើសិនជាអំពើយុត្តិធម៌ ការគាបសង្កត់កម្មករនៅតែកើតឡើង។ លោកបញ្ជាក់ថា ប្រាក់ចំណូលកម្មករនេះជាប្រាក់ចំណូលមួយផ្នែកធំសម្រាប់លើកស្ទួយសេដ្ឋកិច្ចជាតិ ដែលបញ្ហានេះ អាជ្ញាធររដ្ឋាភិបាលមិនត្រូវគាបសង្កត់ និងប្រើអំពើហិង្សាលើកម្មករដូចដែលបានធ្វើកាលពីឆ្នាំ២០១៣ នៅផ្លូវវ៉េងស្រេង នោះទេ។
របាយការណ៍រដ្ឋាភិបាលបង្ហាញថា រោងចក្រកាត់ដេរមានចំនួន ៦៤រោងចក្រនៅឆ្នាំ១៩៩៧ បានកើនឡើងជាង ១ពាន់រោងចក្រនៅឆ្នាំ២០១៧ និងមានកម្មករជិត ៨សែននាក់ ហើយប្រាក់ខែគោលរបស់កម្មករក្នុងឆ្នាំ២០១៧ គឺចំនួន ១៥៣ដុល្លារក្នុងមួយខែ។ ខាងសហជីពអះអាងថា បច្ចុប្បន្ននេះ តំណាងសហជីព និងខាងសមាគមរោងចក្រកាត់ដេរនៅកម្ពុជា កំពុងតែចរចាគ្នាអំពីការដំឡើងប្រាក់ឈ្នួលជូនកម្មករនេះនៅឡើយ ដែលខាងសហជីពទាមទារខ្ពស់ជាងការសន្យារបស់លោកនាយករដ្ឋមន្ត្រី ដែលថានឹងផ្ដល់ជូន ១៦៨ដុល្លារក្នុងមួយខែនោះ ដើម្បីឲ្យសមតុល្យ និងតម្លៃទំនិញកំពុងតែកើនឡើងនៅលើទីផ្សារ៕