លោកនាយករដ្ឋមន្ត្រី ហ៊ុន សែន ផ្តល់ថវិកាចំនួន ៥ម៉ឺនដុល្លារបន្ថែមទៀតដល់គ្រួសារលោកបណ្ឌិត កែម ឡី កាលពីថ្ងៃទី២២ ខែកក្កដា ឆ្នាំ២០១៧។ ប្រាក់នេះ ត្រូវបានប្រគល់ដល់ដៃម្តាយ និងប្អូនប្រុសលោកបណ្ឌិត គឺលោក កែម រិទ្ធិសិត នៅស្រុកកំណើតនាខេត្តតាកែវ ជាកន្លែងបញ្ចុះសពលោកបណ្ឌិត កែម ឡី។
ការផ្តល់ប្រាក់ ៥ម៉ឺនដុល្លារនេះ ក្រោយពីលោកនាយករដ្ឋមន្ត្រីទើបនឹងផ្តល់ប្រាក់មួយម៉ឺនដុល្លារសម្រាប់ជួយចេញថ្លៃបបរថ្ងៃបុណ្យខួបមួយឆ្នាំនៃការបាញ់សម្លាប់លោកបណ្ឌិត កែម ឡី និងមានការរិះគន់ជុំវិញរឿងនេះច្រើនពីសហគមន៍ខ្មែរនៅក្រៅប្រទេស។ ទឹកប្រាក់លើកក្រោយនេះ គឺផ្តល់ជូនដើម្បីយកទៅសាងសង់ចេតិយជូនសពលោកបណ្ឌិត កែម ឡី។
សូមស្ដាប់បទសម្ភាសន៍របស់លោក ប្រាជ្ញ ចេវ ជាមួយលោក ប៉ា ងួនទៀង ជានាយកមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ និងអតីតសមាជិកគណៈកម្មការរៀបចំបុណ្យដង្ហែសពលោកបណ្ឌិត ជុំវិញបញ្ហានេះបន្ថែមដូចតទៅ៖
វិទ្យុអាស៊ីសេរី មិនទាន់អាចទាក់ទងប្អូនប្រុសលោកបណ្ឌិត កែម ឡី គឺលោក កែម រិទ្ធិសិត ដើម្បីសាកសួរបន្ថែមជុំវិញរឿងនេះនៅឡើយទេកាលពីថ្ងៃសៅ ទី២១ កក្កដា ប៉ុន្តែតាមរយៈវីដេអូឃ្លីបដែលផ្សាយនៅសារព័ត៌មាន Fresh News លោក កែម រិទ្ធិសិត បានថ្លែងអំណរគុណលោក ហ៊ុន សែន ដែលបានជួយថវិកាសម្រាប់កសាងចេតិយសពបងប្រុសរបស់លោក។
លោក ហ៊ុន សែន ក៏បានមានប្រសាសន៍បញ្ជាក់ភ្លាមដែរថា នឹងជួយឧបត្ថម្ភថវិកាជាបន្តបន្ទាប់ទៀតរហូតដំណើរការសាងសង់ចេតិយសម្រេចជាស្ថាពរ៕