ស្នងការនគរបាលខេត្តព្រះសីហនុ បានឲ្យដឹងថា ឆមាសទី១ ឆ្នាំ២០១៧ អត្រាគ្រោះថ្នាក់ចរាចរណ៍ និងមនុស្សស្លាប់ដោយគ្រោះថ្នាក់នេះ បានថយចុះ បើប្រៀបធៀបពេលវេលាដូចគ្នាឆ្នាំ២០១៦។ អ្នកឃ្លាំមើលបញ្ហាសង្គមអះអាងថា ទោះចំនួនគ្រោះថ្នាក់នេះថយចុះ ប៉ុន្តែអត្រាគ្រោះថ្នាក់ដូចបច្ចុប្បន្ននេះ នៅតែមានចំនួនខ្ពស់គួរឲ្យព្រួយបារម្ភ។
របាយការណ៍នៃអត្រាគ្រោះថ្នាក់ចរាចរណ៍នៅខេត្តព្រះសីហនុ ៦ខែ ឆ្នាំ២០១៧ បង្ហាញថា ខេត្តនេះមានគ្រោះថ្នាក់ចរាចរណ៍កើតឡើងចំនួន ១១០ករណី បើប្រៀបធៀប ៦ខែ ឆ្នាំ២០១៦ បានថយចុះ ៦៦ករណី។ គ្រោះថ្នាក់នេះ បានសម្លាប់មនុស្ស ៣១នាក់ បើធៀបឆ្នាំ២០១៦ បានថយចុះ ២៥នាក់ និងអ្នករងរបួសធ្ងន់ស្រាលមាន ២០២នាក់ បានថយចុះ ១០៨នាក់។ គ្រោះថ្នាក់ចរាចរណ៍នេះ បានខូចខាតយានយន្តជិត ២០០គ្រឿង ហើយអ្នកបង្កគ្រោះថ្នាក់នេះ មានទាំងជនជាតិខ្មែរ និងបរទេសមានជនជាតិចិន និងមកពីអឺរ៉ុបជាដើម។
ស្នងការរងនគរបាលខេត្តព្រះសីហនុ និងជាប្រធានការិយាល័យកណ្ដាលនគរបាលសណ្ដាប់ធ្នាប់សាធារណៈ លោក អ៊ី សុខា ឲ្យដឹងថា ការថយចុះអត្រាគ្រោះថ្នាក់ចរាចរណ៍នៅឆមាសទី១ ឆ្នាំ២០១៧ នេះ អាចដោយសារកម្លាំងសមត្ថកិច្ចជំនាញបានចុះអប់រំ និងពង្រឹងការអនុវត្តច្បាប់ចរាចរណ៍នៅតាមផ្លូវនានា ទាំងទីប្រជុំជន និងនៅតាមដងផ្លូវជាតិលេខ៤ ជារៀងរាល់ថ្ងៃ។ ក្នុងនោះអ្នកប្រើប្រាស់ផ្លូវ ឬអ្នកបើកបរភាគច្រើន បានចូលរួមគោរពច្បាប់ចរាចរណ៍ផ្លូវគោកមានការកើនច្រើន។
ទោះជាបែបនេះក្តី លោក អ៊ី សុខា បានឲ្យដឹងថា គ្រោះថ្នាក់ចរាចរណ៍ច្រើនជាង ៥០ភាគរយ គឺបណ្ដាលមកពីអ្នកបើកបររថយន្តមានល្បឿនលឿន អ្នកបើកបរស្រវឹង បើកបរប្រជែងគ្នានៅទីតាំងផ្លូវកោង ឬផ្លូវមានសភាពគ្រោះថ្នាក់ និងបើកបរមិនគោរពភ្លើងសញ្ញាជាដើម។
គ្រោះថ្នាក់ចរាចរណ៍នេះដែរ អាណាព្យាបាល និងមន្ត្រីឃ្លាំមើលសិទ្ធិមនុស្ស ខេត្តព្រះសីហនុ បានស្នើដល់កម្លាំងសមត្ថកិច្ច ឲ្យបន្តចុះពង្រឹង ត្រួតពិនិត្យទៅលើជនបរទេសដែលបានបើកបររថយន្តដោយខ្លួនឯង ពិសេសជនជាតិចិន ដែលតែងបង្កគ្រោះថ្នាក់ចរាចរណ៍ជាបន្តបន្ទាប់មកនេះ។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា ទោះអត្រាគ្រោះថ្នាក់ចរាចរណ៍ និងអត្រាស្លាប់ពីគ្រោះថ្នាក់នេះ បានថយចុះ បើប្រៀបធៀបឆមាសទី១ ឆ្នាំ២០១៦ ក្តី ក៏ប៉ុន្តែចំនួនគ្រោះថ្នាក់ និងអត្រាអ្នកស្លាប់ ឬរងរបួសនៅតែមានចំនួនខ្ពស់នៅឡើយ។ អ្នកស្រីកត់សម្គាល់ថា រាល់ថ្ងៃនេះឃើញមានជនបរទេស ពិសេសជនជាតិចិន បានបើកបរយានយន្តគ្រប់ប្រភេទតាមផ្លូវសាធារណៈដោយសេរី និងមានល្បឿនលឿន ហើយតែងបង្កគ្រោះថ្នាក់ជាបន្តបន្ទាប់។
អ្នកស្រីបន្តថា៖ «គ្រោះថ្នាក់ចរាចរណ៍រាល់ថ្ងៃនេះ គឺមានសភាពសហាវជាងពេលមុនទៅទៀត។ បើយើងនិយាយពីចំនួនករណីវាបានថយចុះពិតមែន ប៉ុន្តែបើយើងនិយាយពីចំនួនករណីគ្រោះថ្នាក់ចរាចរណ៍ក្នុងមួយករណីៗ គឺមានមនុស្សស្លាប់ និងរងរបួសច្រើននាក់ ព្រមទាំងបានខូចខាតសម្ភារៈសាធារណៈ និងទ្រព្យសម្បត្តិឯកជនមានចំនួនច្រើន។ ឧទាហរណ៍ថា ក្នុងប៉ុន្មានថ្ងៃមុននេះ ខេត្តព្រះសីហនុ មានគ្រោះថ្នាក់ចរាចរណ៍មួយបានកើតឡើង ដោយសារអ្នកបើកបរជនជាតិចិន មានទទួលទានគ្រឿងស្រវឹង ហើយបានបុករះ បណ្ដាលឲ្យខូចខាតមធ្យោបាយធ្វើដំណើរមួយចំនួនធំ។ ក្នុងនោះក៏បានធ្វើឲ្យប៉ះពាល់ដល់ទ្រព្យសម្បត្តិរបស់ប្រជាពលរដ្ឋ និងជនរងគ្រោះផងដែរ។ អ៊ីចឹងសម្រាប់ខ្ញុំជាសង្គមស៊ីវិល ខ្ញុំនៅតែស្នើសុំឲ្យមានការរឹតបន្តឹងទៅលើទីតាំងផឹកស៊ី ហើយបើសិនធ្វើទៅបាន កន្លែងផឹកស៊ីហ្នឹងគួរតែបញ្ចប់កុំឲ្យមានការលក់ដូរគ្រឿងស្រវឹងហ្នឹងរហូតដល់មួយយប់ទល់ភ្លឺ»។
គ្រោះថ្នាក់នេះ អ្នកស្រី ជៀប សុធារី ស្នើដល់កម្លាំងសមត្ថកិច្ច ឲ្យជួយបង្កើនសកម្មភាពចុះត្រួតពិនិត្យការអនុវត្តច្បាប់ចរាចរណ៍ផ្លូវគោកទៅលើជនបរទេស មានជនជាតិចិន ជាដើម ដើម្បីឲ្យប្រាកដថា តើការបើកបរយានយន្តរបស់ជនបរទេសនៅតាមផ្លូវសាធារណៈទាំងនោះ អនុវត្តស្របតាមច្បាប់ចរាចរណ៍ផ្លូវគោកដែរ ឬទេ?
លោក អ៊ី សុខា ស្នងការរងនគរបាលខេត្តព្រះសីហនុ ឆ្លើយតបថា សមត្ថកិច្ចជំនាញមិនព្រងើយកន្តើយការងារចុះពង្រឹងការអនុវត្តច្បាប់ចរាចរណ៍ផ្លូវគោកនេះទេ។ លោកបន្តថា រាល់ថ្ងៃនេះ សកម្មភាពរបស់កម្លាំងនគរបាលចរាចរណ៍ បានចុះត្រួតពិនិត្យការបើកបរយានយន្តគ្រប់ប្រភេទតាមផ្លូវសាធារណៈជាប្រចាំ ដោយមិនកំណត់ថា អ្នកបើកបរទាំងនោះជាជនជាតិខ្មែរ ឬជនបរទេសនោះទេ៕