មេភូមិថ្នល់កែង ឃុំអន្លង់វែង ស្រុកអន្លង់វែង កំពុងស្វែងរកក្រុមអ្នកច្បាប់ឲ្យជួយជ្រោមជ្រែង ដើម្បីតទល់គ្នាក្នុងផ្លូវច្បាប់នៅតុលាការខេត្តឧត្តរមានជ័យ ប្រឆាំងនឹងឧត្តមសេនីយ៍យោធាម្នាក់ដែលជាអ្នកការពារដីឲ្យក្រុមហ៊ុនដីសម្បទានឯកជន ដាតា រ៉ាប់ប៊ើរ (Data Rubber)។
ការប្ដឹងតតាំងតាមផ្លូវច្បាប់នេះ បន្ទាប់ពីឧត្តមសេនីយ៍យោធារូបនោះបាននាំទាហានពីរនាក់ និងបក្សពួកខ្លះទៀត ទៅវាយតប់រូបគាត់ ព្រមទាំងអនុប្រធានភូមិអូរតាម៉េង ម្នាក់ និងប្រជាពលរដ្ឋម្នាក់ទៀតមក។
សមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ នឹងចុះអង្កេតករណីដែលឧត្តមសេនីយ៍ផ្កាយមួយយោធាម្នាក់ ប្រើអំពើហិង្សាវាយតប់ទៅលើមេភូមិថ្នល់កែង ម្នាក់ អនុប្រធានភូមិអូរតាម៉េង ម្នាក់ ព្រមទាំងប្រជាពលរដ្ឋម្នាក់ទៀតនៅក្នុងឃុំអន្លង់វែង ឲ្យបានឆាប់ៗ។
អង្គការសិទ្ធិមនុស្សយល់ថា ករណីទាហានប្រើអំណាចវាយតប់មកលើប្រជាពលរដ្ឋដូចនេះ គឺជាការរំលោភសិទ្ធិមនុស្សយ៉ាងធ្ងន់ធ្ងរ។
ប្រធានភូមិថ្នល់កែង នៃឃុំអន្លង់វែង គឺលោក មុត មន។ លោកអះអាងនៅរសៀលថ្ងៃអង្គារ ទី៤ ខែកក្កដា ថា កាលពីថ្ងៃទី២៩ ខែមិថុនា រូបលោក និងអនុប្រធានភូមិអូរតាម៉េង ម្នាក់ឈ្មោះ ឡុង ប៊ុនថេង និងប្រជាពលរដ្ឋនៅភូមិថ្នល់ថ្មី ម្នាក់ទៀតឈ្មោះ ហ៊ត់ ដុំ បានទៅដាំស្វាយចន្ទីនៅក្នុងដីចម្ការរបស់លោកជាប់ដីសម្បទានសេដ្ឋកិច្ចរបស់ក្រុមហ៊ុន ដាតា រ៉ាប់ប៊ើរ។ ដីរបស់លោកថ្វីត្បិតតែក្រុមនិស្សិតស្ម័គ្រចិត្តបានវាស់វែងឲ្យហើយមានបង្កាន់ដៃកម្មសិទ្ធិច្បាស់លាស់ក៏ដោយ ក៏ក្រុមហ៊ុន ដាតា រ៉ាប់ប៊ើរ មិនឲ្យចូលទៅដាំដំណាំជាច្រើនឆ្នាំមកហើយ។
លោកមេភូមិថ្នល់កែង បញ្ជាក់ថា នៅពេលដែលលោកទៅដាំស្វាយចន្ទីនោះ គឺឧត្តមសេនីយ៍យោធាម្នាក់ឈ្មោះ ដួង ស៊ីណា ដែលជាអ្នកមើលការខុសត្រូវឲ្យក្រុមហ៊ុននោះមានគ្នីគ្នាជាច្រើននាក់ និងទាហានប្រដាប់អាវុធ ២នាក់ផង បានមកវាយប្រជាពលរដ្ឋម្នាក់ ព្រមទាំងអនុប្រធានភូមិអូរតាម៉េង ម្នាក់ទៀត ហើយក៏សំដៅមកវាយរូបលោកតែម្ដង៖ «ពួកម៉ាកខ្ញុំដែលគេវាយដួលប្រាប់ថា មន ប្រយ័ត្ន ហើយលោក ដួង ស៊ីណា ក៏ស្ទុះមកចាប់កអាវ រួចវាយខ្ញុំ ៤ដៃ ប្រមាថបាញ់សព្វគ្រប់»។
ប្រភពពីមេភូមិថ្នល់កែង ឲ្យដឹងថា បន្ទាប់ពីវាយតប់រូបលោក និងអនុប្រធានភូមិអូរតាម៉េង ហើយនិងប្រជាពលរដ្ឋម្នាក់មក ឧត្តមសេនីយ៍ផ្កាយមួយឈ្មោះ ដួង ស៊ីណា និងគ្នីគ្នាជាច្រើនទៀតក៏បានឡើងជិះរថយន្តបើកចេញទៅភ្នំពេញភ្លាមៗ ប៉ុន្តែលោកដាក់ពាក្យបណ្ដឹងទៅតុលាការតាមរយៈសមត្ថកិច្ចរួចហើយ។
ទោះជាយ៉ាងណា អាស៊ីសេរី មិនអាចស្វែងរកការទាក់ទងឧត្តមសេនីយ៍យោធា លោក ដួង ស៊ីណា ដើម្បីសុំការបំភ្លឺជុំវិញការចោទប្រកាន់នោះបានថាយ៉ាងណានៅឡើយ នៅថ្ងៃទី៤ ខែកក្កដា។
មេឃុំអន្លង់វែង លោក វង្ស ភ័ក្ត្រ ទទួលស្គាល់ថា ឧត្តមសេនីយ៍យោធាឈ្មោះ ដួង ស៊ីណា ពិតជាបានវាយតប់ទៅលើមេភូមិរបស់លោកមែន។ លោកមេឃុំបញ្ជាក់ថា នៅពេលកើតហេតុ អាជ្ញាធរស្រុកអន្លង់វែង ក៏បានដឹង ដោយបានបញ្ជូនកម្លាំងប៉ូលិស និងកងរាជអាវុធហត្ថជាច្រើននាក់ទៅជួយ ព្រមទាំងបាននាំខ្លួនទាហានពីរនាក់របស់តំបន់ប្រតិបត្តិការសឹករងខេត្តឧត្តរមានជ័យ ដែលពាក់ព័ន្ធនឹងការចូលដៃជាមួយឧត្តមសេនីយ៍នោះទៅសាកសួរនៅទីបញ្ជាការកងរាជអាវុធហត្ថស្រុកអន្លង់វែង មួយយប់ផង។
លោកមេឃុំអន្លង់វែង ជំរុញឲ្យមេភូមិថ្នល់កែង ប្ដឹងករណីដែលឧត្តមសេនីយ៍យោធា វាយតប់នេះ ទៅតុលាការខេត្តឧត្តរមានជ័យ៖ «គេវាយកូនចៅរបស់យើង ទៅសប្បាយចិត្តយ៉ាងម៉េចកើត? សមត្ថកិច្ចបានរៀបចំចាត់ចែងតាមនីតិវិធីច្បាប់ប្រឆាំងនឹងឧត្តមសេនីយ៍យោធានោះហើយ»។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន យល់ថា ការដែលឧត្តមសេនីយ៍យោធានាំទាហាន និងបក្សពួកទៅវាយតប់ប្រជាពលរដ្ឋនោះ គឺជាការរំលោភសិទ្ធិមនុស្សយ៉ាងធ្ងន់ធ្ងរ ហើយលោកនឹងចុះអង្កេតករណីនេះឲ្យបានឆាប់។
លោក ស្រី ណារ៉េន បញ្ជាក់ថា សមាគមការពារសិទ្ធិមនុស្ស អាចនឹងផ្ដល់មេធាវីការពារមេភូមិដែលរងគ្រោះដោយសារតែឧត្តមសេនីយ៍យោធាវាយតប់នោះ ប្រសិនបើជាករណីចាំបាច់៕