តំណាងរាស្ត្រមណ្ឌលខេត្តពោធិ៍សាត់ របស់គណបក្សសង្គ្រោះជាតិ អំពាវនាវឲ្យចៅក្រមសាលាដំបូង ឬសាលាឧទ្ធរណ៍ ដោះលែងសកម្មជនខ្លួនដែលជាប់ចោទពីបទបង្កគ្រោះថ្នាក់ចរាចរណ៍ឲ្យមានសេរីភាពវិញ ដោយអះអាងថា បទចោទធ្វើឡើងដោយបំពានច្បាប់។ សាលាដំបូងខេត្តពោធិ៍សាត់ កំពុងធ្វើលិខិតបំភ្លឺ១ច្បាប់ទៅរដ្ឋសភា ជាការឆ្លើយតបនឹងសេចក្ដីថ្លែងការណ៍របស់តំណាងរាស្ត្ររូបនេះ។
បន្ទាប់ពីរិះគន់ផ្ទាល់មាត់ច្រើនដងលើប្រព័ន្ធតុលាការនៅកម្ពុជា តំណាងរាស្ត្របក្សប្រឆាំងមណ្ឌលពោធិ៍សាត់ លោក ងឹម ញេង ចេញសេចក្ដីថ្លែងការណ៍មួយកាលពីថ្ងៃទី១៣ ខែកក្កដា ដោយលើកអង្គហេតុ និងអង្គច្បាប់ជាក់លាក់លើករណីប្រធានគណៈកម្មាធិការប្រតិបត្តិគណបក្សសង្គ្រោះជាតិ ខេត្តពោធិ៍សាត់ លោក យ៉ាន់ សេងហ៊ត បើកឡានប៉ះក្មេងអាយុ ៥ឆ្នាំ នៅស្រុកវាលវែង ក្នុងអំឡុងពេលធ្វើយុទ្ធនាការឃោសនាបោះឆ្នោតឃុំ-សង្កាត់។
នៅក្នុងសេចក្ដីថ្លែងការណ៍របស់តំណាងរាស្ត្របក្សប្រឆាំងដែលចេញក្រោយសាលាឧទ្ធរណ៍បើកសវនាការសម្រេចមិនឲ្យលោក យ៉ាន់ សេងហ៊ត បាននៅក្រៅឃុំបណ្ដោះអាសន្នភ្លាមៗ ថាសាលាដំបូង និងសាលាឧទ្ធរណ៍ បានរំលោភសិទ្ធិរូបវន្តបុគ្គលធ្ងន់ធ្ងរ ដែលការពារដោយកតិកាសញ្ញាស្ដីពីសិទ្ធិមនុស្សជាសកល ហើយកម្ពុជា បានចុះហត្ថលេខាប្ដេជ្ញាគោរព និងមានកាតព្វកិច្ចអនុវត្តច្រើនឆ្នាំហើយ។
បន្ថែមលើសេចក្ដីថ្លែងការណ៍នេះ លោក ងឹម ញេង អំពាវនាវឲ្យចៅក្រម និងព្រះរាជអាជ្ញាគ្រប់ជាន់ថ្នាក់ ត្រូវសម្រេចសេចក្ដីដោយផ្អែកលើគតិយុត្តិធម៌ដើម្បីផ្ដល់យុត្តិធម៌ដល់មនុស្សក្នុងសង្គម៖ «ខ្ញុំអំពាវឲ្យតុលាការដោះលែងលោក យ៉ាន់ សេងហ៊ត ហើយទម្លាក់បទចោទទាំងអស់ ប៉ុន្តែខ្ញុំអំពាវនាវទៅចៅក្រមទាំងអស់ គឺសូមឲ្យធ្វើសេចក្ដីសម្រេចចិត្តឈរលើមនសិការ និងឧត្ដមគតិរបស់ខ្លួន ទោះបីគាត់មានឆន្ទានុសិទ្ធិក្នុងការធ្វើសេចក្ដីសម្រេច តែសុំឲ្យសម្រេចទៅលើឧត្ដមគតិរបស់ខ្លួន កុំសម្រេចលើបញ្ជាគេ ដល់ហើយយូរទៅស្ថាប័នស្រុកខ្មែរក្លាយជាតុលាការតេឡេ វាចប់ហើយអាហ្នឹងមិនដឹងធ្វើម៉េចទេ»។
អ្នកនាំពាក្យសាលាដំបូងខេត្តពោធិ៍សាត់ លោក ហេង ដូនីន ឲ្យដឹងថា សំណុំរឿងនេះបានបញ្ជូនទៅសាលាឧទ្ធរណ៍អស់ហើយ រីឯរឿងអង្គសេចក្ដីនៅសាលាដំបូង ចៅក្រមកំពុងដំណើរការ ហើយអាចនឹងបិទការស៊ើបសួរឆាប់ៗ។ លោកមិនចង់ថ្លែងពីការយល់ឃើញយ៉ាងណាចំពោះសេចក្ដីថ្លែងការណ៍របស់តំណាងរាស្ត្រនេះទេ ប៉ុន្តែលោកថា តំណាងអយ្យការកំពុងធ្វើលិខិតបំភ្លឺ១ច្បាប់ទៅរដ្ឋសភា៖ «អ្នកនាំពាក្យខាងអយ្យការនឹងឆ្លើយ គាត់កំពុងរៀបចំឆ្លើយ។ ខ្ញុំអ្នកនាំពាក្យបងការយល់យ៉ាងម៉េចនោះជារឿងរបស់តុលាការទេ»។
កាលពីរសៀលថ្ងៃទី២៧ ខែឧសភា ឆ្នាំ២០១៧ លោក យ៉ាន់ សេងហ៊ត បើកឡានម៉ាក PAJERO ពីទីរួមស្រុកវាលវែង ឆ្ពោះទៅក្រុងពោធិ៍សាត់ តាមបណ្ដោយផ្លូវលេខ៥៥ ក្នុងល្បឿន ៣០គីឡូម៉ែត្រក្នុង ១ម៉ោង ដល់ចំណុចភូមិស្ទឹងថ្មី ឃុំប្រមោយ ស្រាប់តែមានកុមារម្នាក់ឈ្មោះ ណាត សុវណ្ណនី រត់ឆ្លងថ្នល់បណ្ដាលឲ្យឡានបុកខ្ទាតទៅចិញ្ចើមថ្នល់រងរបួសធ្ងន់ ហើយកុមាររូបនោះត្រូវបានបញ្ជូនទៅសង្គ្រោះភ្លាមៗ។ ជនរងគ្រោះដែលបញ្ជូនទៅសង្គ្រោះនៅគ្លីនិកឯកជនខេត្តបាត់ដំបង ហើយបញ្ជូនបន្តទៅមន្ទីរពេទ្យគន្ធបុប្ផាអង្គរ បានជាសះស្បើយ ហើយគ្រូពេទ្យឲ្យចេញទៅផ្ទះវិញក្នុងរយៈពេល ៧ថ្ងៃ ក្រោយគ្រោះថ្នាក់។
ច្បាប់ចរាចរណ៍ផ្លូវគោកថ្មី មាត្រា៨៣ ចែងថា ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្ដីពីចរាចរណ៍ផ្លូវគោកបណ្ដាលឲ្យមានរបួសដល់អ្នកដទៃ ហើយបណ្ដាលឲ្យអសមត្ថភាពការងារក្នុងរយៈពេលស្មើ ឬលើសពី ៨ថ្ងៃ គិតពីថ្ងៃកើតហេតុត្រូវផ្ដន្ទាទោសដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពី ២លានរៀល ដល់ ១០លានរៀល៕