អគ្គនាយកនៃអគ្គនាយកដ្ឋានពន្ធដារ លោក គង់ វិបុល ថា លោកកំពុងរង់ចាំលិខិតរបស់ម្ចាស់កាសែត ឌឹ ខេមបូឌា ដេលី (The Cambodia Daily) ដែលស្នើចង់ជួបលោកពន្យល់ពីការគិតពន្ធលើកាសែតនេះ រហូតដល់ជាង ៦លានដុល្លារអាមេរិក។
លោក គង់ វិបុល ថ្លែងដូច្នេះនៅក្នុងពិធីចុះហត្ថលេខាលើកិច្ចព្រមព្រៀងប្រេងកាតសម្រាប់ការអភិវឌ្ឍអណ្ដូងប្រេងកាតនៅប្លុកអេ (A) នារាជធានីភ្នំពេញ នៅព្រឹកថ្ងៃទី២៣ សីហា។
ម្ចាស់កាសែត ឌឹ ខេមបូឌា ដេលី អ្នកស្រី ដេប្រ៉ា គ្រីស័រ-ស្ទាល (Deborah Krisher-Steele) នៅថ្ងៃទី២៣ ខែសីហា បានដាក់លិខិតមួយច្បាប់ទៅលោក គង់ វិបុល ដើម្បីស្នើឲ្យមានជំនួបមួយរវាងមេពន្ធដារមួយនេះ ជាមួយក្រុមប្រឹក្សាភិបាល និងអ្នកចាត់ការទូទៅរបស់កាសែត ឌឹ ខេមបូឌា ដេលី គឺលោក ដាហ្គ្លាស់ ស្ទាល (Douglas Steele) ឲ្យបានឆាប់បំផុត ក្នុងការជជែកពីការគិតពន្ធយ៉ាងច្រើនឥតឧបមា ចំពោះកាសែតអាមេរិកាំងនេះ។
លិខិតរបស់ម្ចាស់កាសែតនេះបន្តថា អ្នកស្រីស្នើឲ្យអង្គភាពពន្ធដារបង្ហាញពីការធ្វើសវនកម្មតម្លាភាពមួយ ដែលបញ្ជាក់ថា កាសែតរបស់អ្នកស្រីជំពាក់ពន្ធរដ្ឋជាង ៦លានដុល្លារសហរដ្ឋអាមេរិក ក្នុងរយៈពេលប្រមាណ ១០ឆ្នាំ។
ទោះជាយ៉ាងណាក៏ដោយ អ្នកស្រីអះអាងថា កាសែតអ្នកស្រីមិនបដិសេធបង់ពន្ធលើចំនួនដែលកំណត់ពីអគ្គនាយកដ្ឋានពន្ធដារទេ បើសិនការធ្វើសវនកម្មត្រឹមត្រូវមួយបង្ហាញថា កាសែតអ្នកស្រីជំពាក់រដ្ឋក្នុងចំនួនទឹកប្រាក់នោះមែន ហើយព្រមព្រៀងផ្ដល់រាល់ព័ត៌មានដែលស្ថាប័នពន្ធដារនេះ ត្រូវការថែមទៀតផង។
ប៉ុន្តែអ្នកស្រីមិនសប្បាយចិត្តចំពោះលោក គង់ វិបុល ដែលអ្នកស្រីថា បានបំពានមាត្រា ៩៤ នៃច្បាប់ពន្ធដាររហូតដល់ទៅពីរលើក ព្រោះធ្វើឲ្យបែកធ្លាយការសម្ងាត់នៃព័ត៌មានពាក់ព័ន្ធនឹងអ្នកបង់ពន្ធនេះ តាមរយៈកាសែតស្និទ្ធនឹងរដ្ឋាភិបាល គឺអង្គភាពព័ត៌មានហ្វ្រេសញូវ (Fresh News) ខណៈម្ចាស់កាសែតរូបនេះថា ខ្លួនមិនដែលទទួលបានលិខិតបង់ពន្ធនេះពីអគ្គនាយកដ្ឋានពន្ធដារផ្ទាល់ឡើយ។
ចំពោះការបែកធ្លាយឯកសារពន្ធនេះដែរ ម្ចាស់កាសែតរូបនេះ ក៏ស្នើឲ្យលោក គង់ វិបុល ធ្វើការពន្យល់ផង ដែលអ្នកស្រីថា ចំណាត់ការនេះ វាបានប៉ះពាល់ដល់ការរកស៊ីរបស់អ្នកស្រី៕