បច្ចុប្បន្ន តំបន់ជាច្រើនក្នុងខេត្តឧត្តរមានជ័យ នៅតែរងការគំរាមកំហែងពីគ្រាប់មីនដែលកប់នៅក្រោមដី និងយុទ្ធភណ្ឌមិនទាន់ផ្ទុះដែលសេសសល់ពីសម័យសង្គ្រាម។ ចាប់ពីអំឡុងខែមិថុនា រហូតមកដល់ថ្ងៃទី២១ ខែសីហា នេះ មានពលរដ្ឋនៅខេត្តឧត្តរមានជ័យ ចំនួន ២នាក់បានស្លាប់ដោយសារការផ្ទុះមីន និងយុទ្ធភណ្ឌមិនទាន់ផ្ទុះ ហើយ ២នាក់ផ្សេងទៀតបានរងរបួស។
អាជ្ញាធរខេត្តឧត្តរមានជ័យ អំពាវនាវឲ្យពលរដ្ឋរស់នៅតាមតំបន់ជាប់ព្រំដែនខ្មែរ-ថៃ ត្រូវប្រុងប្រយ័ត្នចំពោះបញ្ហាគ្រាប់មីន និងយុទ្ធភណ្ឌមិនទាន់ផ្ទុះដែលសេសសល់ពីសង្គ្រាម ហើយកប់ក្រោមដីក្នុងរដូវវស្សាដែលមានភ្លៀងធ្លាក់ជោកជាំដី ងាយនឹងធ្វើឲ្យផ្ទុះបង្កគ្រោះថ្នាក់។
អភិបាលខេត្តឧត្តរមានជ័យ គឺលោក ស ថាវី។ លោកមានប្រសាសន៍នៅរសៀលថ្ងៃច័ន្ទ ទី២១ ខែសីហា ថា លោកតែងប្រាប់ទៅមន្ត្រីថ្នាក់ស្រុក-ក្រុង ឃុំ-សង្កាត់ ឲ្យចុះអប់រំប្រជាពលរដ្ឋឲ្យយល់ដឹងអំពីគ្រោះថ្នាក់ដោយសារគ្រាប់មីន និងយុទ្ធភណ្ឌមិនទាន់ផ្ទុះជាញឹកញាប់ ដោយសារតែតំបន់ជាច្រើននៃខេត្តនេះសម្បូរគ្រាប់មីន និងយុទ្ធភណ្ឌមិនទាន់ផ្ទុះដែលសេសសល់ពីសម័យសង្គ្រាម ចាប់ពីអំឡុងទសវត្សរ៍ឆ្នាំ១៩៧៥ រហូតមកដល់ឆ្នាំ១៩៩៨។
លោក ស ថាវី បញ្ជាក់ថា ថ្វីត្បិតតែបច្ចុប្បន្នកម្លាំងរបស់មជ្ឈមណ្ឌលកម្ចាត់មីនកម្ពុជា (CMAC) និងអង្គការផ្សេងៗជួយបោសសម្អាតមីនពីផ្ទៃដីជាច្រើនមកហើយក៏ដោយ ក៏មិនទាន់ប្រាកដថាផ្ទៃដីទាំងនោះមានសុវត្ថិភាពទាំងស្រុងនៅឡើយទេ៖ «ជួនកាលកន្លែងខ្លះក្រុមដោះមីនធ្លាប់ដោះទៅហើយ ដែលយើងគិតថាអស់ ប៉ុន្តែនៅរដូវវស្សាមានទឹកហូរច្រោះ ស្រាប់តែឃើញមីននៅលើគោកតែម្ដង»។
ការអំពាវនាវរបស់អាជ្ញាធរខេត្តនេះ ដោយសារតែរយៈពេល ២ខែជាប់គ្នាមានគ្រោះថ្នាក់ដោយសារគ្រាប់មីន និងយុទ្ធភណ្ឌមិនទាន់ផ្ទុះចំនួន ២លើក នៅពេលដែលពលរដ្ឋទៅធ្វើស្រែ និងចូលព្រៃដើម្បីប្រកបរបរចិញ្ចឹមជីវិត។
កាលពីថ្ងៃទី១៧ ខែសីហា អនុប្រធានភូមិដងទង់ ក្នុងសង្កាត់កូនក្រៀល ក្រុងសំរោង ម្នាក់ឈ្មោះ សេង ស្រឿន អាយុ ៥៥ឆ្នាំ បានស្លាប់ និងពលរដ្ឋ ២នាក់ផ្សេងទៀតរងរបួសនៅពេលនាំគ្នាដើរដកផ្សិតព្រៃលើខ្នងភ្នំដងរែក ជិតព្រំដែនខ្មែរ-ថៃ ត្រង់ម្ដុំបង្គោលឡាក់លេខ១០ និងលេខ១១។
នាយប៉ុស្តិ៍នគរបាលសង្កាត់កូនក្រៀល លោក ប៉ាត គីន មានប្រសាសន៍ថា ហេតុការណ៍ផ្ទុះមីនស្លាប់ និងរបួសនោះ កើតឡើងកាលពីវេលាម៉ោង ៦ព្រឹកថ្ងៃទី១៧ ខែសីហា៖ «តាមព័ត៌មានដែលខ្ញុំសាកសួរពីមូលដ្ឋាន គឺជនរងគ្រោះទាំងនោះនាំគ្នាដើរដកផ្សិតព្រៃ និងបោចវល្លិ។ បងប្អូននៅតាមជនបទភាគច្រើនចូលព្រៃដើម្បីរករបរចិញ្ចឹមជីវិត»។
កាលពីថ្ងៃទី២៧ ខែមិថុនា បុរសអ្នកភូមិខ្ទុំ ម្នាក់ឈ្មោះ យីង យឿម អាយុ ៦៩ឆ្នាំបានស្លាប់ដោយសារតែកាប់ដីដំបូកប៉ះចំគ្រាប់មិនទាន់ផ្ទុះ នៅពេលដែលគាត់ទៅធ្វើស្រែម្ដងមកហើយ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន ជំរុញឲ្យអាជ្ញាធរគ្រប់ជាន់ថ្នាក់គួរតែសកម្មក្នុងការផ្សព្វផ្សាយឲ្យពលរដ្ឋប្រុងប្រយ័ត្នចំពោះគ្រោះថ្នាក់ដោយសារគ្រាប់មីន ពីព្រោះតែបច្ចុប្បន្នតំបន់ជាច្រើននៃខេត្តនេះនៅមានគ្រាប់មីន និងយុទ្ធភណ្ឌមិនទាន់ផ្ទុះនៅកប់ក្រោមដីនៅឡើយ។
មន្ត្រីស្រង់ទិន្នន័យជនរងគ្រោះដោយសារគ្រាប់មីន និងយុទ្ធភណ្ឌមិនទាន់ផ្ទុះខេត្តឧត្តរមានជ័យ លោក អូន លីហុង ធ្លាប់អះអាងថា ក្នុងរយៈពេល ៨ខែឆ្នាំ២០១៧ នេះ មានជនរងគ្រោះដោយសារគ្រាប់មីន និងយុទ្ធភណ្ឌមិនទាន់ផ្ទុះចំនួនប្រមាណ ១៣នាក់ ក្នុងចំណោមនោះជនរងគ្រោះ ៣នាក់បានស្លាប់៕