Clik here to view.
នៅឯខេត្តព្រះវិហារ ក្រុមជនជាតិដើមភាគតិចអំបូរកួយ ប្រមាណជិត ៥០០នាក់ មកពីតាមបណ្ដាស្រុកបានជួបជុំគ្នាប្រារព្ធទិវាសិទ្ធិជនជាតិដើមភាគតិចដូចនៅតាមបណ្ដាខេត្តមួយចំនួនទៀតដែរ។ ប៉ុន្តែពួកគេបានអាប់អន់ចិត្តនៅពេលដែលអាជ្ញាធរខេត្តព្រះវិហារ បានឱ្យពួកគេរុះរើចេញនូវពាក្យស្លោកខ្លះ ដែលបានចងនៅតាមរោងវេទិកានៃការប្រារព្ធទិវាសិទ្ធិនោះមក។
ក្រុមជនជាតិដើមភាគតិចកួយខ្លះ នៅសហគមន៍ឃុំប្រមេរ នៃស្រុកត្បែងមានជ័យ បានរិះគន់អាជ្ញាធរខេត្តព្រះវិហារ ថាបានបង្ខំឱ្យពួកគេរុះរើចេញនូវបដាពាក្យស្លោកចំនួន ៣ផ្ទាំង ដែលដាក់តាំងនៅនឹងរោងវេទិកាប្រារព្ធទិវាសិទ្ធិរបស់ពួកគេកាលពីព្រឹកថ្ងៃពុធ ទី៩ ខែសីហា។
តំណាងជនជាតិដើមភាគតិចកួយម្នាក់ នៅឃុំប្រមេរ នៃស្រុកត្បែងមានជ័យ គឺអ្នកស្រី ទេព ទឹម។ អ្នកស្រីមានប្រសាសន៍នៅរសៀលថ្ងៃពុធ ទី៩ ខែសីហា ថា អាជ្ញាធរខេត្តព្រះវិហារ នៅមិនទាន់គោរពសិទ្ធិរបស់ជនជាតិដើមភាគតិចឱ្យបានទូលំទូលាយនៅឡើយទេ។
ស្ត្រីដដែលបញ្ជាក់ថា មូលហេតុដែលគាត់យល់ឃើញដូច្នេះ ដោយសារតែកាលពីព្រឹកថ្ងៃដដែលនេះ ក្នុងពេលដែលពួកគាត់រួមគ្នាប្រារព្ធទិវាសិទ្ធិជនជាតិដើមភាគតិចលើកទី២៣ គឺគណៈអធិបតីដែលមកពីមន្ទីរអភិវឌ្ឍន៍ជនបទ បានឱ្យពួកគាត់រុះរើបដាពាក្យស្លោកចំនួន ៣ផ្ទាំង ចេញពីវេទិកានោះវិញ បើមិនដូច្នេះទេ គឺអាជ្ញាធរមិនអនុញ្ញាតឱ្យពិធីប្រព្រឹត្តទៅបានឡើយ។ បដាពាក្យស្លោកទាំង ៣ផ្ទាំងនោះ មានខ្លឹមសារដូចជា "យើងជាម្ចាស់ទឹកដី" "គោរពសិទ្ធិដីធ្លីជាបន្ទាន់" និង "ការអភិវឌ្ឍត្រូវមានការព្រមព្រៀងពីសហគមន៍ជនជាតិដើមភាគតិចជាមុន"។
អ្នកស្រី ទេព ទឹម៖ «មន្ទីរអភិវឌ្ឍន៍ដែលមកចូលរួមប្រារព្ធទិវាសិទ្ធិជនជាតិដើមភាគតិចនោះ បានសុំសម្រួលថា អាជ្ញាធរខេត្តព្រះវិហារ ឱ្យដកចេញបដាទាំង៣ចំណុចហ្នឹង ពីព្រោះមិនមែនម្ចាស់ទឹកដីតែជនជាតិដើមភាគតិចទេ»។
ក៏ប៉ុន្តែមន្ត្រីរដ្ឋាភិបាលបានបដិសេធថា គេពុំមានសិទ្ធិបញ្ជាឱ្យសហគមន៍ដកបដាពាក្យស្លោកទាំងនោះចេញឡើយ។
ប្រធានមន្ទីរអភិវឌ្ឍន៍ជនបទខេត្តព្រះវិហារ ដែលចូលរួមជាគណៈអធិបតីនៃពិធីនោះ លោក សេង សារី មានប្រសាសន៍ថា លោកមិនបានបញ្ជាឱ្យសហគមន៍ដកបដាពាក្យស្លោកមួយចំនួនចេញពីរោងវេទិកានៃការប្រារព្ធទិវាសិទ្ធិជនជាតិដើមភាគតិចនោះទេ គឺសាលាខេត្តព្រះវិហារ បានចាត់ឱ្យមន្ត្រីផ្នែករដ្ឋបាលខ្លះ មកបញ្ជាឱ្យដោះចោលនូវបដាពាក្យស្លោកមួយចំនួនដែលគេយល់ថា ខុសប្រក្រតីប៉ុណ្ណោះ៖ «ខ្ញុំគ្រាន់តែសម្របសម្រួល ពីព្រោះខ្ញុំជាគណៈអធិបតី។ លោកអាចសួរទៅសាលាខេត្តព្រះវិហារវិញ ពីព្រោះខ្ញុំជាអ្នកជំនាញ ខ្ញុំមិនដែលគិតរឿងហ្នឹងទេ»។
ទោះជាយ៉ាងណា អាស៊ីសេរី មិនអាចទាក់ទងអភិបាលខេត្ត និងមន្ត្រីរដ្ឋបាលសាលាខេត្តព្រះវិហារ ដើម្បីសុំការអធិប្បាយជុំវិញបញ្ហាដែលជនជាតិដើមភាគតិចរិះគន់នោះ បានថាយ៉ាងណានៅឡើយ នៅថ្ងៃទី៩ ខែសីហា។
ចំណែកមន្ត្រីផ្នែកតស៊ូមតិរបស់អង្គការពន្លកខ្មែរ ដែលជ្រោមជ្រែងសហគមន៍ ក្នុងការប្រារព្ធទិវាសិទ្ធិជនជាតិដើមភាគតិចនោះ លោក ប៉ិក សោភ័ណ មានប្រសាសន៍ថា ការប្រារព្ធទិវាសិទ្ធិជនជាតិដើមភាគតិចនៅខេត្តព្រះវិហារ ឆ្នាំនេះ លោកសង្កេតឃើញថា មន្ត្រីរដ្ឋាភិបាលហាក់ដូចជាចូលរួមមិនទូលំទូលាយ ធ្វើឱ្យសហគមន៍ជនជាតិដើមភាគតិចជាច្រើនដែលមកចូលរួម មានការភ័យខ្លាចដោយសារតែអាជ្ញាធរបានដាក់ពង្រាយកម្លាំងប៉ូលិស និងកងរាជអាវុធហត្ថជាច្រើននៅជិតកន្លែងប្រារព្ធពិធីនោះជាដើម៕
