មេឃុំទើបទទួលតំណែងថ្មីទាំង ៧ឃុំ នៃស្រុកជុំគីរី ខេត្តកំពត ចោទជំទប់ទី២ របស់ខ្លួនថា មិនព្រមឲ្យបន្ទប់ធ្វើការទៅមេឃុំឈ្នះឆ្នោតមកពីគណបក្សសង្គ្រោះជាតិ ដែលបានប្រកាសសុពលភាពរួចរាល់ហើយនោះទេ។ មេឃុំទាំង ៧រូប នៃស្រុកជុំគីរី បញ្ជាក់ថា ការងារលិខិតស្នាមរបស់ពលរដ្ឋអាចនឹងត្រូវយឺតយ៉ាវ ដោយសារតែលិខិតស្នាមចាស់នៅក្នុងបន្ទប់ជំទប់ទី២ និងជាអតីតមេឃុំមកពីគណបក្សប្រជាជនកម្ពុជា កំពុងតែកាន់កាប់ ហើយមេឃុំជាប់ឆ្នោតថ្មីគ្មានបន្ទប់ធ្វើការ ត្រូវធ្វើការលើតុវែងសាធារណៈក្នុងសាលាឃុំ ឬក្រោមដើមឈើក្នុងបរិវេណសាលាឃុំ។
មេឃុំជាប់ឆ្នោតទាំង ៧ឃុំ ដែលបានប្រកាសសុពលភាពតាំងពីថ្ងៃទី៧ កក្កដា ប្រាប់ថា មកដល់ថ្ងៃទី១១ ខែកក្កដា ពួកលោកនៅតែគ្មានបន្ទប់ធ្វើការងារនៅឡើយទេ ដោយសារអ្នកចាញ់ឆ្នោតបានយកផ្លាកជំទប់ទី២ ទៅបិទនៅលើខ្លោងទ្វារបន្ទប់របស់មេឃុំធ្វើការកាលពីមុន ហើយប្រាប់មេឃុំថ្មីទើបជាប់ឆ្នោត ឲ្យទៅរកបន្ទប់ធ្វើការដោយខ្លួនឯង។
មេឃុំត្រពាំងរាំង លោក ហុយ ខេង ប្រាប់ថា តំណាងក្រសួងមហាផ្ទៃ នៅថ្នាក់ស្រុកបានទៅប្រកាសសុពលភាពឲ្យលោកទាំងភាពសោះកក្រោះ។ បន្ទាប់មកលោកបានចូលធ្វើការក្នុងនាមជាមេឃុំត្រពាំងរាំង កាលពីថ្ងៃទី១០ ខែកក្កដា ប៉ុន្តែជំទប់ទី២ លោក សួរ អ៊ួច មិនព្រមប្រគល់បន្ទប់មេឃុំឲ្យលោកទេ ដោយប្រាប់ថា បន្ទប់នោះជាបន្ទប់របស់លោក ហើយឲ្យលោកទៅរកបន្ទប់ផ្សេង៖ «ខ្ញុំថា ឥឡូវនេះខ្ញុំសុខចិត្តធ្វើការនៅកណ្ដាលវាល បើលោកឯង (សួរ អ៊ួច) មិនឲ្យ ក៏ខ្ញុំអត់ចូលដែរ។ ខ្ញុំធ្វើការនៅក្រោមដើមឈើក៏ធ្វើដែរ ហើយប្រជាពលរដ្ឋមកធ្វើអ្វីៗ ចុះហត្ថលេខាអីផ្សេងៗ ខ្ញុំនឹងធ្វើជូនគាត់ ហើយខ្ញុំប្រាប់គាត់ថា ខ្ញុំអត់ទាន់មានកន្លែងធ្វើការទេ គឺខ្ញុំធ្វើនៅក្រោមម្លប់ឈើ ឬក៏ក្រោយសាលាឃុំ នៅជាយអ៊ីចឹងទៅ»។
លោក ហុយ ខេង ប្រាប់ថា លោកនៅតែទាមទារបន្ទប់មេឃុំដើម្បីចូលធ្វើការវិញ ព្រោះតាមបែបបទរដ្ឋបាល មេឃុំមានបន្ទប់ធ្វើការមួយក្នុងសាលាឃុំ ហើយជំទប់ឃុំត្រូវធ្វើការនៅក្នុងបន្ទប់ក្រុមប្រឹក្សាឃុំ។ លោកប្រាប់ថា សាលាឃុំមានតែ ៤បន្ទប់ គឺសម្រាប់មេឃុំ ១បន្ទប់ ក្រុមប្រឹក្សា ១ សម្រាប់គណនេយ្យករ ១ និងសម្រាប់ស្មៀនឃុំ១ បើជំទប់ទី២ ទាមទារបន្ទប់ធ្វើការមួយដែរ លុះត្រាតែជំទប់ទី១ ក៏ត្រូវមានមួយបន្ទប់ដែរ។
ជំទប់ទី២ ឃុំត្រពាំងរាំង លោក សួរ អ៊ួច បំភ្លឺយ៉ាងខ្លីមុនចុចបិទទូរស័ព្ទថា បន្ទប់ផ្សេងមានក្រៅពីបន្ទប់របស់លោក៖ «បន្ទប់មានធ្វើការធ្វើទៅ ហើយចេះតែនិយាយអ៊ីចឹង បន្ទប់ផ្សេងមាន បន្ទប់ខ្ញុំនៅខាងកើត ហើយខ្ញុំចាំបាច់នេះ (ដូរបន្ទប់) ធ្វើអី បើការងារខ្ញុំនៅនេះហ្នឹង។ បានហើយខ្ញុំជាប់ការងារ!»។
ស្រុកជុំគីរី នៃខេត្តកំពត មានឃុំចំនួន៧ គណបក្សសង្គ្រោះជាតិ បានឈ្នះតំណែងជាមេឃុំ និងជំទប់ទី១ ទាំង ៧ឃុំ ខណៈទំជប់ទី២ គ្រប់ឃុំ បានទៅលើគណបក្សប្រជាជនកម្ពុជា។
អនុប្រធានគណបក្សសង្គ្រោះជាតិ ប្រចាំស្រុកជុំគីរី លោក ស៊ិន វណ្ណា ប្រាប់ថា មេឃុំទាំង៧ មិនត្រឹមតែគ្មានបន្ទប់ធ្វើការទេ ថែមទាំងពិបាកធ្វើការជាមួយស្មៀន ដោយសារតែស្មៀនអ្នកកាន់ត្រាសាលាឃុំ មិនសូវនៅកន្លែង ឬដើរចោលកន្លែងធ្វើការ។ បញ្ជីលិខិតស្នាមទាំងប៉ុន្មាន លោកថា នៅក្នុងបន្ទប់មេឃុំដែលជំទប់ទី២ អតីតជាមេឃុំចាញ់ឆ្នោតកំពុងកាន់កាប់ ពិបាកក្នុងការសម្រួលឯកសារឲ្យពលរដ្ឋខ្លាំងណាស់។
លោកស្នើឲ្យអាជ្ញាធរពិនិត្យឡើងវិញ ករណីមេឃុំគ្មានបន្ទប់ធ្វើការក្នុងសាលាឃុំនេះ ខណៈដែលអាជ្ញាធរថ្នាក់ស្រុកប្រាប់លោកថា ករណីនេះជារឿងតូចតាចតែប៉ុណ្ណោះ៖ «ឯកសារ បញ្ជី ភាគច្រើននៅកន្លែងមេឃុំគេហ្នឹង (បន្ទប់ដែលជំទប់ទី២ កំពុងកាន់កាប់)។ យើងចង់បានឯកសារពលរដ្ឋ ឬគាត់ទៅរកឯកសារ បញ្ជីអត្រានុកូលដ្ឋាន បញ្ជាក់កំណើត សំបុត្រកំណើត ពិបាក ទាំង ៧ឃុំដូចគ្នា»។
ករណីជំទប់ឃុំមិនព្រមប្រគល់បន្ទប់ធ្វើការឲ្យទៅមេឃុំទើបជាប់ឆ្នោតមកពីគណបក្សប្រឆាំងនៅអាណត្តិនេះ មិនមែនទើបតែកើតមាននៅក្នុងស្រុកជុំគីរី ខេត្តកំពត នោះទេ នៅឯខេត្តព្រះសីហនុ ក្នុងសង្កាត់លេខ១ ក៏មានករណីចៅសង្កាត់ចាញ់ឆ្នោតមិនព្រមប្រគល់សោបន្ទប់ឲ្យចៅសង្កាត់ថ្មីដែរ។
ពលរដ្ឋនៅខេត្តកំពត ក៏មិនខុសពីពលរដ្ឋនៅខេត្តព្រះសីហនុ ដែរ ដោយអ្នកខ្លះបានពេបជ្រាយ និងរិះគន់ទង្វើរបស់ជំទប់ទី២ គណបក្សប្រជាជនកម្ពុជា នៅស្រុកជុំគីរី ថាស្ដាយស្រណោះបន្ទប់ធ្វើការងារជារឿងអាម៉ាស់បំផុត។ អ្នកខ្លះទៀតក៏បានរិះគន់ថា ពេលពលរដ្ឋស្រលាញ់គាំទ្រមិនខំប្រឹងធ្វើការ តែដល់ពេលចាញ់ឆ្នោតខំស្រវាក្ដោបក្ដាប់បន្ទប់ធ្វើការ។
មន្ត្រីផ្នែកច្បាប់ និងអង្កេតនៃអង្គការខុមហ្វ្រែល (COMFREL) លោក យឿង សុធារ៉ា យល់ថា បើទោះជាគ្មានច្បាប់ចែងច្បាស់ថា មេឃុំត្រូវអង្គុយនៅបន្ទប់ណា ប៉ុន្តែក្រសួងមហាផ្ទៃ គួរតែមានបទបញ្ជា ឬចេញសេចក្ដីណែនាំដើម្បីកុំបណ្ដោយឲ្យមានការដណ្ដើមបន្ទប់គ្នាធ្វើការយ៉ាងដូច្នេះ។ លោក យឿង សុធារ៉ា យល់ថា គឺមេឃុំទេដែលត្រូវជាអ្នកមានសិទ្ធិក្នុងការសម្រេចឲ្យសមាជិកក្រុមប្រឹក្សាឃុំទៅអង្គុយនៅបន្ទប់ណាមួយ ហើយរាល់ការចាត់ចែងក្នុងសាលាឃុំគួរតែមេឃុំ មិនមែនជំទប់ទី២ នោះទេ។
លោក យឿង សុធារ៉ា៖ «ដោយសារសាលាឃុំវាជារបស់រដ្ឋ បើគ្មានសេចក្តីណែនាំពីលើនោះទេ វាគួរតែស្ដាប់ការចាត់ចែងរបស់មេឃុំ។ នៅក្នុងឃុំសង្កាត់គឺមេឃុំហ្នឹងហើយ ទោះបីជាគាត់ជាប់ថ្មីក៏ដោយ គឺគាត់មានសិទ្ធិមានអំណាចចាត់ចែង បើសិនជាគ្មានការណែនាំពីថ្នាក់លើទៅ។ តែបើសិនជាមានការណែនាំពីខាងលើជាលាយលក្ខណ៍អក្សរ គួរតែធ្វើតាមបញ្ជាក្រសួងមហាផ្ទៃ ទៅ។ មិនគួរធ្វើទម្លាប់មិនល្អអ៊ីចឹងទេ អាហ្នឹងវាធ្វើឲ្យរូបភាពពីខាងក្រៅអាក្រក់មើលពេក»។
ចំណែកមន្ត្រីសម្របសម្រួលនៃអង្គការលីកាដូ (LICADHO) ប្រចាំខេត្តកំពត លោក យន់ ផល្លី យល់ថា សាលាឃុំជារបស់រដ្ឋ ហើយអ្នកដែលចាញ់ឆ្នោត គឺពលរដ្ឋក្នុងឃុំលែងគាំទ្រ ត្រូវតែប្រគល់បន្ទប់ការងារដែលជាទ្រព្យសម្បត្តិរបស់រដ្ឋឲ្យអ្នកឈ្នះជារឿងធម្មតានៅក្នុងសង្គមប្រជាធិបតេយ្យ៖ «ក្រោយពីបោះឆ្នោតអាណត្តិទី៤នេះហើយ ទោះបីគណបក្សនយោបាយណាជាប់ឆ្នោតក៏ដោយ អ៊ីចឹងសាលាឃុំជារបស់រដ្ឋ អ្នកដែលត្រូវបានចាញ់ឆ្នោត ឬក៏ធ្លាក់ឆ្នោតត្រូវតែប្រគល់បន្ទប់ការងារនោះទៅឲ្យអ្នកដែលជាប់ឆ្នោតថ្មី។ យើងមិនអាចកាន់កាប់បន្ទប់នោះបានទេ ព្រោះនេះជាទ្រព្យសម្បត្តិរបស់រដ្ឋ»។
សង្គមស៊ីវិលចាត់ទុកការដណ្ដើមបន្ទប់មេឃុំធ្វើការថា គឺជារូបភាពដ៏អាក្រក់ ហាក់ដូចខ្លួនឯងកំពុងកាងបន្ទប់សាលាឃុំដែលជាទ្រព្យសម្បត្តិរដ្ឋ៕