Clik here to view.
អតីតគ្រូបង្រៀនជាប់កិច្ចសន្យាម្នាក់នៅឃុំទន្លូង ស្រុកមេមត់ ខេត្តត្បូងឃ្មុំ ស្នើឲ្យលោកនាយករដ្ឋមន្ត្រី ហ៊ុន សែន អន្តរាគមន៍ឲ្យគាត់បានបង្រៀន និងបានចូលជាក្របខ័ណ្ឌមន្ត្រីអប់រំ ដើម្បីមានឱកាសជួយដល់កូនសិស្សនៅតាមតំបន់ដាច់ស្រយាលបន្តទៀត។ ការស្នើនេះ ក្រោយពេលលោកនាយករដ្ឋមន្ត្រី ហ៊ុន សែន កាលពីថ្ងៃទី២១ មិថុនា ក្នុងឱកាសរំឭកទិវានៃការចងចាំស្ដីពីដំណើរឆ្ពោះទៅផ្ដួលរំលំរបបខ្មែរក្រហម បានស្នើឲ្យក្រសួងអប់រំ ដាក់បញ្ចូលគ្រូកិច្ចសន្យាចំនួន ៣នាក់ជាគ្រូក្របខ័ណ្ឌរបស់ក្រសួង។
រយៈពេលបង្រៀន និងធ្វើការងារជាបុគ្គលិកកិច្ចសន្យាឲ្យក្រសួងអប់រំ យុវជន និងកីឡា នៅលើទឹកដីឃុំទន្លូង ស្រុកមេមត់ អ្នកស្រី ហម គឹមសាន បានបំពេញការងារចំនួន ៦ឆ្នាំ។
អតីតគ្រូបង្រៀនជាប់កិច្ចសន្យាបង្រៀនថ្នាក់ទី១ និងទី២ រាប់ឆ្នាំរូបនេះ មិនទទួលបានការលើកទឹកចិត្តទេ ប៉ុន្តែនៅពេលអស់អាណត្តិកាលពីចុងឆ្នាំ២០១៦ អ្នកស្រីត្រូវបានសាលា សម្រេចបញ្ចប់កិច្ចសន្យារបស់អ្នកស្រី ហើយមិនបន្តកិច្ចសន្យាថ្មីឡើយ ក្រោមហេតុផលថាមានគ្រូក្របខ័ណ្ឌពីក្រសួងចុះមកបង្រៀនជំនួសវិញ។
អតីតគ្រូបង្រៀនជាប់កិច្ចសន្យានៅសាលាឆ្លងកាត់ចង្គំទី១ ស្ថិតនៅក្រោមចំណុះរបស់សាលាបឋមសិក្សាក្តុល អ្នកស្រី ហម គឹមសាន មានប្រសាសន៍ថា គាត់ធ្លាប់បង្រៀននៅសាលាមួយចំនួនដូចជា សាលាបឋមសិក្សាបឹងជ្រោង សាលាបឋមសិក្សាកោះថ្ម និងសាលាឆ្លងកាត់ភូមិចង្គំទី១ ស្ថិតនៅក្រោមចំណុះសាលាបឋមសិក្សាក្តុល ព្រមទាំងធ្លាប់ធ្វើជាមន្ត្រីបណ្ណារក្សនៅសាលាមួយនេះទៀតផង។ អ្នកស្រីបញ្ជាក់ថា កន្លងទៅ គាត់ធ្លាប់ស្នើឲ្យក្រសួងបញ្ចូលជាមន្ត្រីក្របខ័ណ្ឌដែរ ប៉ុន្តែមិនមានលទ្ធផលល្អឡើយ ហើយចាប់តាំងពីសាលាបញ្ចប់កិច្ចសន្យា គ្រួសាររបស់អ្នកស្រីជួបការលំបាកក្នុងជីវភាព ព្រោះមិនមានចំណូលសម្រាប់ផ្គត់ផ្គង់គ្រួសារឋិតថេរដូចពីមុន៖ «ដល់សួរគេទៅ គេថាគេអត់រើសកិច្ចសន្យាទេ ដោយគេថាចាំមើលសិនៗ គេថាអ៊ីចឹង»។Image may be NSFW.
Clik here to view.
អតីតគ្រូបង្រៀនជាប់កិច្ចសន្យារូបនេះ គឺបង្រៀននៅសាលាឆ្លងកាត់តាំងពីសាលានោះ គ្មានកៅអីសម្រាប់សិស្សអង្គុយ ហើយជញ្ជាំងក៏គ្មាន ប៉ុន្តែក្រោយមកក៏មានសប្បុរសជននៅសហរដ្ឋអាមេរិក ជួយឲ្យមានតុសម្រាប់សិស្សអង្គុយ មានបន្ទប់ទឹកត្រឹមត្រូវ និងមានជញ្ជាំងឈើសម្រាប់បិទបាំងទៀតផង។ ចុងក្រោយ សាលានេះ ខាងក្រសួងសម្រេចធ្វើអំពីថ្មចំនួន ១ខ្នង ដែលមាន ៦បន្ទប់ ប៉ុន្តែការងាររបស់អ្នកស្រី ត្រូវបានគេបញ្ចប់កិច្ចសន្យារួចទៅវិញ។
កាលពីថ្ងៃទី២១ មិថុនា ក្នុងឱកាសទិវារំឭកការចងចាំអំពីដំណើរឆ្ពោះទៅផ្ដួលរំលំរបប ប៉ុល ពត នៅភូមិកោះថ្ម ឃុំទន្លូង លោកនាយករដ្ឋមន្ត្រី ហ៊ុន សែន មានប្រសាសន៍អំពីការកសាងសាលារៀនថ្មីមួយខ្នងដែលមានកម្ពស់ពីរជាន់ សម្រាប់អ្នកភូមិកោះថ្ម។ លោកថែមទាំងដឹងថា មានគ្រូកិច្ចសន្យាចំនួន ៣នាក់ ហើយក៏បានស្នើឲ្យរដ្ឋមន្ត្រីក្រសួងអប់រំ ដាក់បញ្ចូលគ្រូជាប់កិច្ចសន្យាទាំង ៣នាក់នោះជាគ្រូក្របខ័ណ្ឌថែមទៀត៖ «ហើយឮថាគ្រូបង្រៀននៅទីនេះមានបីនាក់ជាគ្រូកិច្ចសន្យា ហើយបានបង្រៀនប៉ុន្មានឆ្នាំទៅហើយ។ លោក ខៀវ សាមេត បានវ៉ៃទៅសួរខ្ញុំ ហើយក៏បានសួរទៅរដ្ឋមន្ត្រីក្រសួងអប់រំ ផងដែរ។ ខ្ញុំសូមឲ្យបញ្ចូលគ្រូទាំងបីនាក់នេះជាគ្រូក្របខ័ណ្ឌតែម្តងទៅ»។
អ្នកស្រី ហម គឹមសាន ដែលមានអាយុ ៣៦ឆ្នាំ និងមានកូនប្រុសក្នុងបន្ទុកម្នាក់ ស្នើឲ្យលោកនាយករដ្ឋមន្ត្រីជួយអន្តរាគមន៍បានចូលបង្រៀនវិញ និងបានចូលជាមន្ត្រីក្របខ័ណ្ឌរបស់ក្រសួងអប់រំ ដូចគ្នាទៅនឹងការជួយគ្រូជាប់កិច្ចសន្យានៅភូមិកោះថ្ម ដែរ ពីព្រោះអ្នកស្រីក៏ជាអតីតគ្រូជាប់កិច្ចសន្យាបង្រៀននៅទីនោះដូចគ្នា។
អតីតគ្រូជាប់កិច្ចសន្យាដដែលបញ្ជាក់ថា ឆ្នាំសិក្សាថ្មី គឺអ្នកស្រីមិនបានដាក់ពាក្យស្នើសុំបង្រៀនទេ ដោយសារមន្ត្រីការិយាល័យអប់រំស្រុក និងនាយកសាលាដែលធ្លាប់បង្រៀនប្រាប់ថា ចាំពេលគេរើសគ្រូកិច្ចសន្យាបន្តទៀត គេនឹងប្រាប់អ្នកគ្រូឲ្យដាក់ពាក្យ តែក្រោយមកក៏បាត់ដំណឹងសូន្យ។
ប្រធានមន្ទីរអប់រំ យុវជន និងកីឡា ខេត្តត្បូងឃ្មុំ លោក អ៊ិន ពៅសម្បត្តិ មានប្រសាសន៍ថា ករណីអតីតគ្រូជាប់កិច្ចសន្យារូបនោះ ខាងលោកមិនទាន់ទទួលបានព័ត៌មានទេ។ លោកបញ្ជាក់ថា តំបន់ដែលខ្វះគ្រូ ទើបក្រសួងតម្រូវឲ្យជ្រើសរើសគ្រូជាប់កិច្ចសន្យាមកបង្រៀនបន្ថែម ប៉ុន្តែបើតំបន់ដែលមានគ្រូគ្រប់គ្រាន់ ក្រសួងមិនត្រូវការជ្រើសរើសគ្រូជាប់កិច្ចសន្យាទៀតឡើយ៖ «ទាក់ទងនឹងគ្រូកិច្ចសន្យា សូមលោកយល់ឲ្យច្បាស់ ពាក្យថាកិច្ចសន្យា លុះត្រាតែកន្លែងតំបន់ខ្វះគ្រូ។ អ៊ីចឹងបើមានគ្រូក្របខ័ណ្ឌហើយ អ៊ីចឹងគ្រូកិច្ចសន្យាត្រូវបានកាត់បន្ថយ»។
គ្រូបង្រៀនជាប់កិច្ចសន្យានៅខេត្តត្បូងឃ្មុំ កម្រិតចំណេះដឹងទូទៅមានចំនួនជាង ៤០០នាក់ ចំណែកគ្រូបង្រៀន ៣នាក់នៅសាលាបឋមសិក្សាកោះថ្ម ដែលលោកនាយករដ្ឋមន្ត្រី ហ៊ុន សែន ស្នើឲ្យបញ្ចូលក្របខ័ណ្ឌនោះ លោក អ៊ិន ពៅសម្បត្តិ បញ្ជាក់ថា ខាងលោកបានរៀបចំឯកសារបញ្ជូនទៅក្រសួងអប់រំ ដើម្បីស្នើសុំទៅក្រសួងមុខងារសាធារណៈ ដាក់បញ្ចូលពួកគេជាមន្ត្រីក្របខ័ណ្ឌ។ លោកថា នីតិវិធីនេះធ្វើឡើងដោយយោងទៅតាមសេចក្តីស្នើសុំរបស់លោកនាយករដ្ឋមន្ត្រី ហ៊ុន សែន និងយោងតាមបទពិសោធន៍ការងារយូររបស់ពួកគាត់ ព្រមទាំងមានសញ្ញាបត្របាក់ឌុប ជាដើម។
ចំណែកប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី កត់សម្គាល់ថា ការបញ្ឈប់គ្រូជាប់កិច្ចសន្យានោះ គឺជារឿងមិនត្រឹមត្រូវឡើយ។ លើសពីនេះ ស្ថាប័នក្រសួង និងមន្ទីរអប់រំ គប្បីលើកទឹកចិត្តដល់គ្រូជាប់កិច្ចសន្យាដែលបានបម្រើការងារយូរឆ្នាំនៅតំបន់ដាច់ស្រយាល ពិសេសត្រូវបញ្ចូលពួកគាត់ជាមន្ត្រីក្របខ័ណ្ឌ បើទោះបីជាគ្រូបង្រៀនរូបនោះត្រូវបានសាលាបញ្ចប់កិច្ចសន្យារួចហើយក្តី ម្យ៉ាងបើទោះបីជាតំបន់នោះមានគ្រូថ្មីចូលទៅបម្រើការងារក៏ដោយ៖ «តាមពិតទៅការដាក់អន្តរាគមន៍ គឺវាល្អហើយ ព្រោះវាត្រូវប្រសាសន៍របស់លោកនាយករដ្ឋមន្ត្រីអ៊ីចឹងណា៎»។
ប្រធានសមាគមគ្រូបង្រៀនដដែលយល់ថា ការបញ្ចូលគ្រូជាប់កិច្ចសន្យានៅតំបន់ដាច់ស្រយាលចូលក្របខ័ណ្ឌ គឺជារឿងត្រឹមត្រូវម្យ៉ាង ពីព្រោះជាការលើកទឹកចិត្តដល់ពួកគេដែលបានលះបង់ខ្ពស់ក្នុងការងារកន្លងទៅ។ បន្ថែមពីនេះ បញ្ហាកង្វះគ្រូបង្រៀននៅតំបន់ដាច់ស្រយាល នៅតែកើតមានឡើង ម្យ៉ាងគ្រូកិច្ចសន្យាភាគច្រើនត្រូវបានក្រសួងអប់រំ ដាក់បញ្ចូលជាមន្ត្រីក្របខ័ណ្ឌទៀតផង៕