Clik here to view.
មន្ត្រីឃ្លាំមើលការអភិវឌ្ឍសង្គមប្រចាំខេត្តព្រះសីហនុ ស្នើឲ្យចៅសង្កាត់លេខ១ ទើបជាប់ឆ្នោតថ្មី និងអតីតចៅសង្កាត់ ត្រូវរួមសហការគ្នាជំរុញការផ្តល់សេវាបម្រើផ្សេងៗជូនប្រជាពលរដ្ឋឲ្យបានល្អ ប្រសើរជាងឈ្លោះគ្នាដណ្ដើមបន្ទប់ធ្វើការងារ។
គិតត្រឹមថ្ងៃពុធ ទី៥ ខែកក្កដា អតីតចៅសង្កាត់លេខ១ ឈ្មោះ ឈិត សុផាត មកពីគណបក្សប្រជាជនកម្ពុជា នៅក្រាញននៀលមិនព្រមប្រគល់បន្ទប់ធ្លាប់អង្គុយធ្វើការប៉ុន្មានអាណត្តិកន្លងទៅ ឲ្យចៅសង្កាត់ទើបជាប់ឆ្នោតថ្មីមកពីគណបក្សសង្គ្រោះជាតិ ទេ ដោយលើកហេតុផលថា អគារសាលាសង្កាត់លេខ១ ត្រូវគណបក្សប្រជាជនកម្ពុជា ជាអ្នកចំណាយថវិកាសាងសង់។
ក្រុមប្រឹក្សាសង្កាត់លេខ១ ក្រុងព្រះសីហនុ ខេត្តព្រះសីហនុ ដែលទើបប្រកាសចូលកាន់តំណែងថ្មី បានបើកកិច្ចប្រជុំលើកដំបូងរបស់ខ្លួនកាលពីព្រឹកថ្ងៃពុធ ទី៥ ខែកក្កដា បានលើកយករបៀបវារៈចំនួនបីមកពិភាក្សា ដោយមានវត្តមានចៅសង្កាត់លេខ១ ជាប់ឆ្នោតថ្មី និងអតីតចៅសង្កាត់ ចូលរួម។
ការពិភាក្សាក៏បានលើកយកករណីអតីតចៅសង្កាត់លេខ១ ចាញ់ឆ្នោត គឺលោក ឈិត សុផាត មកពីគណបក្សប្រជាជនកម្ពុជា ដែលមិនព្រមប្រគល់បន្ទប់ការិយាល័យ និងសម្ភារៈធ្វើការងារដែលខ្លួនធ្លាប់ប្រើប្រាស់ពេលធ្វើជាចៅសង្កាត់ប៉ុន្មានអាណត្តិមកនេះ ទៅឲ្យចៅសង្កាត់ទើបជាប់ឆ្នោតថ្មីមកពីគណបក្សសង្គ្រោះជាតិ។
អ្នកស្រី ជៀប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ ដែលត្រូវចៅសង្កាត់លេខ១ ទើបជាប់ឆ្នោតថ្មី អញ្ជើញឲ្យចូលរួមក្នុងកិច្ចប្រជុំនៅសាលាសង្កាត់។ អ្នកស្រីចាត់ទុកការដែលអតីតចៅសង្កាត់លេខ១ លោក ឈិត សុផាត មិនទាន់ព្រមប្រគល់បន្ទប់ធ្វើការទៅឲ្យចៅសង្កាត់ជាប់ឆ្នោតថ្មី ថាជារឿងតូចតាច និងគួរត្រូវសម្របសម្រួលឲ្យបានឆាប់។
អ្នកស្រីឲ្យដឹងថា អគារសាលាសង្កាត់លេខ១ គឺមានបន្ទប់ចំនួន៤ មានទំហំប៉ុនគ្នា និងមិនគួរឲ្យមានការទាស់ទែងគ្នារឿងបន្ទប់ធ្វើការ គឺអ្នកចាស់ត្រូវតែចាកចេញ ហើយអ្នកថ្មីត្រូវតែទៅអង្គុយនៅបន្ទប់របស់អតីតចៅសង្កាត់ធ្លាប់អង្គុយធ្វើការនោះទេ។
អ្នកស្រី សុធារី បញ្ជាក់ថា បើអតីតចៅសង្កាត់ចាញ់ឆ្នោត គាត់បានលើកយកហេតុផល និងសំណូមពរចង់អង្គុយក្នុងការិយាល័យគាត់ចាស់ ដែលគាត់អះអាងថាបានចំណាយថវិកាតុបតែង និងមានទូឯកសារផ្សេងៗជាច្រើនពិបាកក្នុងការរុះរើចេញ គួរតែចៅសង្កាត់ថ្មីពិចារណាអនុញ្ញាតឲ្យគាត់ ដោយគ្រាន់តែសរសេរអក្សរបន្ទប់ចៅសង្កាត់នៅពីមុខបន្ទប់ការិយាល័យចៅសង្កាត់លេខ១ ទើបជាប់ឆ្នោតថ្មី វាជាការស្រេច។
អ្នកស្រី សុធារី ផ្តល់ទស្សនៈថា គួរតែទាំងចៅសង្កាត់លេខ១ ទើបជាប់ឆ្នោតថ្មី និងអតីតចៅសង្កាត់ រួមគ្នាដោះស្រាយតម្រូវការចាំបាច់របស់ប្រជាពលរដ្ឋក្នុងមូលដ្ឋានឲ្យបានឆាប់ ប្រសើរជាងទៅឈ្លោះដណ្ដើមបន្ទប់ធ្វើការគ្នានាំឲ្យប៉ះពាល់ដល់សេវាបម្រើពលរដ្ឋ៖ «»។
នៅក្នុងកិច្ចប្រជុំនោះដែរ លោក ឈិត សុផាត អតីតចៅសង្កាត់ បានអះអាងថា ៣អាណត្តិហើយដែលលោកជាប់ឆ្នោតជាចៅសង្កាត់លេខ១ គឺអគារសាលាសង្កាត់នេះត្រូវគណបក្សប្រជាជនកម្ពុជា រួមជាមួយសប្បុរសជន និងរូបលោកផ្ទាល់ បានចំណាយថវិកាដើម្បីសាងសង់ ដោយចែកជា ៤បន្ទប់មានទំហំប៉ុនគ្នា។
ទោះជាយ៉ាងណា កិច្ចប្រជុំស្ទើរពេញមួយព្រឹករវាងសមាជិកក្រុមប្រឹក្សាសង្កាត់លេខ១ រួមមានវត្តមានលោក អ៊ុក ចេត្តនី ចៅសង្កាត់លេខ១ ទើបជាប់ឆ្នោត និងលោក ឈិត សុផាត អតីតចៅសង្កាត់ គឺមិនបានឯកភាពគ្នាទៅលើការផ្លាស់ប្ដូរបន្ទប់ការិយាល័យធ្វើការនេះទេ។ អតីតចៅសង្កាត់ នៅតែក្រាញននៀលមិនព្រមប្រគល់បន្ទប់ធ្វើការដែលខ្លួនធ្លាប់អង្គុយ ទៅឲ្យលោក អ៊ុក ចេត្តនី ចៅសង្កាត់ថ្មីនេះទេ។
ករណីនេះ ចៅសង្កាត់លេខ១ លោក អ៊ុក ចេត្តនី ថ្លែងថា ការដែលរូបលោកនៅទទូចចង់បានបន្ទប់ការិយាល័យធ្វើការងាររបស់អតីតចៅសង្កាត់លេខ១ គឺដើម្បីងាយស្រួលនៅពេលពលរដ្ឋក្នុងមូលដ្ឋាននេះមករកសេវាបម្រើផ្សេងៗ គឺមានលក្ខណៈងាយស្រួល ព្រោះពួកគាត់ធ្លាប់ស្គាល់បន្ទប់ធ្វើការរបស់អតីតចៅសង្កាត់ស្រាប់។ ជាងនេះ លោកត្រូវអនុវត្តសកម្មភាពរបស់ខ្លួនឲ្យស្របទៅតាមឆន្ទៈដែលប្រជាពលរដ្ឋក្នុងមូលដ្ឋាននេះ ទទូចចង់ឲ្យមានការផ្លាស់ប្ដូរពិតប្រាកដ៖ «»។
ទាក់ទិនបញ្ហានេះ អភិបាលក្រុងព្រះសីហនុ លោក អ៊ី សុខឡេង និងលោក យន្ត មីន អភិបាលខេត្តព្រះសីហនុ ចាត់ទុករឿងផ្លាស់ប្ដូរបន្ទប់ធ្វើការងារនៅសាលាសង្កាត់លេខ១ ថាជារឿងកំប៉ិកកំប៉ុក និងស្នើឲ្យចៅសង្កាត់ជាប់ឆ្នោតថ្មី និងអតីតចៅសង្កាត់ ត្រូវរួមសហការគ្នាធ្វើការងារបម្រើប្រជាពលរដ្ឋឲ្យបានល្អ ប្រសើរជាងយករឿងតូចតាចមួយមកប្រឈមមុខដាក់គ្នា។
ទោះជាយ៉ាងណា លោក អ៊ី សុខឡេង មិនបានណែនាំអតីតចៅសង្កាត់នោះទេ តែបានបង្ហោះសារតាមបណ្ដាញសង្គមហ្វេសប៊ុក (facebook) តបទៅសមាជិកគាំទ្រចៅសង្កាត់លេខ១ មកពីគណបក្សសង្គ្រោះជាតិ ថា កុំឲ្យធ្វើអ្វីជ្រុលហួសហេតុពេក។
ការមិនព្រមប្រគល់បន្ទប់ធ្វើការងារទៅឲ្យចៅសង្កាត់ទើបជាប់ឆ្នោតថ្មីមកពីគណបក្សសង្គ្រោះជាតិ ពេលនេះ បានទទួលរងការរិះគន់ពីប្រជាពលរដ្ឋមួយចំនួន។ ប្រជាពលរដ្ឋខ្លះបានជិះរថយន្ត និងម៉ូតូមកឈប់នៅពីមុខសាលាសង្កាត់លេខ១ ហើយបានសម្ដែងមតិថា មិនគួរលោក ឈិត សុផាត អតីតចៅសង្កាត់លេខ១ ដែលជាមនុស្សចាស់ទុំម្នាក់ នៅសោកសង្រេងក្រាញននៀលមិនព្រមចុះចេញពីកៅអី ឬតុធ្លាប់អង្គុយធ្វើការងាររបស់ខ្លួនពេលចាញ់ឆ្នោតបែបនេះទេ។ អ្នកជំនួញ និងអាជីវករខ្លះទៀត បានចាត់ទុកសកម្មភាពរបស់អតីតចៅសង្កាត់លេខ១ លោក ឈិត សុផាត ថាជាគំរូអាក្រក់ និងមានភាពអាម៉ាស់បំផុត៕