អ្នកនាំពាក្យអគ្គនាយកដ្ឋានពន្ធនាគារ ឲ្យដឹងថា មន្ត្រីពន្ធនាគារខេត្តព្រៃវែង យ៉ាងហោច ៣នាក់ នឹងប្រឈមការដកស័ក្តិ លុបឈ្មោះចេញពីតារាងដំឡើងតួនាទី ព្រមទាំងដកបញ្ឈរជើង ជាដើម។ ការដាក់ពិន័យរដ្ឋបាលនេះ បន្ទាប់ពីពួកគេធ្វេសប្រហែសបណ្ដាលឲ្យអ្នកទោសជាចោរប្លន់ម្នាក់ ប្រើទូរស័ព្ទគំរាមបង្ហោះរូបភាពអាក្រាតកាយរបស់ស្ត្រីរងគ្រោះ ដើម្បីទារប្រាក់ ៥ពាន់ដុល្លារ។
ថ្វីបើរបាយការណ៍សំយោគទាក់ទងនឹងលទ្ធផលស្រាវជ្រាវអំពីភាពមិនប្រក្រតីនៅក្នុងពន្ធនាគារខេត្តព្រៃវែង ជុំវិញការអនុញ្ញាតឲ្យទណ្ឌិតជាចោរប្លន់ម្នាក់ ប្រើប្រាស់កុំព្យូទ័រ និងទូរស័ព្ទដៃធ្វើសកម្មភាពចេញមកក្រៅប្រព្រឹត្តបទល្មើសនោះ បានបិទបញ្ចប់រួចទៅហើយក្តី ប៉ុន្តែអគ្គនាយកដ្ឋានពន្ធនាគារនៃក្រសួងមហាផ្ទៃ នៅតែមិនទាន់ប្រកាសជាផ្លូវការនៅឡើយទេ។
ទោះយ៉ាងណា អ្នកនាំពាក្យអគ្គនាយកដ្ឋានពន្ធនាគារ លោក សន កែវ មានប្រសាសន៍ថា តាមរបាយការណ៍ដែលលោកបានដឹងនោះ គឺមានមន្ត្រីពន្ធនាគារខេត្តព្រៃវែង យ៉ាងហោច ៣នាក់ នឹងរងការដាក់ពិន័យរដ្ឋបាល ប៉ុន្តែលោកនៅមិនទាន់អាចបង្ហាញអំពីឈ្មោះ និងតួនាទីរបស់មន្ត្រីពន្ធនាគារទាំងនោះឡើយ៖ «របាយការណ៍ក៏បានកំណត់ហើយថា ត្រូវមានទណ្ឌកម្មចំពោះមន្ត្រី។ ចឹងមានអ្នកដែលត្រូវដកស័ក្តិ មានអ្នកដែលត្រូវដកចេញពីតារាងដំឡើងតួនាទី និងមានអ្នកដែលត្រូវបញ្ឈរជើង តែខ្ញុំអត់ដឹងថា ឈ្មោះណាត្រូវធ្វើអីនោះទេ គ្រាន់តែដឹងថា ក្នុងចំណោមហ្នឹងមានរូបភាពជាទណ្ឌកម្មវិន័យ»។
លោក សន កែវ បញ្ជាក់ថា ការដាក់ត្រឹមពិន័យរដ្ឋបាលនេះ គឺក្រោយពីលទ្ធផលស្រាវជ្រាវរកមិនឃើញថា មន្ត្រីពន្ធនាគារទាំងនោះបានឃុបឃិតដោយចេតនា ពោលគឺគ្រាន់តែពួកគាត់ទទួលបានលាភសក្ការៈតិចតួចពីជនជាប់ឃុំ ហើយភ្លេចខ្លួន បណ្ដាលឲ្យធ្វេសប្រហែសក្នុងការគ្រប់គ្រង និងត្រួតពិនិត្យ ដូច្នេះធ្វើឲ្យជនជាប់ឃុំមានឱកាសប្រើប្រាស់កុំព្យូទ័រ និងទូរស័ព្ទដើម្បីប្រព្រឹត្តបទល្មើស។
លោកបន្តថា បើយោងតាមការស្រាវជ្រាវនោះ គឺមានចំណុចខ្លះមិនដូចនឹងការចោទប្រកាន់កន្លងទៅឡើយ៖ «ការឃុបឃិតលុះត្រាតែគាត់ដឹងថា រឿងហ្នឹងគាត់ត្រូវយកទៅធ្វើសកម្មភាពអ៊ីចឹង រួចហើយគាត់ឃុបឃិតថា ឥឡូវឲ្យគាត់អ៊ីចេះៗមក គាត់អនុញ្ញាតឲ្យធ្វើអាហ្នឹង។ នេះជាការឃុបឃិតដើម្បីធ្វើ ប៉ុន្តែគាត់អត់ដឹង គាត់គ្រាន់តែដឹងថា គាត់រយាលក្នុងការគ្រប់គ្រងសកម្មភាពជនជាប់ឃុំហ្នឹង ដូច្នេះជាប់ឃុំមានឱកាសប្រព្រឹត្តបទល្មើសហ្នឹង»។
វិធានការរបស់ក្រសួងមហាផ្ទៃ នេះ គឺធ្វើឡើងបន្ទាប់ពីស្នងការនគរបាលខេត្តកណ្ដាល លោក អ៊ាវ ចំរើន បានបង្ហោះតាមហ្វេសប៊ុក (facebook) ផ្លូវការរបស់លោកកាលពីថ្ងៃទី១៨ ខែកក្កដា ទាក់ទងទៅនឹងអ្នកទោសមួយរូបឈ្មោះ យ៉ែម ប្រុស នៅក្នុងពន្ធនាគារខេត្តព្រៃវែង ដែលបានប្រើប្រាស់កុំព្យូទ័រយួរដៃ និងទូរស័ព្ទដៃទាក់ទងស្នេហាជាមួយស្ត្រីតាមរយៈគណនីហ្វេសប៊ុកចំនួន៥។ លោក អ៊ាវ ចំរើន សរសេរបន្តថា ទណ្ឌិត យ៉ែម ប្រុស បានបោកបញ្ឆោតលួងលោមស្ត្រីតាមហ្វេសប៊ុកឲ្យលង់ស្នេហ៍ រហូតបង្ហាញរូបភាពអាក្រាតទៅវិញទៅមក ហើយជនល្មើសរូបនោះបានថតរូបទុក និងបានគំរាមទារប្រាក់ចំនួន ៥ពាន់ដុល្លារ ជាថ្នូរមិនបង្ហោះរូបអាក្រាតជាសាធារណៈ។
ទណ្ឌិត យ៉ែម ប្រុស បានសារភាពថា រូបគេអាចលេងកុំព្យូទ័រ និងទូរស័ព្ទដៃបាននៅក្រៅបន្ទប់ឃុំឃាំង ដោយទទួលបានការអនុញ្ញាតពីលោក អ៊ុំ រ៉ាយឿង អនុប្រធានពន្ធនាគារខេត្តព្រៃវែង ដែលកន្លងទៅ អ្នកទោសរូបនេះធ្លាប់ទិញសម្ភារៈប្រើប្រាស់មួយចំនួនឲ្យគាត់។ អ្នកទោសរូបនេះបានជាប់ពន្ធនាគារកាលពីឆ្នាំ២០១០ នៅខេត្តកំពត បន្ទាប់មកត្រូវបានផ្ទេរមកឃុំខ្លួននៅពន្ធនាគារខេត្តព្រៃវែង វិញ ដោយអ្នកទោសរូបនេះជាប់ពន្ធនាគារសរុបចំនួន ១០ឆ្នាំ ពាក់ព័ន្ធនឹងបទល្មើសព្រហ្មទណ្ឌចំនួន ៨ករណី ពោលគឺប្លន់ ៧លើកនៅខេត្តកំពត និងប្លន់ ១លើកនៅខេត្តតាកែវ។ ក្រោយកើតហេតុ អ្នកទោសរូបនេះត្រូវផ្ទេរមកពន្ធនាគារព្រៃសវិញ ដែលមន្ត្រីក្រសួងមហាផ្ទៃ ថាដើម្បីងាយស្រួលស៊ើបអង្កេតលើករណីនេះ ព្រោះថាបើទុកឲ្យនៅកន្លែងដដែល ខ្លាចមន្ត្រីពន្ធនាគារខេត្តព្រៃវែង បញ្ចុះបញ្ចូលឲ្យផ្តល់ចម្លើយខុសពីការពិត។
រីឯប្រធានពន្ធនាគារខេត្តព្រៃវែង លោក ជួប សារីម បានថ្លែងថា លោកមិនអាចរៀបរាប់លម្អិតបានទេ ព្រោះរង់ចាំការសម្រេចពីខាងថ្នាក់លើ។
ជុំវិញករណីនេះដែរ អ្នកសម្របសម្រួលសមាគមអាដហុក (ADHOC) ប្រចាំខេត្តព្រៃវែង អ្នកស្រី អ៊ាង គឹមលី ស្នើឲ្យក្រសួងមហាផ្ទៃ ចាត់ការតាមច្បាប់លើមន្ត្រីខិលខូចឲ្យម៉ឺងម៉ាត់ ដើម្បីជាគំរូដល់មន្ត្រីផ្សេងទៀត៖ «ខ្ញុំគ្រាន់តែសំណូមពរថា ប្រសិនបើមន្ត្រីជំនាញធ្វើការស៊ើបអង្កេតឃើញថាមានមន្ត្រីពន្ធនាគារមួយចំនួនដែលពាក់ព័ន្ធនៅក្នុងករណីនេះ គិតថាគួរតែចាត់វិធានការករណីនេះទៅតាមផ្លូវច្បាប់ ព្រោះជាគំរូកុំឲ្យមានមន្ត្រីពន្ធនាគារផ្សេងទៀតយកសំណូកពីទណ្ឌិត ឬពីអ្នកជាប់ឃុំ ដើម្បីល្មើសបទវិន័យនៅក្នុងពន្ធនាគារ»។
ប្រធានពន្ធនាគារខេត្តព្រៃវែង អះអាងថា ពន្ធនាគារមិនអនុញ្ញាតឲ្យទណ្ឌិតអាចលេងហ្វេសប៊ុកតាមទូរស័ព្ទ ក៏ដូចជាមានកុំព្យូទ័របានទេ ប៉ុន្តែប្រហែលជាមានការលួចលាក់យកចូល និងដោយសារតែមានការចន្លោះប្រហោងរបស់ពន្ធនាគារ។ លោកថា ក្រោយផ្ទុះរឿងអាស្រូវនេះ ពន្ធនាគារបានរឹតបន្តឹងឡើងវិញ៖ «បាទ! ក្រោយពីហេតុការណ៍ហ្នឹងកើតឡើងមក យើងបានរឹតបន្តឹងគ្រប់គោលដៅ គ្រប់ច្រកដែលមានបញ្ហាហ្នឹង។ យើងបន្តឹងទាំងអស់ ទាំងមន្ត្រី ទាំងជនជាប់ឃុំ»។
អ្នកនាំពាក្យអគ្គនាយកដ្ឋានពន្ធនាគារ ឲ្យដឹងដែរថា ក្រោយពីពិនិត្យលើករណីមន្ត្រីពន្ធនាគារខេត្តព្រៃវែង ថ្នាក់ក្រោមរួចហើយនោះ ចំពោះប្រធានពន្ធនាគារខេត្តព្រៃវែង វិញ ក៏អាចនឹងប្រឈមការពិនិត្យលើរបៀបនៃការគ្រប់គ្រងរបស់គាត់ជាលក្ខណៈពិសេសណាមួយផ្សេងទៀតដែរ៕