អគ្គរាជទូតជប៉ុន និងរដ្ឋមន្ត្រីក្រសួងការបរទេសកម្ពុជា ចុះហត្ថលេខាលើលិខិតប្ដូរសារ និងកំណត់ហេតុនៃការពិភាក្សា ស្ដីពីការផ្ដល់ជំនួយឥតសំណងដល់កម្ពុជា នូវទឹកប្រាក់ជាង ៦០០លានយ៉េន ឬប្រហែលជិត៦លានដុល្លារអាមេរិក សម្រាប់អនុវត្តគម្រោងអាហារូបករណ៍អភិវឌ្ឍធនធានមនុស្ស។
ការចុះហត្ថលេខាលើជំនួយឥតសំណងនេះ ធ្វើឡើងតាមរយៈអគ្គរាជទូតជប៉ុនប្រចាំកម្ពុជាលោក ហូរីណូអ៊ូជី ហ៊ីដេហ៊ីសា (Horinouchi Hidehisa) និងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន នៅថ្ងៃទី៤ កក្កដា នាទីស្ដីការក្រសួង។
លិខិតប្ដូរសារ និងកំណត់ហេតុនៃការពិភាក្សាលើជំនួយនេះត្រូវបែងចែកលើគម្រោងចំនួនពីរ គឺទី១ គម្រោងអាហារូបករណ៍អភិវឌ្ឍធនធានមនុស្ស សម្រាប់ឆ្នាំ២០១៧ និងទី២ គម្រោងដូចគ្នាសម្រាប់ឆ្នាំ២០១៨។
គម្រោងនេះជប៉ុនបានជួយកម្ពុជា ចាប់តាំងពីឆ្នាំ២០០០មក ហើយរហូតមកដល់ឆ្នាំ២០១៦នេះ និស្សិតកម្ពុជាចំនួន ២៧៥នាក់ បានបញ្ចប់ការសិក្សាពីកម្មវិធីអាហារូបករណ៍ និងបានបម្រើការងារក្នុងវិស័យរដ្ឋ និងឯកជននៅកម្ពុជា៕