សមាជិកសហគមន៍ភូមិសមុទ្រក្រោម រកឃើញឯកសារទិញលក់ឈើខុសច្បាប់នៅក្នុងព្រៃដែនជម្រកសត្វលំផាត់ ខេត្តរតនគិរី ពាក់ព័ន្ធមន្ត្រីភូមិ និងប្រធានសហគមន៍ បានផ្ដិតមេដៃលើកិច្ចសន្យាលក់ឈើក្នុងព្រៃនោះទៅឲ្យឈ្មួញ។ ចំណែកមន្ត្រីភូមិទទួលស្គាល់ថា ការលក់ឈើក្នុងព្រៃ គឺមានការព្រមព្រៀងពីពលរដ្ឋក្នុងភូមិគ្រប់គ្រួសារ។
ពលរដ្ឋភូមិសមុទ្រក្រោម ឃុំសេដា ស្រុកលំផាត់ ខេត្តរតនគិរី ទាមទារឲ្យក្រសួងបរិស្ថាន ស៊ើបអង្កេតបន្ទាន់ទៅលើសកម្មភាពទិញលក់ឈើមូលក្នុងដែនជម្រកសត្វព្រៃមានតម្លៃ ១ម៉ឺន ៥ពាន់ដុល្លារ។ ការទាមទារនេះ ធ្វើឡើងបន្ទាប់ពីអ្នកភូមិរកឃើញឯកសារថតចម្លងមួយ ដែលជាកិច្ចសន្យារវាងមេភូមិ រួមជាមួយប្រធានសហគមន៍ភូមិសមុទ្រក្រោម ដែលបានផ្ដិតមេដៃលក់ដើមឈើនៅចំណុចភ្នំអាត ក្នុងដែនជម្រកសត្វព្រៃទៅឲ្យឈ្មួញកាលពីចុងឆ្នាំ២០១៦។
ពលរដ្ឋភូមិសមុទ្រក្រោម លោក តូច ផល្លា បញ្ជាក់នៅថ្ងៃទី២៦ ខែកក្កដា ថា ឯកសារនេះគឺជាភស្តុតាងបន្ថែមទៀតដែលបញ្ជាក់ថា ឈើក្នុងដែនជម្រកសត្វព្រៃត្រូវគេកាប់ធ្វើអាជីវកម្មបន្ទាប់ពីអ្នកភូមិបានប្រទះឃើញឈើមូលនៅតំបន់ភ្នំអាត ត្រូវគេអាររំលំ ហើយឈ្មួញគឺជាអ្នកដឹកជញ្ជូននាំឈើចេញទៅប្រទេសវៀតណាម។ លោកថា អ្នកភូមិនឹងបង្ហាញឯកសារនេះជូនមន្ត្រីអយ្យការ ខណៈអ្នកភូមិនឹងត្រូវកោះហៅឲ្យចូលបង្ហាញអង្គហេតុដែលអ្នកភូមិបានប្ដឹងបរិហារអាជ្ញាធរមូលដ្ឋាន ថាជាប់ពាក់ព័ន្ធរឿងកាប់រានព្រៃនៅតំបន់ដែនជម្រកសត្វព្រៃលំផាត់៖ «ចាប់បានអាហ្នឹងយកមក បានគាត់ទទួលស្គាល់ថាបានលក់ គេកាប់ហ្នឹងពីរភ្នំ ភ្នំអាត មួយ ភ្នំម៉ាហាត មួយទៀត»។
ប្រជាពលរដ្ឋភូមិសមុទ្រក្រោម ឲ្យដឹងថា ចន្លោះពីខែវិច្ឆិកា ឆ្នាំ២០១៦ ដល់ខែមករា ឆ្នាំ២០១៧ ឈើមូលនៅតំបន់ភ្នំអាត និងភ្នំម៉ាហាត ក្បែរគ្នានេះរាប់ពាន់ដើម ត្រូវគេអាររំលំកាត់ចុងកាត់គល់ ហើយដឹកជញ្ជូនទៅប្រទេសវៀតណាម។ ប្រជាពលរដ្ឋភូមិសមុទ្រក្រោម ដែលបានទៅដល់ទីតាំងកាប់ឈើសុំមិនឲ្យបញ្ចេញឈ្មោះ ឲ្យដឹងថា រហូតបច្ចុប្បន្ន ឈើមូលរាប់រយដើមដែលគេកាប់រួច ហើយបន្សល់ចោលនៅភ្នំនោះនៅឡើយ បន្ទាប់ពីសមត្ថកិច្ចបានបង្ក្រាបទីតាំងនោះ។
អាស៊ីសេរី មិនអាចសុំការបញ្ជាក់ពីប្រធានមន្ទីរបរិស្ថានខេត្តរតនគិរី លោក ផុន ខេមរិន្ទ ជុំវិញការអះអាងរបស់អ្នកភូមិបានទេ នៅថ្ងៃទី២៦ ខែកក្កដា។
ចំណែកអនុប្រធានភូមិសមុទ្រក្រោម លោក ប៊ុន ធានសឿន ទទួលស្គាល់ថា លិខិតព្រមព្រៀងលក់ព្រៃឈើនៅតំបន់ភ្នំអាត ថាជាការឯកភាពរបស់សមាជិកសហគមន៍ទាំងអស់។ លោកថា ប្រាក់ដែលបានពីការលក់ឈើ ៧ពាន់ដុល្លារ បានយកទៅសង់សាលាប្រជុំភូមិ ហើយប្រាក់នៅសល់ចែកសមាជិកសហគមន៍មួយគ្រួសារបានជាង ១០ម៉ឺនរៀល៖ «ប្រជាពលរដ្ឋព្រមទាំងអស់គាត់ ព្រមលក់ព្រៃឈើ បានយើងលក់ទៅ បើគាត់មិនព្រម គេមិនហ៊ានទិញដែរ។ ចែកម្នាក់ ១០ម៉ឺន ក្រៅពីធ្វើសាលាភូមិ ខ្ញុំចែកប្រជាពលរដ្ឋ»។
អ្នកសម្របសម្រួលសមាគមអាដហុក (ADHOC) ខេត្តរតនគិរី លោក ឌិន ខុន្នី បញ្ជាក់ថា សហគមន៍ភូមិសមុទ្រក្រោម បានប្រគល់ឯកសារទិញលក់ឈើនៅតំបន់ដែនជម្រកសត្វព្រៃលំផាត់ ឲ្យសមាគម ដើម្បីទុកជាវត្ថុតាងតាមផ្លូវច្បាប់។ លោកថា លិខិតព្រមព្រៀងលក់ឈើនេះជាវត្ថុតាងសំខាន់ទាក់ទិនបទឧក្រិដ្ឋព្រៃឈើ ហេតុនេះសមត្ថកិច្ចពាក់ព័ន្ធត្រូវស៊ើបអង្កេតរឿងនេះ៖ «កាលណាមានបុគ្គលណាគាត់កាប់ក៏ដោយ គាត់លក់ក៏ដោយ អាហ្នឹងជាសកម្មភាពខុសច្បាប់»។
កិច្ចព្រមព្រៀងថតចម្លងចុះថ្ងៃទី១០ ខែវិច្ឆិកា ឆ្នាំ២០១១ ដែលអាស៊ីសេរីទទួលបានពីសហគមន៍ភូមិសមុទ្រក្រោម ឲ្យដឹងថា តំណាងអាជ្ញាធរភូមិសមុទ្រក្រោម ពីរនាក់ គឺប្រធានភូមិ លោក ខាំ ផសាវាត និងអនុប្រធានភូមិ លោក ប៊ុន ធានសឿន រួមទាំងគណៈកម្មការសហគមន៍ភូមិសមុទ្រក្រោម លោក ថាន់ ម្ហើល និងលោក ខាំ ម៉ាសាក បានព្រមព្រៀងលក់ព្រៃឈើចាប់ពីជើងភ្នំអាត រហូតកំពូលភ្នំ ទៅឲ្យឈ្មោះ ម្រិម ធើប ទាំងឈើអាររួច និងឈើមិនទាន់អាររំលំ ហើយមិនអនុញ្ញាតឲ្យជនណាមានសិទ្ធិដឹកឈើចេញក្រៅពីអ្នកទិញនោះទេ និងចាត់កងសន្តិសុខចំនួន ៨នាក់យាមការពារនៅទីតាំងកាប់ឈើនោះទៀតផង។ ឈើក្នុងព្រៃដែលលក់មានតម្លៃ ១ម៉ឺន ៥ពាន់ដុល្លារអាមេរិក៕