Clik here to view.
រដ្ឋាភិបាលកម្ពុជា អំពាវនាវឲ្យពលករខ្មែរដែលកំពុងបំពេញការងារនៅប្រទេសថៃ រក្សាភាពនឹងន និងធ្វើការងារជាប្រក្រតីជាមួយនិយោជករបស់ពួកគេ។ ការអំពាវនាវនេះ គឺមួយថ្ងៃក្រោយពីរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង បានជួបចរចាជាមួយរដ្ឋមន្ត្រីក្រសួងការងារថៃ។
បន្ទាប់ពីរដ្ឋាភិបាលថៃ ប្រកាសដាក់ឲ្យប្រើច្បាប់ថ្មីដែលដាក់ទោសទណ្ឌធ្ងន់ធ្ងរដល់ពលករបរទេសធ្វើការងារខុសច្បាប់នៅប្រទេសថៃ និងដាក់ទោសនិយោជកដែលយកពលករខុសច្បាប់កាលពីចុងខែមិថុនា នោះ មានពលករខ្មែរជាច្រើនបានធ្វើដំណើរមកកាន់ប្រទេសកម្ពុជា វិញ។
ក្រសួងការងារឲ្យដឹងថា បច្ចុប្បន្នមានពលករខ្មែរប្រមាណ ១,៥លាននាក់ កំពុងធ្វើការងារនៅប្រទេសថៃ ក្នុងនោះ ៧៥ម៉ឺននាក់ជាពលករស្របច្បាប់ ខណៈ ៣០ម៉ឺននាក់ផ្សេងទៀតមិនស្របច្បាប់ដែលក្នុងចំណោមពលករទាំង ៣០ម៉ឺននាក់នេះ មានទាំងអ្នកដែលមិនទាន់បានធ្វើលិខិតឆ្លងដែន និងអ្នកបានធ្វើលិខិតឆ្លងដែនហើយតែមិនទាន់បានទទួលដែលមានចំនួន ១៦ម៉ឺននាក់។
សេចក្ដីប្រកាសព័ត៌មានរបស់គណៈកម្មការផ្ដល់ភាពស្របច្បាប់ដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ ផ្សព្វផ្សាយនៅថ្ងៃទី៧ កក្កដា ឲ្យដឹងថា ក្រោយកិច្ចប្រជុំរវាងលោក អ៊ិត សំហេង រដ្ឋមន្ត្រីក្រសួងការងារកម្ពុជា និងរដ្ឋមន្ត្រីក្រសួងការងារថៃ លោក ស៊ិរិឆៃ ឌីស្តាគុល (Sirichai Distakul) ភាគីកម្ពុជា-ថៃ បានព្រមព្រៀងគ្នាថា រដ្ឋាភិបាលថៃ មិនអនុវត្តទោសពិន័យចំពោះនិយោជកថៃ ដែលកំពុងប្រើប្រាស់កម្លាំងពលករខ្មែរដែលគ្មានឯកសារនោះទេ ហើយក៏មិនបណ្ដេញពលករខ្មែរដែលបានចូលក្នុងទឹកដីថៃ ហើយកំពុងធ្វើការជាមួយក្រុមហ៊ុន ឬរោងចក្រណាមួយនៅក្នុងប្រទេសថៃ នោះដែរ។ ក្រសួងការងារថៃ នឹងផ្ដល់ឱកាសចំនួន ១៥ថ្ងៃ ចាប់ពីថ្ងៃទី២៤ ខែកក្កដា ដល់ថ្ងៃទី៧ ខែសីហា ដល់ពលករខ្មែរ និងនិយោជកថៃ ដែលមិនទាន់មានឯកសារអ្វីទាំងអស់ឲ្យទៅចុះឈ្មោះនៅតាមការិយាល័យចុះបញ្ជីពលករខ្មែរ។ ក្រសួងការងារថៃ នឹងបើកការិយាល័យចុះឈ្មោះពលករបរទេសចំនួន ១០កន្លែង នៅក្នុងទីក្រុងបាងកក និងចំនួន ១កន្លែងនៅក្នុងខេត្តនីមួយៗនៃប្រទេសថៃ។
ក្រសួងការងារថៃ អនុញ្ញាតឲ្យពលករខ្មែរដែលមានលិខិតឆ្លងដែន លិខិតធ្វើដំណើរ ឬប័ណ្ណស៊ីជម្ពូស្របច្បាប់ពេលដំបូង ប៉ុន្តែក្រោយមកបានផ្លាស់ប្ដូរនិយោជកដោយខុសនីតិវិធី ហើយក្លាយទៅជាពលករខុសច្បាប់ អាចមកចុះបញ្ជីជាមួយមន្ទីរការងារថៃ ដើម្បីបំពេញឯកសារដើម្បីក្លាយទៅជាពលករស្របច្បាប់វិញ។
ក្រៅពីនេះ ភាគីថៃ ក៏បានឯកភាពតាមសំណើរបស់កម្ពុជា ក្នុងការរៀបចំយុទ្ធនាការ ១០០ថ្ងៃ បើកផ្ដល់លិខិតឆ្លងដែន លិខិតធ្វើដំណើរ ឬប័ណ្ណ អូ.ស៊ី.ដាប់ប៊លយូ.ស៊ី (OCWC) ដល់ពលករខ្មែរឲ្យបានចំនួន ១៦ម៉ឺននាក់ដែលបានធ្វើការបញ្ជាក់អត្តសញ្ញាណជាមួយគណៈកម្មការផ្ដល់ភាពស្របច្បាប់រួចហើយក្នុងពេលកន្លងមក។ យុទ្ធនាការនេះនឹងចាប់ផ្ដើមពីថ្ងៃទី១ ខែសីហា តទៅ ដោយគណៈកម្មការនឹងបញ្ជូនក្រុមចល័តចំនួន៤ ក្រុមបន្ថែមទៀត ដើម្បីចុះបើកផ្ដល់តាមរោងចក្រធំៗទាំង ២០០ ដែលមានប្រើប្រាស់កម្លាំងពលករខ្មែរលើសពី ៧០នាក់។ កម្រៃសេវាផ្លូវការក្នុងការបើកផ្ដល់សំណុំឯកសារ ដែលភាគីថៃ និងកម្ពុជា បានឯកភាពគ្នាគឺជិត ១ពាន់បាត ឬស្មើប្រមាណ ៣៣ដុល្លារអាមេរិក។
បន្ថែមពីលើនេះ ភាគីថៃ ក៏បានឯកភាពតាមសំណើរបស់កម្ពុជា ក្នុងការរៀបចំយុទ្ធនាការ១ទៀតគឺយុទ្ធនាការបញ្ជាក់អត្តសញ្ញាណពលករខ្មែរដែលមិនទាន់មានលិខិតធ្វើដំណើរ និងប័ណ្ណ OCWC ដើម្បីយកទៅសុំភាពស្របច្បាប់ពីអាជ្ញាធរថៃ ដោយកំណត់យន្តការបញ្ជាក់អត្តសញ្ញាណពលករ និងបើកផ្តល់ឯកសារជូនពលករនៅក្នុងថ្ងៃតែមួយ ហើយពលករអាចទៅសុំទិដ្ឋាការស្នាក់នៅ និងទិដ្ឋាការការងារពីភាគីថៃ ពីកន្លែងតែមួយតែម្ដង។
យុទ្ធនាការគ្រោងចាប់ផ្ដើមក្នុងសប្ដាហ៍ទី១ នៃខែសីហា ដោយមានក្រុមការងារចំនួន ២០ក្រុមបន្ថែមទៀត ដោយផ្ដើមចេញពីពលករផ្នែកនេសាទក្នុងខេត្តរ៉ាក់យ៉ង និងផ្នែក ឬខេត្តផ្សេងទៀតជាបន្តបន្ទាប់។ កម្រៃសេវាផ្លូវការក្នុងការធ្វើ និងបើកផ្ដល់សំណុំឯកសារនេះគឺ ២.៣៥០បាត ឬស្មើប្រមាណ ៨០ដុល្លារអាមេរិក។
គណៈកម្មការផ្ដល់ភាពស្របច្បាប់បញ្ជាក់ថា នឹងចុះទៅផ្ដល់សំណុំឯកសារផ្ដល់ភាពស្រប ច្បាប់ជូនពលករនៅក្នុងទឹកដីថៃ តែម្ដង។ ដោយឡែកចំពោះពលរដ្ឋដែលកំពុងស្នាក់នៅកម្ពុជា ហើយមានបំណងចេញទៅធ្វើការនៅប្រទេសថៃ គណៈកម្មការផ្ដល់ភាពស្របច្បាប់ទទូចឲ្យជ្រើសរើសការចេញទៅប្រទេសថៃ ដោយស្របច្បាប់ជាពលករ (MOU) តាមរយៈភ្នាក់ងារជ្រើសរើសឯកជនទាំង ៧៧ ដែលមានការទទួលស្គាល់ដោយអាជ្ញាធរកម្ពុជា និងថៃ៕