ប្រភពពីពលរដ្ឋនៅឃុំពង្រ ស្រុកចុងកាល់ នៃខេត្តឧត្តរមានជ័យ ឲ្យដឹងថា បច្ចុប្បន្ននេះមានជនចំណូលថ្មីជាច្រើនបានចូលទៅកាប់បំផ្លាញព្រៃឈើនៅជិតតំបន់ដែលពួកគេរស់នៅ ដើម្បីរុករានយកដីធ្វើជាកម្មសិទ្ធិឯកជន។
ក្រុមអ្នកភូមិនិយាយថា ក្រុមមនុស្សចំណូលថ្មីទាំងនោះមិនដឹងមកពីទីណាឡើយ គឺខ្លះបានយកត្រាក់ទ័រឈូសព្រៃ ហើយយកដីវាស់ចែកគ្នាដោយមិនឃើញអាជ្ញាធរណាមួយចេញមុខបង្ក្រាបទេ។
ពលរដ្ឋខ្លះនៅភូមិស្រះកែវ ឃុំពង្រ បង្ហាញការព្រួយបារម្ភថា ប្រសិនបើអាជ្ញាធរមូលដ្ឋាន និងមន្ត្រីរដ្ឋបាលព្រៃឈើមិនចុះទៅពិនិត្យមើលសកម្មភាពកាប់បំផ្លាញព្រៃនៅចន្លោះដីអតីតក្រុមហ៊ុន លី យ៉ុងផាត់ និងដីព្រៃសហគមន៍តាជួង ឲ្យបានទាន់ពេលទេ មិនយូរមិនឆាប់ ព្រៃឈើទីនោះនឹងវិនាសហិនហោចគ្មានសល់។
ការព្រួយបារម្ភបានកើតឡើងបន្ទាប់ពីគេដឹងថា បច្ចុប្បន្ននេះមានមនុស្សចំណូលថ្មីជាច្រើនមិនដឹងមកពីណា បាននាំគ្នាទៅកាប់ព្រៃជាច្រើនហិកតារ ដោយអ្នកខ្លះមានទាំងប្រើត្រាក់ទ័ររុញផងដើម្បីយកដីទៅចែកគ្នាធ្វើជាកម្មសិទ្ធិឯកជន។
បុរសម្នាក់ក្នុងចំណោមអ្នកភូមិស្រះកែវ ជាច្រើនទៀតដែលសុំមិនបញ្ចេញឈ្មោះ មានប្រសាសន៍នៅរសៀលថ្ងៃអាទិត្យ ទី៦ ខែសីហា ថា ជារៀងរាល់ថ្ងៃ គាត់ឃើញក្រុមមនុស្សចំណូលថ្មីបាននាំគ្នាជាច្រើនចូលទៅកាប់ព្រៃនៅតំបន់ចុងវាំង ចន្លោះអតីតដីក្រុមហ៊ុន លី យ៉ុងផាត់ និងសហគមន៍ការពារព្រៃឈើតាជួង ហើយកាប់បំផ្លាញព្រៃឈើយកដីចែកគ្នា។
បុរសដដែលបញ្ជាក់ថា គាត់មានការព្រួយបារម្ភចំពោះការបាត់បង់ព្រៃឈើនៅទីនោះ ប៉ុន្តែគាត់មិនហ៊ានទៅសាកសួរជនទាំងនោះថាមកពីទីណាឡើយ ពីព្រោះតែគាត់មិនស្គាល់គេ៖ «មិនដឹងជាមនុស្សមកពីណាទេ គេយកត្រាក់ទ័រទៅឈូសព្រៃយកដីចែកគ្នា។ ព្រៃឈើស្រស់ៗគេកាប់រំលំបម្រុងយកដីធ្វើស្រែធ្វើចម្ការ»។
អ្នកភូមិស្រះកែវ អំពាវនាវឲ្យអាជ្ញាធរស្រុកចុងកាល់ និងខេត្តឧត្តរមានជ័យ គួរចុះទៅពិនិត្យមើលសកម្មភាពកាប់រានព្រៃឈើទីនោះ ថាតើមានច្បាប់អនុញ្ញាតដែរឬក៏យ៉ាងណា?
រហូតមកដល់ពេលនេះ អាជ្ញាធរឃុំពង្រ និងស្រុកចុងកាល់ មិនទាន់បានចុះទៅពិនិត្យឲ្យច្បាស់ទេថា តើក្រុមមនុស្សចំណូលថ្មីដែលទៅកាប់បំផ្លាញព្រៃឈើនោះមកពីណា? គឺបានត្រឹមតែសន្និដ្ឋានប៉ុណ្ណោះ។
មេឃុំពង្រ លោក ប៉ាន់ ឃាន់ មានប្រសាសន៍ថា លោកមិនបានដឹងច្បាស់ឡើយថាអ្នកដែលទៅកាប់ព្រៃឈើនៅតំបន់ចុងវាំងនោះ ជាអ្នកណាទេ ប៉ុន្តែលោកយល់ថា ប្រហែលជាម្ចាស់ដីដែលមេឃុំមុនបានចុះហត្ថលេខាប្រគល់ឲ្យគេរួចហើយ៖ «ខ្ញុំដូចជាមិនទាន់បានដឹងអំពីសកម្មភាពកាប់ព្រៃនៅឡើយ ប៉ុន្តែខ្ញុំដឹងថា នៅតំបន់ចុងវាំងនោះ ពីមុនគឺមេឃុំបានចែកឲ្យពលរដ្ឋកាប់គាស់ធ្វើចម្ការដាំដំឡូងហើយ»។
ថ្វីត្បិតតែមេឃុំពង្រ អះអាងដូច្នេះ ក៏ប៉ុន្តែលោកនៅមិនទាន់បានចុះទៅពិនិត្យមើលការកាប់បំផ្លាញព្រៃឈើនៅទីនោះនៅឡើយទេ។
ចំណែកអភិបាលស្រុកចុងកាល់ លោក រិទ្ធី ប៉ាក មានប្រសាសន៍ថា រហូតមកដល់ពេលនេះ លោកមិនទាន់បានទទួលព័ត៌មានស្ដីពីការកាប់បំផ្លាញព្រៃឈើនោះយ៉ាងណាទេ។ លោកអភិបាលស្រុកដដែលបញ្ជាក់ថា ដីតំបន់នោះ ជាច្រើនឆ្នាំមុនគឺកងទាហានធ្លាប់បានស្នើសុំអាជ្ញាធរ ប៉ុន្តែនៅពេលដែលកើតមានជម្លោះព្រំដែនរវាងកម្ពុជា-ថៃ គឺទាហានទាំងនោះបានដកចេញពីស្រុកចុងកាល់ ទៅបោះទីតាំងនៅស្រុកបន្ទាយអំពិល ធ្វើឲ្យប៉ះពាល់ដីស្រែចម្ការពលរដ្ឋក្នុងស្រុកបន្ទាយអំពិល ជាច្រើនគ្រួសារ។ លោកថា មនុស្សដែលទៅកាប់ព្រៃនៅតំបន់ចុងវាំងនោះ ប្រហែលជាពលរដ្ឋមកពីស្រុកបន្ទាយអំពិល ដែលអាជ្ញាធរខេត្តបានដោះដូរដីនោះឲ្យពួកគាត់ ដោយមានឯកសារតាមច្បាប់ត្រឹមត្រូវ៖ «សង្ស័យតែគាត់ឃើញប្រជាពលរដ្ឋមកពីខាងស្រុកបន្ទាយអំពិល នោះទេដឹង? មិនមានអ្នកណាកាប់ព្រៃឈើយកដីទេ មានតែបងប្អូនប្រជាពលរដ្ឋមកពីស្រុកបន្ទាយអំពិល ដែលត្រូវដោះដូរដីថ្មី»។
ទោះជាយ៉ាងណា អាស៊ីសេរី មិនអាចទាក់ទងប្រធានមន្ទីរកសិកម្ម រុក្ខាប្រមាញ់ និងនេសាទ លោក សូត្រ ស៊ីសុឃាង និងនាយខណ្ឌរដ្ឋបាលព្រៃឈើខេត្តឧត្តរមានជ័យ លោក អ៊ឹម សាវរិទ្ធិ ដើម្បីសុំការអធិប្បាយជុំវិញបញ្ហាមនុស្សចំណូលថ្មីនាំគ្នាទៅកាប់បំផ្លាញព្រៃឈើជាច្រើនហិកតារ នៅតំបន់ចុងវាំង នោះបានថាយ៉ាងណានៅឡើយនៅថ្ងៃទី៦ ខែសីហា។
មន្ត្រីសមាគមការពារសិទ្ធិមនុស្សអាដហុក (ADHOC) ក៏បានចុះទៅឃើញសកម្មភាពកាប់បំផ្លាញព្រៃឈើនៅតំបន់ចុងវាំង ជិតភូមិស្រះកែវ នៃឃុំពង្រ នោះដែរ កាលពីចុងសប្ដាហ៍នេះ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន មានប្រសាសន៍ថា លោកបានឃើញព្រៃឈើជាច្រើនហិកតារត្រូវគេកាប់រំលំ ហើយឈូសយកដីធ្វើជាកម្មសិទ្ធិ។ លោក ស្រី ណារ៉េន ជំរុញឲ្យអាជ្ញាធរពាក់ព័ន្ធ គួរចុះទៅពិនិត្យមើលក្រុមមនុស្សដែលកាប់រានព្រៃដើម្បីយកដីទាំងនោះ ថាតើមានច្បាប់អនុញ្ញាតដែរឬក៏យ៉ាងណា?៖ «ពីព្រោះដីហ្នឹងវានៅចន្លោះអតីតដីរបស់ក្រុមហ៊ុន ខ្ញុំខ្លាចតែមានការឃុបឃិតគ្នាដើម្បីយកដីមកចែកគ្នា»។
អ្នកភូមិស្រះកែវ ឲ្យដឹងថា ចាប់តាំងតែពីអំឡុងខែឧសភា មកម្ល៉េះ គេឃើញក្រុមមនុស្សចំណូលថ្មីជាច្រើននាំគ្នាជិះគោយន្តចូលទៅកាប់ព្រៃឈើដើម្បីរុករានយកដី ក៏ប៉ុន្តែមិនមានអាជ្ញាធរណាទៅសាកសួរ ឬក៏មានវិធានការទប់ស្កាត់អ្វីឡើយ៕