Clik here to view.
ប្រជាពលរដ្ឋសហគមន៍ផ្លូវដែកដែលរស់នៅសងខាងផ្លូវរថភ្លើងក្នុងរាជធានីភ្នំពេញ ប្រមាណ ៦០នាក់ ប្រមូលផ្ដុំគ្នានៅខាងមុខវត្តទួលសង្កែ ខណ្ឌឫស្សីកែវ នៅព្រឹកថ្ងៃទី២០ កក្កដា។ ការជួបជុំនេះ ដោយពួកគាត់មានបំណងយកញត្តិទៅដាក់សាលារាជធានីភ្នំពេញ ស្នើឲ្យអភិបាលសាលារាជធានីភ្នំពេញដែលទើបឡើងកាន់តំណែងថ្មី គឺលោក ឃួង ស្រេង បន្តយន្តការដោះស្រាយតាមការសន្យារបស់អតីតអភិបាលរាជធានីភ្នំពេញ លោក ប៉ា សុជាតិវង្ស។
មន្ត្រីមកពីសាលារាជធានីភ្នំពេញ បានដឹកនាំតំណាងពលរដ្ឋសហគមន៍រថភ្លើងចំនួន ៦រូប ចេញពីកន្លែងជួបជុំគ្នាដើម្បីចូលដាក់ញត្តិដល់សាលារាជធានីភ្នំពេញ។
ប្រធានសហគមន៍ទួលសង្កែប៊ី (B) ខណ្ឌឫស្សីកែវ លោក ឡុង ចាន់ឌី ថ្លែងថា តំណាងពលរដ្ឋបានដាក់ញត្តិជុំវិញការព្រួយបារម្ភពីបញ្ហាផ្ទះសម្បែងជូនលោក មាន ចាន់យ៉ាដា ជាអ្នកនាំពាក្យសាលារាជធានីភ្នំពេញ។ ជាលទ្ធផល លោក មាន ចាន់យ៉ាដា សន្យាថានឹងសម្រួលពេលវេលាជួបពិភាក្សាជាមួយពលរដ្ឋ។
លោកបន្តថា ញត្តិនេះមានគោលបំណងឲ្យអភិបាលថ្មីដែលទើបកាន់តំណែង លោក ឃួង ស្រេង បន្តយន្តការដោះស្រាយតាមការសន្យារបស់អតីតអភិបាលរាជធានីភ្នំពេញ លោក ប៉ា សុជាតិវង្ស ដែលបានសន្យាជាមួយពលរដ្ឋមុនថ្ងៃបោះឆ្នោតឃុំ-សង្កាត់ពីការអភិវឌ្ឍនៅនឹងកន្លែង និងពន្យល់ពួកគាត់ពីភាពមិនច្បាស់លាស់ពីការផ្ដល់ដីជូនពលរដ្ឋមានទំហំ ៤ គុណ ១៥ម៉ែត្រ តែមិនទាន់ដឹងកន្លែងណាពិតប្រាកដនៅឡើយ៖ «កន្លែងមកពុំទាន់មានពន្លឺនៃការដោះស្រាយ។ ផ្លូវនេះសាលារាជធានីភ្នំពេញ ក៏ដូចជារាជរដ្ឋាភិបាល ដកផ្លូវដែកចេញជំនួសវិញដោយផ្លូវបេតុង ដែលមានចម្ងាយពីគីឡូម៉ែត្រលេខ៦ ដល់ផ្លូវ៧០ មកដល់ពេលនេះពុំទាន់មានដំណោះស្រាយនៅឡើយ»។
ពលរដ្ឋមួយរូបទៀត លោកស្រី កែវ បុប្ផា ថ្លែងថា មុនស្ថាបនាផ្លូវ គួរមានការប្រឹក្សាយោបល់ជាមួយពលរដ្ឋឲ្យជាក់លាក់ និងផ្ដល់ពន្លឺនៃការដោះស្រាយជូនពលរដ្ឋ។ ប៉ុន្តែលោកស្រីបន្តថា គោលការណ៍ដោះស្រាយអភិវឌ្ឍនៅនឹងកន្លែង គឺជាជម្រើសល្អបំផុតដែលពលរដ្ឋគាំទ្រ៖ «រាជធានីចាស់ (អតីតអភិបាលរាជធានីភ្នំពេញ លោក ប៉ា សុជាតិវង្ស) គាត់បាននិយាយថា គាត់មិនឲ្យប្រជាពលរដ្ឋណារងទឹកភ្នែកទេ សូម្បីតែសិស្សក៏មិនឲ្យដូរសាលាដែរ។ នេះ គឺជាសម្ដីពេជ្រ។ ខ្ញុំគាំទ្រ។ ក្រែងលោអភិបាលថ្មីគាត់អត់ដឹងការសន្យាជាមួយពលរដ្ឋ។ ពេញចិត្តតម្រូវការរបស់ពលរដ្ឋ គឺចង់បានអ៊ីចឹង»។
ឆ្លើយតបបញ្ហានេះ អ្នកនាំពាក្យសាលារាជធានីភ្នំពេញ លោក ម៉េត មាសភក្ដី មានប្រសាសន៍ថា ជាយន្តការការងារ ពុំមានអ្វីផ្លាស់ប្ដូរនោះទេ។ លោកថា សាលារាជធានីនៅតែបន្តផែនការនេះក្នុងគោលការណ៍អភិវឌ្ឍន៍នៅនឹងកន្លែង ជាមួយនឹងការរៀបចំឲ្យមានសណ្ដាប់ធ្នាប់ និងផ្ដល់ជូននូវប័ណ្ណកម្មសិទ្ធិផ្ទះសម្បែងជូនពលរដ្ឋ។ ចំណែកបញ្ហាផ្ដល់ជូនដីទំហំប៉ុន្មានៗនោះ គឺពុំទាន់មានសម្រេចចេញជាផ្លូវការនៅឡើយទេ។ ក្រុមការងារត្រូវប្រើពេលសិក្សាបន្ត។ ការផ្ដល់ដីនេះទៀតសោត គឺស្ថិតនៅក្នុងគោលការណ៍អភិវឌ្ឍន៍នៅនឹងកន្លែងដដែល៖ «ជាជំហាន នៅសិក្សា អត់ទាន់មានអីឲ្យបងប្អូនជ្រាបជាព័ត៌មាន ព្រោះយើងកំពុងតែគិតគូរនៅឡើយ ប៉ុន្តែច្បាស់ណាស់គាត់ត្រូវមានភាពកក់ក្ដៅ មានការអភិវឌ្ឍនៅនឹងកន្លែង»។
ការព្រួយបារម្ភអំពីការបាត់បង់ផ្ទះពីការអភិវឌ្ឍផ្លូវរថភ្លើងតាំងពីជំនាន់លោក ប៉ា សុជាតិវង្ស នៅជាអភិបាលរាជធានីភ្នំពេញនេះ គឺគម្រោងរបស់រដ្ឋាភិបាល អភិវឌ្ឍផ្លូវបេតុងដើម្បីរំដោះចរាចរណ៍ទំហំ ៣០ម៉ែត្រ មានចម្ងាយពីគីឡូម៉ែត្រលេខ៦ ដល់ផ្លូវ៧០ ដែលមានប្រវែង ១៥ម៉ែត្រម្ខាងពីអក្សរផ្លូវ។
សហគមន៍ឲ្យដឹងថា ជាបឋម ការអភិវឌ្ឍនេះធ្វើឲ្យប៉ះពាល់ក្បាលដី និងខ្នងផ្ទះរបស់ពលរដ្ឋរស់នៅតាមបណ្ដោយផ្លូវរថភ្លើងជាង ១ពាន់ខ្នងផ្ទះ (១.១៤៩ផ្ទះ)។ ពលរដ្ឋដែលអស់ផ្ទះទាំងស្រុងពីការពង្រីកផ្លូវមានចំនួន ៣៤៣គ្រួសារ និងពលរដ្ឋដែលសល់ផ្ទះក្រោម ៥ម៉ែត្រ គឺមាន ១០០គ្រួសារ៕
