លោកនាយករដ្ឋមន្ត្រី ហ៊ុន សែន អះអាងនៅថ្ងៃទី១៤ សីហា ថា ការដែលគេមើលឃើញលោកឱនក្បាលទៅជួបនាយករដ្ឋមន្ត្រី ឡាវ ដើម្បីដោះស្រាយរឿង ឲ្យកងទ័ពឡាវដកចេញពីទឹកដីកម្ពុជានៅជាប់ព្រំដែនឡាវ ខេត្តស្ទឹងត្រែងនោះ មិនមែនជារឿងចាញ់ប្រៀបអ្វីនោះទេ ប៉ុន្តែជារឿងទំនាក់ទំនងការទូតធំណាស់ ដែលលោកប្រើវិធីសាស្ត្រទន់ភ្លន់ ក្នុងការដោះស្រាយរវាងប្រទេសជាមិត្តទាំងពីរ។
លោក ហ៊ុន សែន អះអាងនៅក្នុងពិធីចែកសញ្ញាប័ត្រឲ្យនិស្សិតថា កងទ័ពឡាវ បានដកទ័ពភ្លាមៗនៅថ្ងៃទី១២ សីហា គឺក្រោយពីលោកបានជួបនាយករដ្ឋមន្ត្រីឡាវ នៅថ្ងៃដដែលនោះ។
លោក ហ៊ុន សែន បន្ថែមថា ការបញ្ជាកងទ័ពឲ្យទៅព្រំដែនឡាវភា្លមៗ កាលពីរសៀលថ្ងៃទី១១ សីហានោះ ដើម្បីប្រយុទ្ធជាមួយកងទ័ពឡាវ បើសិនជាមិនដកចេញពីទឹកដីកម្ពុជានោះ គឺជាការបញ្ជាចាំបាច់ ហើយគ្មានអ្នកណាធំជាងលោកនោះទេ ដែលជាឧត្ដមសេនីយ៍ផុតលេខផ្កាយមាស៥។ យ៉ាងនេះក្ដី លោក ហ៊ុន សែន បញ្ជាក់ថា លោកមិនចង់បង្កសង្គ្រាមជាមួយប្រទេសជាមិត្តរឿងបញ្ហាព្រំដែននេះទេ ទាំងព្រំដែនកម្ពុជា-ឡាវ និងកម្ពុជា-ថៃ។ តែបញ្ហាព្រំដែននេះ លោកចង់បានការដោះស្រាយដោយសន្តិវិធី។
ចំពោះករណីសមត្ថកិច្ចចាប់ខ្លួន លោក សួន សេរីរដ្ឋា ប្រធានគណបក្សអំណាចខ្មែរ លោក ហ៊ុន សែន អះអាងថា ការចាប់លោក សួន សេរីរដ្ឋា បានកាន់តែឆាប់ គឺកាន់តែល្អ ព្រោះថា នៅខាងក្រៅគុក លោក សួន សេរីរដ្ឋា នឹងមិនមានសុវត្ថិភាពទេ ដោយសារតែលោកបានប្រមាថកងទ័ពកម្ពុជា។ លោក ហ៊ុន សែន ព្រមានថា លោក សួន សេរីរដ្ឋា នៅមានរឿងច្រើនទៀត ពិសេសគឺឯកសារដែលត្រូវបានគេទម្លាយរឿងប្រមាថព្រះមហាក្សត្រ។ បញ្ហាទាំងអស់នេះ លោកបញ្ជាក់ថា តើគណបក្សអំណាចខ្មែររបស់លោក សួន សេរីរដ្ឋា នឹងត្រូវរំលាយដែរឬយ៉ាងណា?
សូមរង់ចាំអាន និងស្ដាប់ព័ត៌មានពិស្ដារ...