កងកម្លាំងសមត្ថកិច្ច និងកងកម្លាំងសន្តិសុខខណ្ឌចំការមន ប្រហែល ៣០នាក់ ត្រូវបានរដ្ឋាភិបាលដាក់ពង្រាយរារាំងមន្ត្រីអង្គការសង្គមស៊ីវិលចំនួន ៤នាក់ ដែលបាននាំគ្នាយកបាច់ផ្កាឈូក និងរូបថតទៅគោរពវិញ្ញាណក្ខន្ធបណ្ឌិត កែម ឡី នៅហាងស្ដារម៉ាត (Star Mart) នៃស្ថានីយប្រេងឥន្ធនៈកាល់តិច (Caltex) ក្បែរស្ដុបបូកគោ រាជធានីភ្នំពេញ ជាទីកន្លែងឃាតកបាញ់សម្លាប់លោកបណ្ឌិត កែម ឡី កាលពី ១ឆ្នាំមុន។
អនុប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន ថ្លែងថា សិទ្ធិសេរីភាពជួបជុំ និងសិទ្ធិបញ្ចេញមតិនៅតាមទីសាធារណៈ ត្រូវបានខ្ទប់ និងរឹតត្បិតយ៉ាងខ្លាំង។ អ្នកស្រីបញ្ជាក់ថា គ្រាន់តែស្នើសុំរយៈពេល ២ម៉ោងក្នុងការរៀបចំកៅអីតម្កល់រូបថតលោកបណ្ឌិត កែម ឡី និងយកបាច់ផ្កាឈូកមកគោរពវិញ្ញាណក្ខន្ធនៅហាងស្ដារម៉ាត កាល់តិច គម្រប់ខួបមួយឆ្នាំនៃការបាញ់សម្លាប់លោក បែរជាអាជ្ញាធរចុះមករំខាន និងរារាំងមិនអនុញ្ញាតឲ្យធ្វើទៅវិញ។