មន្ត្រីគណបក្សសង្គ្រោះជាតិ អះអាងថា គណបក្សរបស់ខ្លួនមិនទាន់គិតគូរសំណើរបស់លោកព្រឹទ្ធាចារ្យ លឺ ឡាយស្រេង ដែលចង់ឲ្យគណបក្សមានអាសនៈទាំងពីរក្នុងរដ្ឋសភា រួមគ្នាបង្កើតច្បាប់ថ្មីមួយដើម្បីការពារនាយករដ្ឋមន្ត្រីផុតអាណត្តិនៅឡើយទេ។ ទោះជាយ៉ាងណា សំណើនេះត្រូវបានភាគីប្រធានគណបក្សប្រជាជនកម្ពុជា ទាត់ចោលរួចទៅហើយ។
បើទោះបីជាគណបក្សកាន់អំណាច ប្រហែលមិនទាន់ចង់បង្កើតច្បាប់ដើម្បីការពារនាយករដ្ឋមន្ត្រីផុតអាណត្តិក្ដី ប៉ុន្តែអ្នកវិភាគនយោបាយមើលឃើញថា ស្ថិតក្នុងស្ថានភាពតានតឹងដូចសព្វថ្ងៃ ដែលគណបក្សមួយពិបាកក្នុងការផ្ទេរអំណាចទៅឲ្យគណបក្សមួយផ្សេងទៀតនោះ ដូច្នោះគួរតែដល់ពេលវេលាដើម្បីឲ្យរដ្ឋសភាបង្កើតច្បាប់ការពារនាយករដ្ឋមន្ត្រីដែលផុតអាណត្តិហើយ។
សាស្ត្រាចារ្យផ្នែកវិទ្យាសាស្ត្រនយោបាយ លោក សូ ចន្ថា ថ្លែងប្រាប់អាស៊ីសេរីនៅថ្ងៃទី១៦ កក្កដា ថា គំនិតចង់បង្កើតច្បាប់ការពារនាយករដ្ឋមន្ត្រីនេះ គឺជារឿងល្អមួយ ព្រោះជាផ្នែកមួយដែលអាចជួយបញ្ចប់វប្បធម៌ទឹកឡើងត្រីស៊ីស្រមោច ទឹកហោចស្រមោចស៊ីត្រី៖ «ការលើកកម្ពស់នាយករដ្ឋមន្ត្រីនៅពេលដែលអស់ពីតួនាទីទៅនេះ គឺជារឿងល្អនៅក្នុងកាលៈទេសៈដែលកម្ពុជា កំពុងមានភាពតឹងតែងនៅក្នុងដំណើរការនៃការផ្ទេរអំណាច»។
កាលពីថ្ងៃទី១៥ កក្កដា អតីតឧបនាយករដ្ឋមន្ត្រី និងជាអតីតមន្ត្រីជាន់ខ្ពស់គណបក្សរាជានិយមហ៊្វុនស៊ិនប៉ិច លោក លឺ ឡាយស្រេង បានផ្ញើលិខិតចំហចំនួន ២ច្បាប់ទៅកាន់ប្រធានគណបក្សប្រជាជនកម្ពុជា លោកនាយករដ្ឋមន្ត្រី ហ៊ុន សែន និងមួយច្បាប់ទៀតទៅកាន់ប្រធានគណបក្សសង្គ្រោះជាតិ លោក កឹម សុខា ដើម្បីឲ្យមេដឹកនាំគណបក្សទាំងពីរនេះស្នើទៅរដ្ឋសភាបង្កើតច្បាប់ការពារនាយករដ្ឋមន្ត្រីផុតអាណត្តិ ក្នុងការធ្វើឲ្យមានអភ័យឯកសិទ្ធិ និងដំឡើងគោរមងារជាវីរបុរសជាតិ ដើម្បីជាការលើកទឹកចិត្តចំពោះគុណបំណាច់ក្នុងការដឹកនាំប្រទេសជាតិ។ លោក លឺ ឡាយស្រេង បញ្ជាក់ថា មូលហេតុដែលលោកចង់ឲ្យបង្កើតច្បាប់ថ្មីនេះ ដោយសារកន្លងទៅ កម្ពុជា គឺជាអាណាចក្រធ្លាប់ថ្កុំថ្កើងរុងរឿង ប៉ុន្តែក្រោយមកបែរជាកើតមានសង្គ្រាមឥតស្រាកស្រាន្ត និងធ្វើឲ្យប្រជាជនធ្លាក់ខ្លួនក្រីក្រតោកយ៉ាក ព្រមទាំងធ្វើឲ្យចំណាកស្រុកដូចសព្វថ្ងៃនេះ ដោយសារតែខ្មែរមិនចេះអនុគ្រោះឲ្យខ្មែរដូចគ្នា និងចេះតែដណ្ដើមអំណាចគ្នាមិនចេះចប់មិនចេះហើយ។
ទោះជាយ៉ាងណា សំណើនេះត្រូវបានលោកនាយករដ្ឋមន្ត្រី ហ៊ុន សែន ចាត់ទុកថា គឺជាឧបាយកលទុច្ចរិត ដើម្បីធ្វើឲ្យប្រជាពលរដ្ឋយល់ច្រលំថា នាយករដ្ឋមន្ត្រីសព្វថ្ងៃកំពុងធ្វើអ្វីមួយខុសធ្ងន់ធ្ងរ។ លោក ហ៊ុន សែន បានផ្ដល់បទសម្ភាសន៍ដល់សារព័ត៌មានក្នុងស្រុកទៀតថា សំណើរបស់លោក លឺ ឡាយស្រេង បែបនេះ គឺជាសំណើស្មោកគ្រោក និងជាការប្រមាថដ៏ធ្ងន់ធ្ងរមកលើគណបក្សប្រជាជនកម្ពុជា របស់លោក ដែលបង្ហាញអំពីការត្រៀមខ្លួនចាញ់ ហើយគណបក្សប្រឆាំងវិញកំពុងត្រៀមខ្លួនឈ្នះ។
ចំណែកមន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ បានឆ្លើយតបចំពោះសំណើរបស់លោក លឺ ឡាយស្រេង នេះយ៉ាងខ្លីថា គណបក្សរបស់លោកមិនទាន់យកមកគិតគូរនៅឡើយទេ ហើយលោកក៏មិនចង់ធ្វើការបកស្រាយច្រើនជុំវិញការលើកឡើងរបស់លោក ហ៊ុន សែន ដែរ៖ «គណបក្សមិនទាន់យករឿងនោះមកគិតនៅឡើយទេ»។
អ្នកជំនាញខាងវិទ្យាសាស្ត្រនយោបាយ លោក សូ ចន្ថា មិនយល់ឃើញថា សំណើដែលសុំបង្កើតច្បាប់ការពារនាយករដ្ឋមន្ត្រីផុតអាណត្តិនោះ គឺជាការប្រមាថទៅដល់គណបក្សនយោបាយណាមួយឡើយ ព្រោះលោកថា ច្បាប់នេះគឺមានសារសំខាន់ដើម្បីឲ្យគ្រប់គណបក្សនយោបាយទាំងអស់ហ៊ានឈ្នះហ៊ានចាញ់ និងធ្វើឲ្យមានការប្រកួតប្រជែងនយោបាយតាមបែបលទ្ធិប្រជាធិបតេយ្យ តាមរយៈការបោះឆ្នោតដោយសេរី ត្រឹមត្រូវ និងយុត្តិធម៌៖ «ជារួម មេដឹកនាំនៅក្នុងពិភពលោកទាំងអស់នៅពេលដែលដឹកនាំហើយ មិនមានអ្នកណាមួយដែលគ្មានកំហុសនោះទេ ហើយចង់មិនចង់ លោកតែបារម្ភចំពោះកំហុសទាំងអស់នោះ។ ហើយគិតថានៅក្នុងប្រទេសនានាដែលមានស្ថានភាពស្រដៀងគ្នាដូចកម្ពុជា គេតែងបង្កើតឲ្យមានយុទ្ធនាការបង្កើតឲ្យមានការផ្ទេរអំណាចដោយសន្តិវិធីនេះ»។
លោក សូ ចន្ថា បន្តថា ច្បាប់ការពារនាយករដ្ឋមន្ត្រី គឺមានសារសំខាន់ជាងច្បាប់ស្ដីពីគណបក្សនយោបាយ ដែលតំណាងរាស្ត្រគណបក្សប្រជាជនកម្ពុជា នាំគ្នាធ្វើវិសោធនកម្មម្ដងជាពីរដងទៅទៀត ព្រោះលោកថា ច្បាប់ការពារនាយករដ្ឋមន្ត្រីនេះអាចធ្វើឲ្យអ្នកនយោបាយមានការបង្រួបបង្រួមគ្នា និងមិនចងគំនុំគុំកួននឹងគ្នា។
លោក សូ ចន្ថា ក៏បញ្ជាក់ថា បើទោះជាបក្សប្រឆាំងចង់បង្កើតឲ្យមានច្បាប់ការពារនាយករដ្ឋមន្ត្រីនេះក្ដី ក៏មិនអាចទៅរួចដែរ ព្រោះគណបក្សកាន់អំណាចដែលមានសំឡេង ៥០+១ បានបដិសេធទៅហើយនោះ ប៉ុន្តែលោកថា ប្រសិនបើបក្សទាំងពីរចរចាគ្នា និងគិតថាច្បាប់នោះបម្រើផលប្រយោជន៍ជាតិ ទើបអាចឲ្យច្បាប់នោះចេញជារូបរាងបាន៕