Clik here to view.
រយៈពេល ៤ឆ្នាំចុងក្រោយនេះ ប្រទេសចិន បានងាកមករកបណ្ដាប្រទេសអាស៊ាន ដើម្បីចាប់ធ្វើជាដៃគូសន្ទនាលើវិស័យផ្សេងៗជាច្រើន ទាំងខាងវប្បធម៌ សន្តិសុខ សេដ្ឋកិច្ច ពាណិជ្ជកម្ម និងការអភិវឌ្ឍសង្គមដើម្បីកាត់បន្ថយភាពក្រីក្រ ជាដើម។
ការងាកមករកប្រទេសក្នុងតំបន់អាស៊ីអាគ្នេយ៍នេះ គឺរដ្ឋាភិបាលចិន ចាត់ទុកថា ជាការបង្កើតវេទិកាអន្តរជាតិបើកទូលាយនៃយុទ្ធសាស្ត្រខ្សែក្រវាត់មួយ និងផ្លូវមួយ សម្រាប់ត្រួសត្រាយផ្លូវអភិវឌ្ឍន៍ថ្មីទៅកាន់ពិភពលោក និងបណ្ដាប្រទេសអាស៊ាន។
រដ្ឋមន្ត្រីក្រសួងអភិវឌ្ឍន៍ជនបទ នៃប្រទេសកម្ពុជា បានធ្វើជាម្ចាស់ផ្ទះនៃវេទិកាអាស៊ាន-ចិន លើកទី១១ ស្ដីពីការអភិវឌ្ឍសង្គម និងកាត់បន្ថយភាពក្រីក្រនៅឯខេត្តសៀមរាប ព្រឹកថ្ងៃអង្គារ ទី២៥ ខែកក្កដា។
ប្រទេសចិន បានចាត់ទុកថា វេទិកានៃបណ្ដាប្រទេសអាស៊ានទាំង១០ ជាមួយប្រទេសចិន ពេលនេះ មានសារសំខាន់យ៉ាងខ្លាំងក្នុងការចែករំលែកចំណេះដឹងស្ដីពីការអភិវឌ្ឍ ឲ្យគ្នាទៅវិញទៅមកសម្រាប់លើកកម្ពស់ទៅដល់ការបង្កើតការងារថ្មីៗ នៃដំណោះស្រាយយុទ្ធសាស្ត្រឈ្នះៗ។
អនុរដ្ឋមន្ត្រីក្រុមប្រឹក្សារដ្ឋនៃការិយាល័យកាត់បន្ថយភាពក្រីក្រ និងអភិវឌ្ឍន៍របស់សាធារណរដ្ឋប្រជាមានិតចិន គឺលោក ហុង ទៀនយុន (Hong Tianyun)។ លោកថ្លែងនៅក្នុងការបើកវេទិកាអាស៊ាន-ចិន លើកទី១១ នៅឯខេត្តសៀមរាប នៅព្រឹកថ្ងៃអង្គារ ទី២៥ ខែកក្កដា ថា រដ្ឋាភិបាលចិន បានដើរលើផ្លូវដ៏វែងឆ្ងាយជាមួយបណ្ដាប្រទេសអាស៊ានជាច្រើនឆ្នាំមកហើយ ទម្រាំបានក្លាយទៅជាដៃគូសន្ទនាជាមួយគ្នានេះ។
លោក ហុង ទៀនយុន បញ្ជាក់ទៀតថា វេទិកាអាស៊ាន-ចិន ស្ដីពីការអភិវឌ្ឍសង្គម និងកាត់បន្ថយភាពក្រីក្រពេលនេះ គឺជាកម្លាំងថ្មីមួយសម្រាប់ជំរុញឲ្យមានការអភិវឌ្ឍនៅក្នុងតំបន់។
ក្រសួងអភិវឌ្ឍន៍ជនបទ ឲ្យដឹងថា បច្ចុប្បន្ន រដ្ឋាភិបាលកម្ពុជា បានខិតខំបង្កើតកិច្ចសហប្រតិបត្តិការលើគ្រប់វិស័យជាមួយបណ្ដាប្រទេសអាស៊ានទាំង១០ រួមនឹងប្រទេសចិន ក្នុងការធ្វើសមាហរណកម្មរវាងទីក្រុង និងទីជនបទដាច់ស្រយាល ឲ្យកាន់តែប្រសើរឡើងក្នុងបំណងលើកកម្ពស់ជីវភាពរស់នៅរបស់ពលរដ្ឋតាមជនបទឲ្យសមរម្យ។
រដ្ឋមន្ត្រីក្រសួងអភិវឌ្ឍន៍ជនបទ លោក អ៊ុក រ៉ាប៊ុន ថ្លែងថា សព្វថ្ងៃនេះរដ្ឋាភិបាលកំពុងរក្សាឲ្យបាននូវស្ថិរភាពម៉ាក្រូសេដ្ឋកិច្ច ដែលសម្រេចបានជាមធ្យមក្នុងរង្វង់ ៧% ក្នុងមួយឆ្នាំ រីឯការកាត់បន្ថយភាពក្រីក្រសម្រេចបាន ១% ជារៀងរាល់ឆ្នាំក្នុងរយៈពេល ១០ឆ្នាំមកហើយ។
លោក អ៊ុក រ៉ាប៊ុន ឲ្យដឹងថា រដ្ឋាភិបាលកម្ពុជា នៅតែបន្តអភិវឌ្ឍសេដ្ឋកិច្ចជនបទ ដើម្បីលើកកម្ពស់ជីវភាពពលរដ្ឋនៅតំបន់ដាច់ស្រយាល និងកាត់បន្ថយការចំណាកស្រុកទៅរកការងារធ្វើនៅក្រៅប្រទេស តាមរយៈការផ្ដល់សេវាប្រាក់កម្ចីដែលមានអត្រាការប្រាក់ទាប ការបង្កើតកម្មវិធីបណ្ដុះបណ្ដាលមុខជំនាញ ព្រមទាំងធ្វើឲ្យហេដ្ឋារចនាសម្ព័ន្ធនៅជនបទប្រសើរឡើង ដូចជាការសង់ផ្លូវពីក្រួសក្រហម ឲ្យទៅជាផ្លូវចាក់បេតុង និងកៅស៊ូ ជាដើម៖ «រាជរដ្ឋាភិបាលបន្តអភិវឌ្ឍសេដ្ឋកិច្ចជនបទ ដើម្បីកែលំអលើកកម្ពស់ជីវភាពរស់នៅរបស់ពលរដ្ឋនៅជនបទ ព្រមទាំងកាត់បន្ថយចំណាកស្រុក ដើម្បីស្វែងរកការងារធ្វើ»។
លោករដ្ឋមន្ត្រីក្រសួងអភិវឌ្ឍន៍ជនបទ ឲ្យដឹងទៀតថា រដ្ឋាភិបាលនឹងធ្វើឲ្យសម្រេចគោលដៅនៃការផ្ដល់ទឹកស្អាត គឺនៅឆ្នាំ២០១៨ នឹងអាចផ្ដល់ឲ្យពលរដ្ឋប្រមាណ ៦០% នៅជនបទទូទាំងប្រទេសបានប្រើប្រាស់ ការទទួលសេវាថែទាំសុខភាព និងអនាម័យ ហើយនៅឆ្នាំ២០២៥ ខាងមុខ ពលរដ្ឋខ្មែរគ្រប់រូបនៅទីជនបទ នឹងទទួលបានទឹកស្អាតប្រើប្រាស់គ្រប់ៗគ្នា៕
