ចៅសង្កាត់ទួលសង្កែទី២ មកពីគណបក្សសង្គ្រោះជាតិ ចាត់ទុកការចោទប្រកាន់ និងការព្រមានចាត់វិធានការពីសំណាក់អភិបាលខណ្ឌឫស្សីកែវ និងអ្នកនាំពាក្យគណបក្សកាន់អំណាចនោះ ថាមានចរិតនយោបាយ និងមានបំណងធ្វើបាបរូបលោក។ ការលើកឡើងនេះ បន្ទាប់ពីលោករងការចោទប្រកាន់ថា ជាប់ពាក់ព័ន្ធនឹងអំពើពុករលួយ និងប្រព្រឹត្តខុសច្បាប់ស្ដីពីការគ្រប់គ្រងរដ្ឋបាលឃុំ-សង្កាត់ ដោយយកហិបមូលនិធិសប្បុរសជនដាក់ក្នុងសាលាសង្កាត់កាលពីថ្ងៃទី២៧ ខែកក្កដា។
បញ្ហាចម្រូងចម្រាសរវាងចៅសង្កាត់មកពីគណបក្សសង្គ្រោះជាតិ និងចៅសង្កាត់រងទី២ មកពីគណបក្សប្រជាជនកម្ពុជា បានកើតឡើងបន្ទាប់ពីលោកចៅសង្កាត់ បានយកហិបមួយដែលមានសរសេរអក្សរបិទលើហិបនោះថា មូលនិធិសប្បុរសជន (សម្រាប់ចំណាយផ្សេងៗក្នុងសង្កាត់) ដាក់ក្នុងសាលាសង្កាត់កាលពីល្ងាចថ្ងៃទី២៧ ខែកក្កដា ឆ្នាំ២០១៧។
ចៅសង្កាត់ទួលសង្កែទី២ មកពីគណបក្សសង្គ្រោះជាតិ លោក សំ ជឿន រៀបរាប់ថា ក្រោយពេលលោកទុកហិបនោះសិន ដោយមិនទាន់ទាំងបានប្រមូលលុយ និងប្រជុំជាមួយក្រុមប្រឹក្សាផង ស្រាប់តែចៅសង្កាត់រងទី២ មកពីបក្សប្រជាជនកម្ពុជា បានធ្វើរបាយការណ៍ជូនអភិបាលខណ្ឌឫស្សីកែវ ដើម្បីចាត់វិធានការតែម្តង៖ «កេះនេះគ្រាន់តែដាក់មក ក៏មិនទាន់មានលុយមានអីដែរ ដោយសារតែថ្ងៃនេះថ្ងៃសុក្រ ថ្ងៃសៅរ៍ អាទិត្យ ហើយក៏យើងមិនទាន់បានគិតគ្នាថា អ្នកណាអ្នកគ្រប់គ្រង ដាក់ហ្នឹងវាត្រូវ ឬខុស? ខ្ញុំក៏មិនទាន់បានពិភាក្សាគ្នាដែរ។ គ្រាន់តែសរសេរក្រដាសបិទចឹងទៅ ហើយខ្ញុំក៏និយាយថា មើល៍ តើសរសេរចឹងឲ្យវាត្រូវ សរសេរយ៉ាងម៉េចឲ្យវាសម»។
ចៅសង្កាត់រងទី២ មកពីបក្សប្រជាជនកម្ពុជា កាលពីថ្ងៃទី២៩ ខែកក្កដា បានធ្វើរបាយការណ៍ជូនអភិបាលខណ្ឌឫស្សីកែវ ថា ចៅសង្កាត់បក្សប្រឆាំង និងបក្សពួក បានដាក់ហិបមូលនិធិសប្បុរសជននោះដោយមិនបានពិភាក្សា និងប្រជុំក្រុមប្រឹក្សាសម្រេចឡើយ។
ចៅសង្កាត់រងទី២ លោក អ៊ុក ខេមា មានប្រសាសន៍ខ្លីថា ករណីនេះលោកមិនបានដឹងថា តើចៅសង្កាត់នោះខុសឆ្គងយ៉ាងណានោះទេ ប៉ុន្តែលោកត្រូវតែរាយការណ៍ជូនអភិបាលខណ្ឌឲ្យជួយដោះស្រាយ។
យោងតាមអង្គភាពសារព័ត៌មាន ហ្វ្រេសញូវ (FreshNews) បានចុះផ្សាយថា ក្រោយជូនរបាយការណ៍ និងសុំចាត់វិធានការបន្ទាន់នោះ អភិបាលខណ្ឌឫស្សីកែវ លោក ជា ពិសី បានបញ្ចេញនូវប្រតិកម្មធ្ងន់ៗ និងព្រមានខ្លាំងៗថា នឹងចាត់វិធានការតាមផ្លូវច្បាប់ចំពោះភាពមិនប្រក្រតីរបស់ចៅសង្កាត់មកពីគណបក្សសង្គ្រោះជាតិ រូបនេះ ពាក់ព័ន្ធនឹងការរៀបចំហិបមូលនិធិដើម្បីប្រមូលលុយពីប្រជាពលរដ្ឋនៅមូលដ្ឋាននាពេលនេះ។
លោកអភិបាលខណ្ឌចាត់ទុកថា ការធ្វើបែបនេះរបស់ចៅសង្កាត់ថ្មីសង្កាត់ទួលសង្កែ រំលោភលើច្បាប់នៃលិខិតបទដ្ឋានគតិយុត្តិនានាក្នុងការគ្រប់គ្រងរដ្ឋបាលឃុំ-សង្កាត់។
ទោះយ៉ាងណា អាស៊ីសេរី មិនអាចសុំការបំភ្លឺបន្ថែមពីលោកអភិបាលខណ្ឌឫស្សីកែវ បានទេ ដោយទូរស័ព្ទរបស់លោកមិនអាចទំនាក់ទំនងបានទេ។
រីឯអ្នកនាំពាក្យគណបក្សកាន់អំណាច លោក សុខ ឥសាន ក៏បានរិះគន់ខ្លាំងៗលើចៅសង្កាត់រូបនោះតាមអង្គភាពសារព័ត៌មានហ្វ្រេសញូវដែរថា បញ្ហានេះ គឺជាទម្រង់ពុករលួយយ៉ាងច្បាស់ក្រឡែត ដែលចៅសង្កាត់ថ្មីមកពីគណបក្សប្រឆាំងបានអនុវត្តរំលោភច្បាប់ និងជំនឿទុកចិត្តរបស់ប្រជាពលរដ្ឋ។ អាស៊ីសេរី ក៏មិនអាចសាកសួរលោក សុខ ឥសាន បានទេ ដោយទូរស័ព្ទមិនអាចទំនាក់ទំនងបាន។
ជាការឆ្លើយតប ចៅសង្កាត់ទួលសង្កែទី២ លោក សំ ជឿន ច្រានចោលការចោទប្រកាន់នេះ ដោយចាត់ទុកថា ការចោទប្រកាន់ និងការព្រមានចាត់វិធានការនេះ គឺមានលក្ខណៈនយោបាយ និងចង់ធ្វើបាបរូបលោក៖ «រឿងនេះគេចង់ធ្វើបាបខ្ញុំទេ ព្រោះកិច្ចការនេះវាមិនមែនការពិតទេ ព្រោះវាគ្មានអីត្រូវធ្ងន់ស្រាលឯណា ដោយគ្រាន់តែដាក់កេះនៅក្នុងសាលាសង្កាត់ ហើយមិនទាន់ប្រមូលលុយផង ហើយទៅថាខ្ញុំពុករលួយអ៊ីចឹង។ វាអត់ត្រូវទេ មួលបង្កាច់ខ្ញុំទាំងស្រុង ដែលជារូបភាពនយោបាយពិតប្រាកដហើយ។ បើយើងមើលទៅ មិនមែនជួយគ្នា មិនមែនសហការគ្នាទេ ធ្វើការអ៊ីចឹងនោះ»។
នេះគឺជាករណីថ្មីមួយទៀតដែលចៅសង្កាត់បក្សប្រឆាំង ត្រូវរងការចោទប្រកាន់ និងរងការព្រមានចាត់វិធានការធ្ងន់ៗពីអាជ្ញាធររដ្ឋាភិបាល ខណៈដែលមេឃុំ-ចៅសង្កាត់បក្សកាន់អំណាចអាចធ្វើការនៅសុខជា។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ មានប្រសាសន៍ថា ការដាក់ហិបមូលនិធិសប្បុរសជននោះ គឺមិនខុសច្បាប់នោះទេ ឲ្យតែមានកម្មវត្ថុច្បាស់លាស់ និងប្រជាពលរដ្ឋចូលរួមដោយស្ម័គ្រចិត្ត។ លោកបន្តថា ឃុំ-សង្កាត់មានសិទ្ធិស្វែងរកថវិកាអភិវឌ្ឍមូលដ្ឋាន ដែលគេហៅថា ទុនបដិភាគ ហើយសាលាខណ្ឌគ្មានសិទ្ធិណាមួយរារាំងទេ៖ «បើជាការលូកដៃរបស់ខណ្ឌ វាអាចមានរូបភាពពីរ គឺទី១ រឿងនយោបាយ។ ទី២ ខណ្ឌខ្លួនឯងវាអាចរំលោភច្បាប់ស្ដីពីការគ្រប់គ្រងរដ្ឋបាលឃុំ-សង្កាត់ដែរ ហើយវាផ្ទុយនឹងបញ្ញត្តិដែលមានស្រាប់នៅក្នុងការអនុញ្ញាតឲ្យឃុំ-សង្កាត់ហ្នឹងមានសិទ្ធិនៅក្នុងការបង្កើតមូលនិធិរបស់ខ្លួន កៀរគរធនធានពីមូលដ្ឋាន ហើយដើម្បីយកទៅរួមចំណែកនៅក្នុងការអភិវឌ្ឍនៅសង្កាត់ហ្នឹង»។
ទន្ទឹមគ្នានេះ លោក សន ជ័យ ក៏លើកទឹកចិត្តឲ្យមានការប្រជុំពិភាក្សាគ្នានៅក្នុងក្រុមប្រឹក្សាឃុំ-សង្កាត់ មុននឹងធ្វើកិច្ចការអ្វីសំខាន់ៗដើម្បីធានាតម្លាភាព ជៀសវាងការចោទប្រកាន់ផ្សេងៗ៕