ប្រធានចៅក្រមជំនុំជម្រះនៃតុលាការកំពូល អ្នកស្រី ឃឹម សត្ថាវី សម្រេចបង្វិលសំណុំរឿងសកម្មជនការពារបរិស្ថានតំបន់អារ៉ែង ទៅសាលាឧទ្ធរណ៍ឲ្យជម្រះក្ដីឡើងវិញ លើបណ្ដឹងសុំទម្លាក់បទចោទរបស់តុលាការខេត្តកោះកុង។ ការសម្រេចនេះ ដោយសារតុលាការកំពូល យល់ថា សាលដីការបស់សាលាឧទ្ធរណ៍ គឺមិនត្រឹមត្រូវតាមគតិច្បាប់។
សកម្មជនការពារបរិស្ថានតំបន់អារ៉ែង លោក វ៉ែន វ៉ន ត្រូវបានតុលាការខេត្តកោះកុង ចាប់ខ្លួន និងដាក់ពន្ធនាគារ កាលពីថ្ងៃទី៧ ខែតុលា ឆ្នាំ២០១៥ ដោយចោទប្រកាន់ ២បទល្មើស ទាក់ទងនឹងការប្រមូលអនុផលព្រៃឈើ និងការបំបាត់វត្ថុតាង ប៉ុន្តែលោកត្រូវបានតុលាការសម្រេចឲ្យនៅក្រៅឃុំបណ្ដោះអាសន្នវិញ នៅថ្ងៃទី៣ ខែមីនា ឆ្នាំ២០១៦។ ដោយគិតថា ខ្លួនមិនបានប្រព្រឹត្តដូចការចោទប្រកាន់ លោក វ៉ែន វ៉ន បានដាក់ពាក្យប្ដឹងមកសាលាឧទ្ធរណ៍តាមរយៈមេធាវី ដើម្បីស្នើសុំតុលាការជាន់ខ្ពស់ទម្លាក់ចោលបទចោទរបស់តុលាការខេត្តកោះកុង ចំពោះរូបលោក។
លោក វ៉ែន វ៉ន បញ្ជាក់ថា ឈើដែលលោកទិញយកមកសង់រោងសហគមន៍ដើម្បីជួបប្រជុំការងារនោះ គឺជាឈើធម្មតា មិនមែនជាប្រភេទឈើប្រណិតនោះទេ ហើយកន្លែងដែលលោកទិញឈើ គឺមកពីខេត្តកំពង់ស្ពឺ មិនមែននៅខេត្តកោះកុង ទេ។ ចំណែកទឹកប្រាក់សម្រាប់ទិញឈើវិញ គឺជាការចូលរួមគ្នាពីពលរដ្ឋនៅក្នុងសហគមន៍ មិនមែនជាប្រាក់ផ្ទាល់ខ្លួនឡើយ៕