មន្ត្រីក្រសួងការពារជាតិ បដិសេធចំពោះអង្គការឃ្លាំមើលសិទ្ធិមនុស្ស យូមែន រ៉ៃត៍ វ៉ច្ឆ (Human Rights Watch) ដែលថា កងយោធពលខេមរភូមិន្ទចំនួន ៥០០នាក់ បានចូលរួមថតកុនឲ្យក្រុមហ៊ុនអាមេរិក។ ការថតកុននេះ គឺសំដៅទៅរកការថតរឿង "មុនដំបូង ខ្មែរក្រហមសម្លាប់ប៉ារបស់ខ្ញុំ" ដែលដឹកនាំដោយអ្នកស្រី អែនជេលីណា ចូលី (Angelina Jolie )។
អ្នកនាំពាក្យក្រសួងការពារជាតិ លោក ឈុំ សុជាត នៅល្ងាចថ្ងៃទី៣០ កក្កដា បដិសេធថា កងយោធពលខេមរភូមិន្ទមិនបានចូលរួមថតកុនឲ្យអាមេរិក ដែលដឹកនាំដោយអ្នកស្រី អែនជេលីណា ចូលី (Angelina Jolie) ទេ៖ «កងទ័ពអត់មានកម្លាំងណាជួលបួនប្រាំរយនាក់ទេ ព្រោះនិយាយរួម កងទ័ពអត់មានពេលវេលាណាទៅថតកុនជាមួយគាត់ទេ។ សង្ស័យមាន គឺមានតែប្រជាជនស្លៀកពាក់ទាហានប្រើជារូបភាពបញ្ចាំងកុន អាចជឿថាកើតមានរឿងហ្នឹងច្រើនជាង»។
ការបដិសេធនេះ គឺក្រោយពេលដែលទស្សនាវដ្ដី ញូវយ៉ក (NYMAG.COM) កាលពីថ្ងៃទី២៧ កក្កដា ចេញផ្សាយអំពីការរិះគន់ចំពោះអ្នកស្រី អែនជេលីណា ចូលី ថាបានសហការជាមួយកងខេមរភូមិន្ទចំនួន ៥០០នាក់ ពេលថតភាពយន្តខ្នាតធំអំពីជីវិតជនរងគ្រោះក្នុងរបបខ្មែរក្រហមម្នាក់ ឈ្មោះ អ៊ឹង លឿង។ ភាពយន្តនេះមានចំណងជើងថា "មុនដំបូង ខ្មែរក្រហមសម្លាប់ប៉ារបស់ខ្ញុំ" ហើយថាទាហានទាំងនេះដើរតួជាកងទ័ពខ្មែរក្រហម។
នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស យូមែន រ៉ៃត៍ វ៉ច្ឆ (Human Rights Watch) លោក ប៊្រែដ អាដាម (Brad Adams) រិះគន់តារាភាពយន្តហូលីវូដ (Hollywood) ដ៏ល្បីឈ្មោះ និងជាផលិតករភាពយន្ត អ្នកស្រី អែនជេលីណា ចូលី (Angelina Jolie) ចំពោះការសហការជាមួយកងខេមរភូមិន្ទ ដែលថាជាកម្លាំងរំលោភសិទ្ធិមនុស្សនៅកម្ពុជា ជាក្ដីបារម្ភធ្ងន់ធ្ងរមួយ ប្រសិនបើកិច្ចសហការមានមែន។
ទស្សនាវដ្ដី ញូវយ៉ក ស្រង់សម្ដីលោក ប៊្រែដ អាដាម ទៀតថា ការដែលអ្នកស្រី អែនជេលីណា ចូលី ទៅសុំច្បាប់ផលិតភាពយន្តនៅកម្ពុជា និងបានដាក់ទុនវិនិយោគទៅក្នុងសេដ្ឋកិច្ចកម្ពុជា ជារឿងល្អមួយ ហើយអ្នកស្រីអាចនឹងជួបជាមួយអាជ្ញាធរ ប៉ុន្តែអ្នកស្រីត្រូវឋិតក្នុងជំហរច្បាស់លាស់មួយថា អ្នកស្រីមិនបានផ្ដល់អំណាច និងភាពស្របច្បាប់ ឬចំណាយលុយទៅមនុស្សខុសឡើយ។ លោកថ្លែងទៀតថា ការធ្វើការជាមួយទាហានរដ្ឋាភិបាល គឺជាទង្វើហាមឃាត់ ជាកំហុសដ៏អាក្រក់ ដោយលោកថា កងទាហានទាំងនោះ គឺជាកងកម្លាំងដែលត្រូវបានប្រើប្រាស់ដោយអ្នកផ្ដាច់ការដើម្បីសម្លាប់អ្នកការពារបរិស្ថាន ដែលវាជាទង្វើផ្ទុយពីជំហររបស់អ្នកស្រី។
លោកថ្លែងថា លោកនាយករដ្ឋមន្ត្រី ហ៊ុន សែន ជាជនផ្ដាច់ការម្នាក់ដែលជាប់ក្នុងកំណត់ត្រាពីការសម្លាប់ ការនិរទេស ការដាក់ និងការគំរាមកំហែងអ្នកនយោបាយប្រឆាំង ហើយទាំងលោក ហ៊ុន សែន ក៏ដូចជាថ្នាក់ដឹកនាំប្រទេស មានរដ្ឋមន្ត្រីការពារជាតិ រួមទាំងមេទាហានផ្សេងទៀត សុទ្ធតែជាអតីតសមាជិកខ្មែរក្រហម។
លោក ឈុំ សុជាត ឆ្លើយតបថា លោកស្គាល់ច្បាស់ចំពោះទស្សនៈរបស់លោក ប៊្រែដ អាដាម៖ «គាត់មានទស្សនៈមួយ គាត់មិនដែលនិយាយចំណុចវិជ្ជមានពីរដ្ឋាភិបាលទេ។ គាត់និយាយតែអវិជ្ជមានរហូត»។
លោក ប៊្រែដ អាដាម គូសបញ្ជាក់ថា ភាពយន្ត "មុនដំបូង ខ្មែរក្រហមសម្លាប់ប៉ារបស់ខ្ញុំ" នេះ និយាយអំពីភាពតក់ស្លុតពីពួកខ្មែរក្រហម ហើយអ្នកស្រីនៅតែទាក់ទងជាមួយខ្មែរក្រហមដោយគ្មានការពិចារណា។ លោកថា អ្នកស្រីមានមធ្យោបាយផ្សេងទៀតក្នុងការថតភាពយន្តនៅកម្ពុជា ហើយមិនជាប់ពាក់ព័ន្ធដោយកងទ័ពកម្ពុជា ដែលជាកងកម្លាំងនៅតែបន្តរំលោភបំពានសិទ្ធិមនុស្សធ្ងន់ធ្ងរ។ ឧទាហរណ៍ អ្នកស្រី ចូលី អាចជួលមនុស្សក្រៅពីនេះឲ្យដើរតួជាយោធាខ្មែរក្រហមបាន។ លោកបន្តថា វាជាគ្រោះថ្នាក់សីលធម៌មួយក្នុងការទាក់ទង ឬធ្វើជំនួញជាមួយរដ្ឋាភិបាលកម្ពុជា។ មិនដឹងថាអ្នកស្រីមិនយល់ ឬមិនខ្វល់ពីបញ្ហានេះទេ?
នេះមិនមែនជាលើកទីមួយទេដែលអ្នកស្រី អែនជេលីណា ចូលី ទៅធ្វើការនៅក្រៅប្រទេស ហើយលេចឡើងនូវក្ដីបារម្ភពីក្រមសីលធម៌។ កាលពីឆ្នាំ២០០២ អ្នកស្រី អែនជេលីណា ចូលី បានទិញដីសម្រាប់មូលនិធិ ម៉ាដុក ចូលី ភិត (Maddox Jolie-Pitt Foundation) ពីឈ្មោះ យឹម ទិត ដែលគេចោទថាជាឃាតកសម្លាប់រង្គាល និងជាអតីតមេបញ្ជាការយោធាខ្មែរក្រហម។ រឿងនេះមិនដឹងថាជាកំហុសរបស់អ្នកស្រី ឬបុគ្គលិករបស់អ្នកស្រីទេ។ វាមិនគួរកើតមានឡើយ។ អ្នកស្រីមិនគួរផ្ទេរលុយទៅជនណាដែលត្រូវគេចោទពីការប្រល័យពូជសាសន៍ឡើយ។
ទោះជាយ៉ាងណាក្ដី ទស្សនាវដ្ដី ញូវយ៉ក មិនទាន់ទទួលបានការឆ្លើយតបពីអ្នកស្រី អែនជេលីណា ចូលី នៅឡើយទេ៕